ZABURI 18
18
Ogotera gw’okobua
(2 Sam 22:1–15)
(Ogotera Daudi, omosomba bw’Omonene, atererete Omonene, ekero Omonene amotooretie korwa ase Saulo na ababisa bande)
1Aye Omonene chinguru chiane, ningwanchete mono!
2Omonene nere egetare kiane na eburi yane enkong’u,
nere Omotooria one, na Nyasae one,
Nyasae one nere egetare kiane ndatamere;
nere enguba egonkengera, na Omotooria one bwe chinguru,
oyo ogonkengera bokong’u.
3Nindangerie Omonene, oyo ogwenerete gotogigwa,
nigo arantoorie korwa ase ababisa baane.
4Obororo bw’amakweri bokong’etanana,
chiooro chi’obobe chikandetera obwoba.
5Obobe bw’amakweri nigo bwang’etananete,
emeeto y’amakweri egantega na kombwata.
6Ase emechando yane nkarangeria Omonene,
nkarera ase Nyasae one ng’a ankonye.
Korwa ase Hekalu yaye akaigwa eriogi riane,
ekerero kiane gekamoikera, ere agakeigwa.
7Erio ense ekanyegerigwa na koondoka,
na amaroso ’ebitunwa agatengechigwa.
Ee, ense ekaiguswa, ekiagera Omonene arenge nendamwamu.
8Erioki rigasoka korwa ase chimioro chiaye,
na omorero ogosamba ogasoka korwa ase omonwa oye;
ee, omorero bw’amakara ogasoka korwa asare.
9Akang’usa igoro gocha inse aa, agacha;
riire rimwamu rikaba inse y’amagoro aye.
10Akariina omokerubi, akairuruka,
agacha ng’ora igoro ye chimbaba chi’embeo.
11Agetuba ere omonyenye nomosunte,
na amare amarito aichire amache.
12Korwa ase obomeka‐meku obwo bwarenge bosio bwaye
amagena ’embura na omorero bw’amakara
bigasoka goetera ase amare aye.
13Omonene agaaka enkoba korwa igoro;
na eriogi ri’Oyore Igoro Mono rikaigugwa;
amagena ’embura na omorero bw’amakara bigacha.
14Akaruta emegwe yaye, agaserebania ababisa baye;
akamesia chinkoba, akabatantania.
15Erio ebiambokero bi’enyancha bikarorekana,
na amaroso ’ense akaorokigwa aarabu,
ekero Omonene abatogonyerete
ase ogwoka kw’omoika bwe chimioro chiaye.
16Omonene akarambora okoboko kwaye korwa igoro, akambwata,
akandusia ase amache amange.
17Agantooria korwa ase omobisa one ore ne chinguru,
na korwa ase abwo bangechete;
barabwo nigo barenge ne chinguru kombua.
18Ekero narenge nemechando bakandwania,
korende Omonene akaba egekengero kiane.
19Akang’ira aase arenge aagare;
agantooria, ekiagera namogogetie.
20Omonene nigo ang’ete eng’eria y’obuya, ekiagera inde omoronge,
nigo ansesenetie, ekiagera inde namaboko atari na komocha.
21Inche nabeire nkobwatia chinchera chi’Omonene,
tintigeti Nyasae one ase ogokora obonyaka.
22Nabeire nkorenda amachiko aye onsi,
na timbeti ngotiga emeroberio yaye echikire.
23Nigo narenge omoikeranu asare,
nkerenda korwa ase obobe.
24Omonene ong’akanire, ekiagera ngokora ayare boronge,
na ekiagera aroche ng’a amaboko aane achenekire.
25Aye Omonene, nigo ore omwegenwa ase abwo bare abegenwa,
nigo okweorokia ng’a nomoikeranu ore ase abwo bare abaikeranu.
26Aye nigo ore omochenu ase abwo bare abachenu;
nigo okwanga abwo bare abakorekanu.
27Aye nigo ogotooria abanto bare abaitongo,
korende abwo bare namaiso ’oboenenu nigo okobairania inse.
28Ee, naye ogontongeria etaya yane;
Omonene, Nyasae one, nigo akomoreka omosunte ore asende oba oborabu.
29Konde amo naye, nigo ndasirie omoganda bw’esegi;
na ekero inde na Nyasae one nincharoke chindwaki igoro.
30Enchera ya Nyasae neng’ikeranu,
amang’ana aye ateemirwe na gotenena.
Ere nenguba ase bonsi abakomotamera.
31Inee! Ning’o ore Nyasae, otatiga Omonene?
Ning’o ore egetare, otatiga Nyasae oito?
32Nyasae nere okomboyia chinguru
na kondenda ase enchera yane.
33Ere okorire amagoro aane abeire buna ey’egesia,
onkong’irie na gontenenia ase ebitunwa.
34Ere bworokereirie amaboko aane korwana esegi,
erinde amaboko aane anyare gotinga obota bw’etaai.
35Aye kwang’eire enguba yao ase ogontooria,
okoboko kwao gw’okorio kogansiira;
na ogokonywa kwao gwankorire nabeire omonene.
36Kwang’eire aase aagare ngotaara,
na amagoro aane tagotererigwa.
37Nkabwatia ababisa baane, nkabaikeera inchera;
gose tinairanete goika nkabakoora.
38Nkabaaka inse nkabasenyenta, tibanyara koimoka,
bakagwa inse y’amagoro aane, bakabugwa.
39Aye nigo kwambegete chinguru chi’okorwana esegi;
okabeka ababisa baane inse y’amagoro aane.
40Ogakora ababisa baane bagatama korwa asende;
abangechete nkabasiria kegima.
41Abanto aba bakarera ng’a bakonywe, korende onde tarenge obatooretie,
bakarangeria Omonene, korende ere tabaigwa.
42Nkabasunyunta bakaba ebuse ekoirurukigwa nomwaga;
nkabatuguta buna ngotuguta esike ase enchera.
43Aye gwantooririe korwa ase okoamererania nabanto,
kwambekire nabeire omogambi bw’abanto b’ebisaku;
abanto ntamanyete, bono babeire abasomba baane.
44Ekero baigure chinkuma chiane nigo bakonyigwera;
abamenyi nigo bagocha bebeka inse yane.
45Abanto b’ebisaku ebiaao berusirie moyo
kobagosoka korwa ase chiburi chiabo, nigo bakoiguswa.
46Omonene nigo are moyo! Ere oyore egetare kiane atogigwe!
Nyasae ore ogotooreka kwane aimokererigwe igoro.
47Nyasae nigo akonduseria egesiomba,
nabeke abanto b’ebisaku inse yane.
48Ere nigo antooretie korwa ase ababisa baane,
akanyimokereria igoro ase abare mamincha yane,
naende agantooria korwa ase abanto abatindi.
49Aye Omonene, ase ayio ningotogie ase egati y’abanto b’ebisaku,
ninterere erieta riao ase okoritogia.
50Nyasae ong’eire inche, omoruoti oye, obobui obonene,
oorokirie obwanchani botari koera asende, inche omoakwa amaguta oye.
Inche Daudi, na ororeria rwane, goika kare na kare.
Currently Selected:
ZABURI 18: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
