ZABURI 33
33
Ogotera gw’okomotogia Omonene
1Inwe abanto abaronge, mochengere Omonene!
Inwe abamore ne chinkoro chindonge goika motogie Omonene!
2Moakere Omonene ng’a mbuya mono ase okobugia amakano ’ebirigisa,
motogie ase okobugia amakano are ne chinga ikomi!
3Moterere ogotera okoyia,
na kobugia ase eriogi rireng’aine buya na komochengera!
4Naki ring’ana ri’Omonene nigo rire boronge,
na ogokora kwaye gwonsi nigo agokora ase obwegenwa.
5Ere nigo anchete ayare boronge na ekeene,
na ense nigo eichire nobwanchani bw’Omonene botari koera.
6Ase chinguru chie ring’ana ri’Omonene igoro egatongwa,
na ase okobua kwe ring’ana riaye erioba na omotienyi ne ching’enang’eni bigatongwa.
7Igo agosangereria amache ’enyancha, buna amache are enyongo ime,
obeka chindiba aase abo.
8Ense yonsi neiroke Omonene,
na bonsi abamenyete ase ense bamwoboe.
9Naki ere agakwana, na ayio agakoreka;
agachika, na ayio akabao.
10Omonene nigo akoonchorana emeroberio y’abanto b’ebisaku,
na gosaria okogamba kwa mwanyabanto kwaba bosa.
11Okogamba kw’Omonene nigo goteneine kare na kare;
emeroberio yaye nigo egendererete ebiaare ase ebiaare.
12Ngesesenirie egesaku eke Omonene are Nyasae obo,
abanto aba achorete babe omwando oye.
13Omonene nigo arigereretie korwa igoro,
oroche mwanyabanto bonsi.
14Korwa agwo ase aikaransete,
nigo akobagambera bonsi abamenyete ase ense.
15Nere otongete chinkoro chi’abanto bonsi,
namanyete korenga ogokora kwabo gwonsi.
16Omoruoti tari orabue nomoganda oye omonene bw’abarwani,
gose etuoni teri eratoorigwe ne chinguru chiaye chinyinge.
17Gosemeria chibarasi chi’esegi, ayio mbosa,
tichikonyara kobua,
chinguru chiabo chinyinge tichigotooria omonto.
18Rora amaiso ’Omonene nigo abarigereretie abwo bamoirogete,
abwo basemeretie obwanchani bwaye botari koera.
19Omonene natoorie emioyo yabo korwa ase amakweri,
tibakwa ekero gi’enchara.
20Emioyo yaito nigo emoganyete Omonene,
ere nere ogokonywa gwaito, na enguba yaito.
21Ee, chinkoro chiaito nchimogokerete,
ekiagera tosemeretie erieta riaye richenu.
22Omonene, obwanchani bwao botari koera bobe amo naintwe,
ekiagera naye togosemeretie.
Currently Selected:
ZABURI 33: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
