EMERENG’ANIO 30
30
Amang’ana ’Aguri, mosinto o Yake o Masa
1Aya naro amang’ana ’Aguri, mosinto o Yake o Masa.
Omonto oyio agatebia Itieli na Ukali:
2“Ekeene, inche nigo inde omoriri otagwenereti korokwa omonto,
gose timbwati obomanyi bwa mwanyabanto.
3Inche tineorokereretie obong’aini,
erinde imomanye oyore Omochenu.
4Ning’o oriinete gochia igoro na goika gocha aa inse?
Ning’o osangereirie omwaga ase enkundi yaye?
Ning’o obwatire amache na koyaboa ase eanga yaye?
Ning’o okong’etie chinsinyo chionsi chi’ense?
Naki oyio akorokwa, na omwana oye naki akorokwa?
Ntebia onye koyamanyete!
5“Kera ring’ana ria Nyasae nigo rienekirie ng’a neri’ekeene. Ere nenguba ase abwo bakomotamera, barendwe. 6Tobaisa komenta kende ase amang’ana aye, nigo arabaise kogotogonyera, naye obe omonyaborimo.”
Emereng’anio ende
7Amang’ana abere naro nagosabire, toyandina ntarakwa. 8Orusie korwa asende ayare a bosa na oborimo. Tobaisa kong’a obotaka gose obotenenku, korende ong’e endagera engwenerete. 9Oise konyigotia mono, nigo ndakwange ntebe, “Omonene nere ng’o?” Gose inse koba omotaka nigo ndabaisa koiba na ndetere erieta ria Nyasae one obosooku.
10Tobaisa kogenka omosomba ase omonene oye, nigo arakoragererie, erinde obe nokomocha.
11Ekegori nkere gekoragereria abaise na tikeri gosesenia abang’ina.
12Abanto mbare bakwerora ng’a nabaikeranu bare, korende tibachenegeti korwa ase obobe bwabo.
13Abanto mbare bagwekaga ng’a nabaya bare na korigereria namaiso aichire nobomwenu.
14Abanto mbare babwate amaino anga emioro, ne chintakunero chi’amaino abo nigo chinga emeyio; barabwo nigo bakoria na gosiria abataka bare ase ense; nigo bakoura abaremeire bare ase abanto.
15Rikorominyo ndibwate abaiseke babere; barabwo nigo bakorangeria, “Toe, toe!”
Mbire ebinto bitato bitari goisaneka; ee, mbire bine bitari goteba ng’a biaisanekire, nabio ebi;
16aase abakure, na enda engomba,
ne riroba rirang’ete amache, na omorero.
Ebio tibiana goteba, “Twaisanekire.”
17Eriso ri’omonto ogochecheria ise na gochaya ng’ina ndirusigwe nebigonkoru bie rigoko na ririegwe namage e chinsoti.
18Ebinto mbire bitato bire bi’ogokumia asende; ee, mbire bine ebio ntamanyeti, nabio ebi:
19enchera y’ensoti igoro,
na ey’eng’iti igoro ase egetare,
na ey’emeeri igoro ase amache ’enyancha,
na enchera y’omosacha gochia ase omoiseke.
20Eyio nenchera y’omokungu omotomani: Nigo akoria na otinyia omonwa oye, erio oteba, “Inche tindakora obonyaka bonde.”
21Nare amang’ana atato akonyegeria ense, ee, nare ane etanyare koyaremereria, naro aya:
22Ekero omosomba akoba omoruoti,
na omonto omoriri akoigota endagera,
23na ekero omoiseke otanchiri akonyuomwa,
na omoiseke omosomba akoba ribaga ri’omokungu oria agokorera emeremo.
24Mbire ebinto bine ebisinini mono ase ense, korende bire nobong’aini obonge, nabio ebi:
25Amage nigo are ebitongwa bitari ne chinguru,
korende nigo akogacha endagera yabo agocha koria engaki y’egurugura.
26Ebisengi tibibwati chinguru,
korende nigo bikoroisia ase bikomenya ase ebitare ime.
27Chingige tichibwati omoruoti,
korende nigo chikogendera amo emeganda emeganda.
28Esagara nabo erabogorigwe nokoboko kw’omonto,
korende nabo ekomenya ase chinyomba chi’abaruoti.
29Mbire ebinto bitato bikogokia ase ogotaara kwabo, ee, mbire bine bire nogotaara okuya, nabio ebi:
30Endo ere ne chinguru chinyinge kobua ching’iti chinde, na teri kwoboigwa na ng’iti ende,
31na etuoni egwesigoria, na egoree,
na omoruoti okoraa abarwani baye b’esegi.
32Onye kwabeire omoriri na kweimokereirie igoro, gose onye kwabeire gokorengereria amabe, beka okoboko kwao ass omonwa oo, oyotube. 33Amabeere agotundwa nigo akorua amaguta, na okomintontoria emioro, amanyinga nigo ararueo. Naboigo ogoseegeta na koba nendamwamu, ayio nigo akorenta okorwana.
Currently Selected:
EMERENG’ANIO 30: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
