EMERENG’ANIO 29
29
1Omonto okona‐gokurerwa botambe ase okorongeigwa, korende okong’ia ebigoti, oyio nasirigwe mobosokano, tagokonywa.
2Ekero abanyene oboronge bakogamba, abanto nigo bakoba nomogoko, korende ekero abakori amabe bakogamba, abanto nigo bagochandeka na korera.
3Oyo bwanchete obong’aini nigo akomogokia ise, korende oyogotaara amo nabakungu abatayayi nigo agosiria chinibo chiaye.
4Omoruoti ogokora ay’oboronge nigo akogera ense yaye yagenderera gotenena bokong’u, korende oyo okorigia amaaki nigo akoyeiyeria.
5Omonto okong’aina omonto onde namang’ana amansu, oyio nigo agwetegera oboreba ase amagoro aye.
6Omonto omonyabibe nigo agotegwa nobosareku bwaye, korende omonyene oboronge nigo agotera nomogoko na gochenga.
7Omonyene oboronge nigo agwechandera oboronge bw’abataka, korende omokori amabe tamanyeti kende.
8Abanyacheche nigo bakoburukania omochie, korende abanto abang’aini nigo bagokendia endamwamu.
9Ekero omonto omong’aini akoamererania nomoriri, oria omoriri nigo akogechigwa na goseka, tari gokirakiri.
10Abanto bare nerang’o y’ogoitera amanyinga nigo bakogecha oyo otari na komocha, korende abare ne chinkoro chindonge nigo bakomorenda.
11Omonto omoriri nigo agosokia endamwamu yaye yonsi, korende oyore omong’aini nigo akoyetanga otoerera.
12Omogambi aise gwancha amang’ana ’oborimo, abasomba baye bonsi nigo barabe abakori amabe.
13Omotaka na omochandi nigo bamenyete amo; Omonene nere okobaa bonsi babere oborabu bw’amaiso.
14Omoruoti okogambera abataka ase oboronge, obogambi bwaye mbogenderere gotenena bokong’u.
15Ekeranya na ogotogonyera ase okorongeyia nigo bikorenta obong’aini, korende omwana ogotigwa okora buna anchete, nigo akorentera ng’ina obosooku.
16Ekero abakori amabe bakomentekana, ogosaria nigo gokomentekana, korende abanyene oboronge mbarore okogwa kw’abwo.
17Rongeyia omwana oo omomura, ere nakorentere ogotimoka, nigo ararente omosasoko omonge ase enkoro yao.
18Ase okomaanorerwa kw’amang’ana gotari, abanto tibari gwetanga gokora amabe, korende nasesenirie oyo obwatete amachiko.
19Amang’ana oka amasa takorongeyia omosomba, ekiagera naba oyamanyete, takoyaigwera.
20Oise korora omonto ore omwango ase ogokwana, ogosemeria nkore ase omonto omoriri kobua ase oyio.
21Omonto ogotuga omosomba oye na omoa ebinto bionsi aganetie korwa obwana bwaye, omosomba oyio nabo araire omwando oye.
22Omonto obwate endamwamu nigo agoseegeta eriomana, na oyo okogechigwa nigo akorenta ogosaria okonge.
23Oboenenu bw’omonto nigo bokomokeeyia, korende oyore nomoika bw’oboitongo nigo akonyora ogosikwa okonene.
24Omonto ore omogisangio bw’omoibi nigo agechete obogima bwaye obonyene; nigo akoigwa ogotianerwa gw’okoragereria, korende okira takoorokia gento.
25Okobairoka mwanyabanto nigo gokoba oboreba, korende omonto omosemeretie Omonene nigo arendire buya.
26Abanto abange nigo bakorigia ogwancherwa gokorwa ase omogambi, korende kera omonto nigo akonyora oboronge korwa ase Omonene.
27Omonto otari omoronge nigo are okogechia ase oyo ore omoronge, na oyore nenkoro endonge nigo are okogechia ase omokori amabe.
Currently Selected:
EMERENG’ANIO 29: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
