ZABURI 19
19
Obonene bwa Nyasae bokororekana ase Obotongi
(Ogotera gwa Daudi)
1Igoro nigo chikoorokia obonene bwa Nyasae;
na eaanga ya igoro eraria emeremo y’amaboko aye.
2Rituko erimo riatebia erinde obonene obo,
na obotuko obomo bwarareria obotuko bonde ayio ayio.
3Chinkwana chinde tichiri aroro, gose omonwa onde ogokwanwa tori,
na eriogi riabo tiriri koigugwa.
4Eriogi riabo riagendire, riesiareire ase ense engima,
na amang’ana abo aikire chinsinyo chi’ense.
Nyasae okorire igoro koba obomenyo bw’erioba.
5Erioba nigo rigosoka buna omonyuomi ogosoka korwa mwaye,
na riagoka buna omogosoria omokong’u okominyoka chimbero.
6Nigo rigosoka korwa ensemo eyemo ya igoro,
naende riekumba riagenda gochia ensemo ende;
gento kende tikeri gekobisekana korwa ase riberera riaye.
Amachiko ’Omonene
7Amachiko ’Omonene namaikeranu,
nigo agokora omoyo oba omoyia.
Oborori bw’Omonene nobw’ekeene,
nigo akong’ainiyia oyotamanyeti amange.
8Amachiko ’Omonene namaronge,
nigo akogokia enkoro;
ring’ana Omonene achikire nerironge,
nigo rikorenta oborabu ase amaiso.
9Okomoiroka Omonene nering’ana richenegete,
okwo koragenderere kare na kare;
okogamba kw’Omonene nogw’ekeene, na okw’oboronge.
10Ayio onsi nigo are amaya kobua etahabu, ee, kobua etahabu echenire
na amansu kobua obooke,
ee, kobua richoe ri’obooke.
11Amo nayio nigo ogokurera omosomba oo;
oyio okoyarenda nigo akoegwa eng’eria enene y’obuya.
12Ning’o oranyare komanya amamocho aye?
Omonene, nchene korwa ase amamocho aane abisekanete.
13Ontange inche, omosomba oo, tinkora ebibe bi’obomwenu;
tobitiga ebio bingambere!
Rirorio nimbe ntari na komocha,
nimbe omosibore korwa ase ogosaria okonene.
14Aye Omonene, Egetare kiane na Omobooria one,
anchera amang’ana aane na ebirengererio bire ase enkoro yane.
Currently Selected:
ZABURI 19: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
