ZABURI 31
31
Ogosaba gw’okoba nogosemeria ase Nyasae
(Ogotera gwa Daudi)
1Aye Omonene, naye ngotamera,
tobaisa gontiga nsookigwe;
ntoorie goetera ase oboronge bwao!
2Tegerera oigwe amang’ana aane, obe omwango gontooria.
Kabe egetare kiane ngotamera,
na eburi yane enkong’u, na ontoorie!
3Aye naye egetare kiane na eburi yane;
ase engencho y’erieta riao ondaae na kondenda.
4Indusie korwa ase oboreba bobisire bombwate,
aye naye egekengero kiane.
5Aye Omonene, Nyasae omwegenwa,
naye kwambooririe.
6Nigo ngechete abanto bagosasima emegwekano ere bosa,
korende nigo ngosemeretie aye Omonene.
7Ningoke na gochenga ase engencho y’obwanchani bwao botari koera;
aye igo ogwechandera emechando yane,
na kondengereria mono ase ogochandwa kwane.
8Tombegeti ase amaboko ’omobisa one;
korende gwatenenirie amagoro aane aase are aagare.
9Aye Omonene, ndorere amabera, ekiagera nigo mbwate emechando;
amaiso aane arimeire ime ase engencho y’obororo,
omoyo one ogoyire, naboigo nomobere one.
10Ase obogima bwane bwonsi nabeire inde nemechando;
na ase emiaka yane yonsi nabeire inde nomoichano;
chinguru chiane chiaerire ase engencho y’ogosaria kwane;
amauga ’omobere one omire pa.
11Ababisa baane bonsi nigo bagonchecheria,
na abasani baane boigo.
Abanto baamanyete banyoboire;
bonsi abakondora ase enchera nigo bagontama.
12Abanto banyebire buna bakweba omonto okure;
nabeire buna enyongo yatekire.
13Nigo nkoigwa ababisa baane bakomonyererana;
okogosa nigo kong’etanaine.
Abwo nigo bagosangererekana amo kogamba,
bagokora omoroberio bw’okong’ita.
14Korende inche nigo ngosemeretie aye Omonene.
Nigo ngoteba, “Aye naye Nyasae one.”
15Obogima bwane nigo bore ase amaboko ao;
ntoorie korwa ase amaboko ’ababisa baane na ay’abachandi baane.
16Ing’onchorere obosio bwao, inche omosomba oo,
ontoorie ase engencho y’obwanchani bwao bogendererete botambe.
17Aye Omonene, tontiga nsookigwe,
ekiagera nigo ngokorangeria.
Tiga abakori amabe basookigwe,
bagende aase abakure babe amamama.
18Kiria emenwa y’abwo bagokwana amang’ana ’oborimo,
abwo bagokwana amang’ana amabe igoro y’oyore omoronge,
na gokwana amang’ana ’oboenenu na ay’ogochaya.
19Naki obuya bwao bore obonge na obw’ogokumigwa,
obwo kwagacheire abanto abakoirogete,
ase amasio a mwanyabanto
nigo okoboorokia ase abakogotamera.
20Nigo okobabisa agwo asore,
ase okobarenda korwa ase emeroberio emebe y’abanto;
nigo okobarenda ase ekiriri kiao korwa ase abanto abang’achi.
21Omonene atogigwe!
Nigo anyorogetie obwanchani bwaye bw’ogokumia;
akandenda ase omochie omokong’u.
22Ekero narenge nobwoba nigo narengereretie, ngateba;
“Bono naserigwe gochia aare korwa ase obosio bwao!”
Korende nigo kwaigwete okoboria kwane kw’oboitongo,
ekero narerete asore ng’a onkonye.
23Mwanche Omonene, inwe abachenu baye mwensi!
Omonene nigo akobarenda buya abanto bare abegenwa,
korende nigo akorua egesusuro ase oyore omomwenu.
24Inwe mwensi aba momosemeretie Omonene,
kabe ne chinguru, mobe abaremu!
Currently Selected:
ZABURI 31: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
