ZABURI 37
37
Omoerio bw’abanto abakori amabe na oyo bw’abanto abaya
(Ogotera gwa Daudi)
1Togechigwa ase engencho y’abakori amabe,
toba ne ribero ase abakori amabe.
2Barabwo mbasirigwe bwango, basire buna obonyansi
basusane buna ebimeri ebibese.
3Mosemerie Omonene okore ayare amaya,
erio nario oramenye ase ense, obe korendire buya.
4Goka ase Omonene,
ere nakoe okogania gw’enkoro yao.
5Erue ase Omonene
mosemerie, nere nagokonye.
6Omonene naorokie oboronge bwao buna akoorokia oborabu,
na ekeene kiao buna amasase a mobaso gati.
7Obe nobotoereru ase obosio bw’Omonene,
omoganye noboremereria.
Togechigwa nomonto okogenderera buya ase enchera yaye,
omonto oyio okoroberia ogosaria.
8Bwetange korwa ase endamwamu, tiga ekeririanda kegima.
Togechigwa; okogechigwa nigo koragere okore ebibe.
9Abanyabibe mbasirigwe kegima,
korende abamoganyete Omonene mbaire ense ebe eyabo.
10Netigarete engaki ensinini, na omokori amabe asirigwe;
nobe gokorigereria mono aase aye, takonyorekana oreo.
11Abaitongo mbaire ense ebe eyabo,
barabwo mbagoke na goisaneka ase obonge bw’omorembe.
12Omokori amabe nigo agokora omoroberio bw’ogoita oyore omoronge,
na komoriananeria amaino.
13Omonene nasekerere omokori amabe,
ekiagera aroche ng’a rituko ri’ogosirigwa kwaye ndichiche.
14Abakori amabe nigo bagosomora emeyio yabo na batinga amata abo,
erinde baite abanto abataka na abaremeire,
baite na abakobwatia chinchera chi’oboronge.
15Emeyio yabo nebete chinkoro chiabo abanyene,
na amata abo nabunwe.
16Ebinto ebike omonto omonyaboronge abwate,
nigo bire ebiya kobua ebinge biria abakori amabe abange babwate.
17Abakori amabe mbaurwe chinguru echi babwate,
korende Omonene nagenderere koa abanyaboronge chinguru.
18Omonene nigo amanyete amatuko ’abamoirogete,
na omwando obo nogenderere kobao kare na kare.
19Barabwo tibari gosookigwa ase chingaki chi’amabe,
ase chingaki chi’enchara nigo bakoigota.
20Korende abakori amabe mbasirigwe;
ababisa b’Omonene nigo bare buna obuya bw’ebisicha,
nigo barasire, ee, mbasire buna erioki rigosira kegima.
21Omokori amabe nigo akoira egento singo tagokeirania,
korende omonto omoronge nigo are namabera na korua ebiegwa,
22Abanto abwo Omonene asesenirie mbaire ense ebe eyabo,
korende abwo aragereirie mbasirigwe kegima.
23Omonene nigo akobeka orogendo rw’omonto omoronge chinguru,
na kogokigwa narororwo.
24Omonto oyio naisa kogochwa, takogwa inse,
ekiagera Omonene namobwatete okoboko kwaye.
25Nigo narenge omwana, bono nagotire,
korende tinana‐korora omonto omoronge ogotigwa bosa,
gose abana baye bakoborwa endagera.
26Omonto oyio nigo akogenderera kona‐korua ebiegwa na korua singo,
abana baye nigo barasesenigwe.
27Tiga gokora amabe, kora ayare amaya,
igo nario orachie kare.
28Omonene nigo anchete oboronge;
tagotiga abachenu baye.
Barabwo mbarendwe goika kare na kare,
korende ororeria rw’abakori amabe ndosirigwe kegima.
29Abanyene oboronge mbaire ense ebe eyabo,
erio bagenderere komenyao botambe.
30Omonwa bw’omonto omoronge nigo agokwana amang’ana ’obong’aini,
na oromeme rwaye nigo rogosokia ay’ekeene.
31Amachiko a Nyasae oye nigo abeerete ase enkoro y’omonto oyio;
ase agoeta tari gotererigwa.
32Omokori amabe nigo agotengera omonto omoronge,
erio origia chinchera chi’okomoita.
33Omonene tagotiga omonto omoronge ase okobua kw’omokori
amabe, gose takomotiga abugwe ekero asoeirwe ase ekegambero.
34Ganya Omonene na obwatie enchera yaye,
nere nakoimokererie igoro akoe ense ebe eyao;
erio norigererie orore buna abanyabibe bagosirigwa.
35Narorire omokori amabe otindire ase obomwenu,
akaba okoranda buna omote ogokina ase amaroba amatobu.
36Nyuma y’amatuko amake ngaetera aase agwo, korende tarengeo,
nkamorigia, korende tinamonyora aande.
37Rigereria omonto omoikeranu, ee, origererie omonto ore nenkoro endonge,
norore ng’a omonto ogokora omorembe nere orachie kare.
38Korende abasaria mbasirigwe bonsi pi,
na ororeria rw’abakori amabe tirokogenderera.
39Ogotooreka kw’abanyaboronge nigo gokorwa ase Omonene,
ere nere obotamero bwabo ase chingaki chi’emechando.
40Omonene nigo akobakonya na kobatooria;
nigo akobarusia korwa ase abakori amabe, obatooria,
ekiagera bakomotamera.
Currently Selected:
ZABURI 37: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
