EMERENG’ANIO 28
28
1Abakori amabe nigo bagotama nonya onde tari kobabwatia, korende abanyaboronge nigo bare abaremu buna chindo chinsae.
2Ekero ense yasaririe nigo ekoba nabagambi abange, korende eye ebwate abanto bare nobong’aini na okomanya, obogambi nigo bokogenderera gotenena bokong’u.
3Omonto omotaka ore nokobua ogokorera abataka bande bobe ase okobaurereria, nigo anga buna embura enyinge egosaria chindagera.
4Abanto batigire amachiko nigo bagotogia abakori amabe, korende abarendete amachiko nigo bakoamererania nabwo.
5Abakori amabe tibamanyeti ayare amaronge, korende abwo bakomorigia Omonene nigo bamanyete onsi.
6Omonto omotaka okobwatia oboronge nigo are omuya kobua omonda ore omokorekanu.
7Omwana orendete amachiko nigo are omong’aini, korende oyore omogisangio bw’abaria bobe nigo akorenta obosooku ase ise.
8Omonto okomenta chinibo chiaye ase enchera etari ey’ekeene ase okogania ebitoki, oyio nigo agochisangereria chibe echi’omonto okororera abataka amabera.
9Omonto okoonchora ogoto kwaye taigwera amachiko, nonya nogosaba kwaye nigo kore okogechia.
10Omonto ogosiria abare ne chinkoro chindonge, na kobaraa ase enchera ende, oyio nagwe ase eirima eria aremire ere omonyene, korende abwo batari na komocha mbanyore omwando omuya.
11Omonto omonda nigo akwerengereria ng’a nomong’aini are, korende omonto omotaka ore nokomanya nigo aramotuke amomanye.
12Ekero abanyene oboronge babuire, obonene obonge nigo bokobao, korende ekero abakori amabe bakogamba, abanto nigo bakwebisa.
13Omonto okobisa ebibe biaye tagosesenigwa, korende oyo okobiorokia na kobitiga narorerwe amabera.
14Nasesenirie omonto omoirogete Omonene botambe, korende oyo okong’etie enkoro yaye nanyore emechando eramosirie.
15Omogambi omokayayu okogambera abanto abataka nigo anga buna endo ekoruma, gose edubu yagechigwe.
16Omogambi otari nobong’aini nigo are omochandi omotindi, korende oria ogechete konyora ebitoki bitari bi’oboronge, nigo akogenderera kogamba ase amatuko amange.
17Onye omonto oritoeirwe nokomocha kw’ogoitera amanyinga ’omonto onde, tiga abe okona‐gotama goika akwe, na onde tagokonya omonto oyio.
18Omonto otari na komocha ase chinchera chiaye natoorigwe; korende oyore omokorekanu ase chinchera chiaye nasire ase eyemo y’echio.
19Omonto ogokora emeremo ase omogondo oye nanyore endagera enyinge, korende oyokobwatia emeroberio etagwenereti nigo arabe omotaka omorabu se.
20Omonto ore nenkoro endonge nanyore ogosesenigwa okonge, korende oyo okoayerera ase okoba omonda takomocha konyora egesusuro.
21Tari buya gokora ogwanchereria ase abanto, korende ase engencho y’agasamunye k’omogati omonto nigo agwekora koba omosaria.
22Omonto obwate ribero nigo akoayerera koba omonda, gose tari korengereria ng’a obotaka mbomonyore.
23Omonto ogotogonyera oyo oiranire nyuma ase okomorongeyia nanyore ogwancherwa kobua oria okomong’aina namang’ana amansu.
24Omonto okoura ise gose ng’ina enibo yabo, erio oteba, “Ebi tibiri ebibe,” oyio nigo are omogisangio bw’oyogosiria.
25Omonto ore ne ribero nigo agoseegeta eriomana, korende oyosemeretie Omonene natenenkigwe.
26Oyobwesemeretie ere omonyene, oyio nomoriri, korende oyo okobwatia obong’aini natoorigwe.
27Omonto ogokonya abataka takoremerwa, korende oyo ogotuba amaiso aye ng’a tarora abataka nanyore okoragererigwa okonge.
28Ekero abakori amabe bakogamba, abanto nigo bakwebisa, korende ekero basirigwe, abanyaboronge nigo bakomentekana.
Currently Selected:
EMERENG’ANIO 28: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
