ZABURI 36
36
Obobe bwa mwanyabanto
(Ogotera gwa Daudi, omosomba bw’Omonene)
1Ebibe nigo bigokwana nomonto omokori amabe
ase enkoro yaye ime;
okomoiroka Nyasae tikori ase obosio bwaye.
2Omonto oyo nigo akweremia omonyene ase okweng’aina,
ng’a ebibe biaye tibikomanyekana bigechwe.
3Amang’ana omonto oyio agokwana
nigo are ay’ogosaria na obong’ainereria;
ere otigire gokora amang’ana ’obong’aini na ayare amaya.
4Ekero araire borere bwaye nigo agokora emeroberio y’amabe,
na kobwatia chinchera chitari chingiya,
tari kwanga obobe bonde bwonsi.
Obuya bwa Nyasae
5Aye Omonene, obwanchani bwao botari koera nigo bogoika aaria igoro,
na obwegenwa bwao nigo boigete ase amare igoro.
6Aye Nyasae, oboronge bwao nigo boteneine bokong’u buna ebitunwa biao.
Okogamba kwao nigo kore buna chindiba chintambe,
aye nigo orendete mwanyabanto ne ching’iti boigo.
7Nyasae, naki obwanchani bwao bwa botambe bore obonene!
Mwanyabanto nigo bagotamera ekiriri gie chimbaba chiao.
8Nigo bagoisanekigwa nobonoru bokorwa ase enyomba yao,
aye nobae banywe korwa ase orooche rwao rw’okogokia.
9Naye ore ensoko y’obogima,
na ase omobaso oo nigo tokorora omobaso.
10Genderera koorokia obwanchani bwao obonene ase abwo bakomanyete,
na oboronge bwao ase abwo bare ne chinkoro chindonge.
11Totiga amagoro ’abaenenu ang’ike ang’e kondwania,
gose amaboko ’abakori amabe anserie.
12Rora aase abakori amabe bagure inse,
baiyerigwe tibakonyara koboka naende.
Currently Selected:
ZABURI 36: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
