ZABURI 35
35
Ogosaba gw’okonyora ogokonywa
(Ogotera gwa Daudi)
1Aye Omonene, engereria abanto abwo bakoengererania nainche,
rwania abwo bakondwania!
2Bogoria enguba na eng’aya,
imoka onkonye!
3Aye orute abanto abwo bakombwatia ritimo na esimisi!
Ontebie ase omoyo one, “Ninche Omotooria oo.”
4Abanto abwo bakorigia gosiria obogima bwane,
tiga babugwe na gosookigwa.
Abwo bagokora emeroberio emebe y’okong’ita,
tiga bairanigwe babe nobosooku.
5Barabwo tiga babe buna omoiriro okoirurukigwa nomwaga,
na omomalaika bw’Omonene abe okobaiyeria.
6Omosunte na oboterere bibe ase enchera bagoetera,
na omomalaika bw’Omonene abe okobabwata abasirie.
7Abanto abwo bambekeire oboreba bobisi engencho ende etaiyo,
na bakunyire eirima ng’a basirie obogima bwane.
8Ogosirigwa tiga kobanyore mobosokano;
oboreba obwo bantegeire tiga bobabwate barabwo abanyene,
tiga bagwe imeo abanyene na gosirigwa.
9Omoyo one nogoke ase Omonene
na gochenga ase engencho y’ogotooreka kwaye.
10Amauga onsi ay’omobere one natebe,
“Aye Omonene, ning’o onga buna aye?
Aye ogotooria oyo otari ne chinguru korwa ase oyore ne chinguru komobua,
ee, nigo ogotooria oyo otari ne chinguru naende omoremerwa,
korwa ase oyo okomochanda.”
11Birori bi’oborimo nigo bakonyimokera,
bakomboria ase amang’ana ntamanyeti.
12Abanto abwo nigo bakong’akana amabe ase amaya,
nerusirie moyo.
13Ekero abanto abwo barwarete
nigo neboyetie eanga y’okweumia na goichana;
ngechanda ase okweng’ata,
ngasaba nturegete omotwe.
14Nkabechandera buna nigo barenge abasani baane gose abaminto;
nigo nabegete eanga y’okweumia, nturegete omotwe
buna omonto okweumia ekero ng’ina akure.
15Korende ekero narenge ase emechando,
nigo basangererekanete amo bakagoka.
Abanto batagwenerete, aba ntamanyeti
bakaba bagonchecheria batari gotiga.
16Abatamoirogeti Omonene nigo banchayete na gonchecheria,
bakangecha bakaba bakondiananeria amaino.
17Omonene, ngoika ririri orabe koyarigereretie rioka?
Intaborie korwa ase ogosiria barobeirie,
tooria obogima bwane korwa ase chindo echio!
18Erio ninkoiranerie ng’a mbuya mono agwo ase omosangererekano omonene,
ningotogie ase omoganda omonene bw’abanto.
19Totiga ababisa baane bagoke igoro yane engencho ende etaiyo;
totiga abwo bangechete bosa bagosimanera amaiso bankore bobe.
20Abanto abwo tibari gokwana amang’ana akorenta omorembe;
nigo bakona‐korigia amang’ana ’obong’ainereria
igoro y’abanto abwo bare abatoereru ase ense.
21Abwo nigo bagwasamia emenwa yabo bateba:
“Ahaa! Ahaa! Ntwayarora namaiso aito.”
22Aye Omonene, kwarorire amang’ana ayio, tokira‐kiri.
Omonene, tobaisa kobeera aare korwa asende!
23Nyasae one ore Omonene one, tabobora, oimokerere igoro,
erinde orwanerere oboronge bwane na amang’ana aane.
24Aye Omonene, Nyasae one,
nacha ekina kiane koreng’ana noboronge bwao,
tobaisa gotiga ababisa baane bagoke igoro yane.
25Tobatiga batebe, “Bono twamonyorire buna twaganetie.”
Tobatiga batebe, “Bono twamobuire.”
26Abanto abwo bakogokera emechando yane,
tiga basookigwe na batantanigwe;
abwo bagwetogia igoro yane,
tiga baboigwe obosooku na ogochaywa.
27Abanto abwo banchete ng’a ng’egwe oboronge bwane,
tiga baake eriogi ri’omogoko na omochengo,
bagenderere goteba, “Omonene noyo bw’obonene!
Ee, nigo agokirie namaya omosomba oye akonyora!”
28Erio oromeme rwane ndogenderere koraria oboronge bwao,
na ogotogigwa kwao, omobaso boira.
Currently Selected:
ZABURI 35: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
