ZABURI 24
24
Omoruoti omonene
(Ogotera gwa Daudi)
1Ense na ebinto bire aroro nebi’Omonene;
oboiko bwonsi nobwaye, amo nabanto bamenyeteo.
2Nigo abegete oboroso bwaye igoro ase chinyancha,
akabokong’ia igoro ase chindooche.
3Ning’o oragwenere gotiira ase egetunwa ki’Omonene?
Ning’o oragwenere gotenena aase aye aachenu?
4Nomonto oria obwate amaboko atari na komocha, na enkoro echenegete,
noria otari gosasima chinyasae chi’oborimo,
gose gotiana ase obong’ainereria.
5Omonto oyio nonyore ogosesenigwa korwa ase Omonene;
boigo nanyore oboronge korwa ase Nyasae ore ogotooreka kwaye.
6Naboigo ekegori ki’abakomorigia kere;
abwo bakorigia barore obosio bwa Nyasae o Yakobo.
7Inwe ebiita, imokereria emekorogoto yaino igoro!
Inwe ebiita bia kare, igoka,
erinde Omoruoti bw’obonene asoe ime!
8Inee! Omoruoti oyio bw’obonene nere ng’o?
Ere n’Omonene ore ne chinguru na okobua,
ere n’Omonene Omobui ase chisegi.
9Inwe ebiita, imokereria emetwe yaino igoro!
Inwe ebiita bia kare, igoka,
erinde Omoruoti bw’obonene asoe ime!
10Inee! Omoruoti oyio bw’obonene nere ng’o?
Ere n’Omonene bw’Emeganda;
ere n’Omoruoti bw’Obonene.
Currently Selected:
ZABURI 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
