ZABURI 30
30
Ogosaba gw’okoiraneria ng’a mbuya mono
(Ogotera gwa Daudi ekero aatananete hekalu ekaba enchenu)
1Aye Omonene, ningotogie, ekiagera kwanyimokirie korwa inse,
tigwatigete ababisa baane betogie igoro yane.
2Aye, Omonene, Nyasae one, nigo narerete asore ng’a onkonye,
na bono kwangwenirie.
3Omonene, gwatooririe omoyo one korwa aase abakure,
kwang’iraneirie obogima tingenda ase oboina ime.
4Inwe abachenu baye, tera amatera ay’okobaka Omonene,
iraneria ng’a mbuya mono ase erieta riaye richenu.
5Omonene nigo akoba nendamwamu ase engaki ensinini yoka,
korende obuya bwaye nigo bokoba ase obogima bw’omonto.
Ekerero nabo keranyare kobao ase omogoroba,
korende mambia omogoko na omochengo nigo bigocha.
6Ekero amang’ana onsi arenge amaya asende,
ngateba ng’a tinkobugwa.
7Aye Omonene, ase engencho y’obuya bwao
ogakora egetunwa kiane kegatenena bokong’u,
korende ekero kwabisete obosio bwao nkaba nobwoba.
8Erio nkarera asore, aye Omonene,
ngakoboria ase oboitongo:
9Mbitoki ki aye oranyore onye ngokwa na gosoa ase oboina ime?
Inee! Orotu rw’amaroba ndonyare kogotogia?
Ndonyare koraria obwegenwa bwao?
10Aye Omonene, inyigwe, ondorere amabera!
Omonene, inkonye!
11Aye kwaonchoire omoichano one okaba omochengo;
kwandusirie eanga y’emechando,
kwambekeire ey’omogoko.
12Ase ayio, omoyo one nogenderere kogotogia, togokira.
Aye Omonene, Nyasae one,
ninkoiraneria ng’a mbuya mono kogenderera kare na kare.
Currently Selected:
ZABURI 30: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
