ZABURI 25
25
Ogosaba ase okonyora oboraai na oborendi
(Ogotera gwa Daudi)
1Aye Omonene, ngocha nde asore nomoyo one bwonsi.
2Aye Nyasae one, naye nsemeretie, tontiga nsookigwe;
totiga ababisa baane bagokere okobugwa kwane.
3Monto onde bwensi ogosemeretie totiga asookigwe;
korende abwo batigire obwegenwa engencho ende etaiyo basookigwe.
4Omonene, imanyie chinchera chiao;
inyorokererie oboeto bwao.
5Ondaae ase ekeene kiao na onyorokererie,
ekiagera aye Nyasae nogotooreka kwane,
aye nigo ngosemeretie.
6Omonene, inyora amabera ao na obwanchani bwao botari koera,
ekiagera nao biarenge korwa kare.
7Aye Omonene, tobaisa koinyora ebibe na ogosaria bi’obosae bwane;
ong’inyore ase engencho y’obwanchani bwao bogendererete botambe,
na ase engencho y’obuya bwao.
8Omonene nigo are omuya na omonyene oboronge,
ase ayio nigo akworokereria abanyabibe enchera bagwenerete kobwatia.
9Ere nigo akoraa abanto bare abaitongo ase enchera endonge,
naende aborokereria komanya enchera yaye.
10Chinchera chionsi chi’Omonene nigo chire echi’obwanchani, na echi’obwegenwa,
ase abwo barendete okobwatana kwaye na oborori bwaye.
11Omonene, ase engencho y’erieta riao
onyabere ogosaria kwane, ekiagera nokonene.
12Kera omonto omoirogete Omonene,
oyio Omonene nigo akomworokereria enchera agwenerete gochora.
13Omonto oyio nagenderera gosesenigwa,
na ororeria rwaye ndoire ense.
14Omonene nigo are omosani bw’abanto bamoirogete,
nigo akobamanyia okobwatana kwaye kw’ogotianania.
15Botambe nigo nkoba imorigeretie Omonene,
nere orarusie amagoro aane ase oboreba.
16Aye omonene, ing’iranere ondorere amabera,
ekiagera nigo inde inche bweka, naende nchandegete.
17Omoichano nigo oichire ase enkoro yane,
ndusie ase obokong’u bwane,
18ndigererie orore obororo bwane na ogochandwa kwane,
na onyabere ebibe biane bionsi.
19Rora ababisa baane bonsi buna bare abange;
na buna bangechete nobotindi obonge.
20Renda omoyo one na ontoorie;
naye ngotamera tobaisa gontiga nsookigwe.
21Tiga obwegenwa na oboronge bindende,
ekiagera naye nsemeretie.
22Aye Nyasae, booria Abaisraeli
korwa ase emechando yabo yonsi.
Currently Selected:
ZABURI 25: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
