ZABURI 34
34
Okomotogia Nyasae ase obuya bwaye
(Ogotera gwa Daudi)
1Nimbake Omonene chingaki chionsi,
ase omonwa one nimotogie botambe.
2Ase omoyo one ninyetogerie Omonene,
abwo bachayire tiga bayaigwe bagoke.
3Raria obonene bw’Omonene amo nainche
toimokererie erieta riaye igoro twensi amo.
4Nkarangeria Omonene, nere akang’iraneria,
akandusia korwa ase obwoba bwane bwonsi.
5Abwo bamorigereretie nigo bakomeka‐meka bare nomogoko,
gose amasio abo takororekana are nobosooku.
6Omonto omotaka nigo akorera, na Omonene omoigwa,
omotooria korwa ase emechando yaye yonsi.
7Omomalaika bw’Omonene nigo akorenda na goetanana abwo bamoirogete Omonene na kobatooria.
8Moteeme Omonene, morore ng’a nomuya.
Nasesenirie omonto oria omotameire.
9Moiroke Omonene, inwe abachenu baye,
naki abwo bamoirogete tibakoremerwa kende.
10Chindo chinsae nachinyare koremerwa na koba nenchara,
korende abwo bakomorigia Omonene tibakoremerwa kende gionsi kere ekiya.
11Abana baane, inchuo montegerere,
mborokererie buna moramoiroke Omonene.
12Inee! Aye nomonto bwanchete obogima?
Oganetie obe moyo amatuko amange, na korora amaya?
13Rirorio tanga oromeme rwao tirokwana amabe,
na ebikoba biao tibikwana obong’ainereria.
14Otige amabe, okore amaya;
origie omorembe na koyobwata mono.
15Amaiso ’Omonene nigo arigereretie abanyene oboronge,
na amato aye nigo akoigwa ebirero biabo.
16Obosio bw’Omonene nigo bore mamincha y’abwo bagokora amabe,
nabasirie korwa ase ense, tibainyorwa.
17Ekero abanyene oboronge bakorera ng’a bakonywe,
Omonene nigo akobaigwa na kobatooria korwa ase emechando yabo yonsi.
18Omonene nigo are ang’e nabwo chinkoro chiabo chiabunekire,
nigo akobatooria abwo berusirie moyo.
19Omonyene oboronge nigo akonyora emechando emenge,
korende Omonene namotoorie korwa ase eyio yonsi;
20nigo akorenda amauga aye onsi,
rinde tiribunwa nonya nerimo.
21Obobe nigo boraite omokori amabe,
na abwo bagechete omonyene oboronge nabagambigwe, banyore egesusuro.
22Omonene nigo akobooria emioyo y’abasomba baye,
gose onde tari ase abwo bakomotamera orache kogambigwa.
Currently Selected:
ZABURI 34: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
