EMERENG’ANIO 27
27
1Tobaisa gwetogeria rituko ri’ankio, ekiagera tomanyeti aya rituko rikorenta.
2Aye omonyene tobaisa gwetogia, korende tiga omonto onde agotogie; tiga omonto omoao agotogie, korende tari ebikoba biao omonyene.
3Rigena neririto na omokenye nomorito, korende okogechigwa kw’omonto omoriri nigo kore okorito kobua ebinto ebio bibere.
4Endamwamu nentindi, na ekeririanda nigo kegosiria, korende ning’o oranyare koremereria ribero?
5Ogotogonyera kwa maiso marore nigo kore okuya kobua obwanchani bobisegete.
6Ogoakwa gokorwa ase omosani nigo kore okw’obwegenwa, korende okonyunyunta kw’omobisa nigo kore okw’obong’ainereria.
7Omonto oigotete nigo agochaya nonya nobooke, korende oyore nenchara nonya nendagera ere endoro nigo ekomwansera.
8Omonto ogotama korwa bwoye nigo anga buna enyoni ekong’anya korwa ase egeswa kiaye.
9Amaguta akweakwa na amanukato nigo bikogokia enkoro, naboigo bore obwororo bw’omosani oyo okorua ogosemia okuya.
10Tobaisa kweba omosani oo, na omosani o iso; rituko kwanyorire emechando togenda ase enka y’oyomino. Mbuya koba nomogisangio ase engaki eyio, kobua koba noyominto omenyete aare.
11Omwana one, kabe nobong’aini na ogokie enkoro yane, erio nario ndanyore ring’ana nkoiraneria omonto ogonchaya.
12Omonto omong’aini nigo akororera emechando aare bwebisa, korende oyotamanyeti amange nigo akogenderera gochia bosio oumerana nero, erio ochandeka.
13Ira eanga y’omonto oyo bwerure koba intenenera ase omonto omoao, ira ebi abwate, ekiagera bwerure ase engencho y’omonto otamanyekaneti.
14Omonto okoboka mambia chuni oaka eriogi gosesenia omogisangio oye, oyio nabarerwe okoragererigwa.
15Omokungu omonyariomana nigo anga buna amatoima ’embura akona‐gotonya.
16Omonto ogotanga omokungu buna oyio, okwo nigo konga ogotangwa kw’omwaga gose okobwata amaguta nokoboko gw’okorio.
17Ekioma nigo kegotieria ekioma kende, naboigo nomonto agotieria omonto onde.
18Omonto okorenda omoko narie okwama kw’omoko oyio, na oyio okorenda omonene oye, oyio nanyore ogosikwa.
19Ekero okorigereria ase amache ime nigo okorora obosio bwao, naboigo nebirengererio bi’enkoro y’omonto bikororekana ase omonto onde.
20Buna aase abakure na embeera bitari goisaneka, naboigo namaiso a mwanyabanto atari goisaneka.
21Buna koreng’ana efeta egoteemerwa ase enyongo ekonyititora, na etahabu ase omorero ekebemberi, naboigo omonto agoteemwa na komanyekana ase ogosikwa kwaye.
22Omonto omoriri nomobekerania ase ekonu ime, omoswageranie amo nobori, oboriri bwaye tibogosira.
23Manya buya chingencho chie ching’ondi ne chimbori chiao, na orende riicho riao buya. 24Obonda tibori kogenderera kobao botambe, na egutwa y’obogambi teri kogenderera kobao ekiaare ase ekiaare. 25Ekero obonyansi obokoro bwasirire, na oboyia nigo bokomera, na ebimeri bi’ebitunwa biasangererigwa, 26ching’ondi nigo chikonachwa amarionya akoroisigwa chianga, ne chimbori chiaoonigwa ase okogora omogondo. 27Erio nonyore amabeere e chimbori agoisaine aye na abanto b’enka yao, boigo nase abasomba bao abaiseke.
Currently Selected:
EMERENG’ANIO 27: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
