EMERENG’ANIO 26
26
1Buna koreng’ana obokendu bogocha ase engaki y’egurugura, gose embura egotwa ase engaki ye rigesa, naboigo ere bobe omonto omoriri konyora amasikani.
2Buna enchiro ekona‐koong’anya, na buna egesingororo gekoiruruka, naboigo na okoragereria gotari nengencho gotaikerere oria oragererigwe.
3Ekeranya nigo kere ase ogoaka ebarasi, na ekeokio ase okoraa etigere, naboigo nenyimbo ere ase ogoaka omogongo bw’omonto omoriri.
4Tobaisa koiraneria omonto omoriri buna oboriri bwaye bore, nigo orabaise koba omoriri buna are.
5Moiranerie omonto omoriri buna oboriri bwaye bore, tabaisa gwekaga ng’a nomong’aini are.
6Omonto ogotoma amang’ana ase okoboko kw’omonto omoriri, oyio nigo akobutora amaboko aye omonyene bwerentera emechando.
7Omoreng’anio ogokwanwa nomonwa bw’omoriri nigo onga buna omonto egesegora, okogoro kwaye gotari gokora emeremo.
8Omonto okoa omoriri amasikani, nigo anga buna oyokoruta omobuko ore nebinto bie rigori rinene ase etui y’amagena.
9Omoreng’anio okorwa ase omonwa bw’omonto omoriri nigo onga buna rigwa rikobeta okoboko kw’omonto otindire amarwa.
10Omonto omanyete emeremo nigo agwekorera emeremo emiya, korende oyore omoriri nigo akorika onde bwensi ogoeta, na emeremo yasareka.
11Omonto omoriri okoiranera gokora oboriri bwaye nigo anga esese ekoiranera amaroki aye enyene.
12Oise korora omonto ogwekora omong’aini, ogosemeria nkore ase omonto omoriri kobua ase oyio.
13Omonto omworo nigo agoteba, “Endo nere isiko, ee, endo nere ase chinchera chi’omochie.”
14Omonto omworo nigo akonakweoncha‐onchora buna egesieri gekona‐koonchorwa ase chimbata gesibeire.
15Omonto omworo nigo akobeka okoboko kwaye ase esani y’endagera, orosa gokobogoria gocha ase omonwa oye.
16Omonto omworo nigo akwerora ng’a nomong’aini are abuete abanto batano na babere barakwane amang’ana are nengencho.
17Omonto orenge goeta na gwesoyia ase eriomana ritarenge eriaye nigo anga buna oyo okobwata amato ’esese.
18-19Omonto okong’aina omonto onde, na nyuma yaye omotebia, “Negosori yoka nare gokora asore,” oyio nigo anga buna ebarimo ekoruta ebigenga bi’omorero, ne chinsara, na amakweri.
20Ase chinko chitari, omorero nigo okorima, naboigo nase omogenki atari, eriomana nigo rigosira.
21Omonyariomana ogoseegeta amariomana nigo anga buna amakara akogenderera koyia, gose chinko chikogera omorero ogenderera gwoka.
22Amang’ana omonto omoitania nigo are buna endagera enyansu egotirimboka gochia ase enda inse.
23Omonto obwate amang’ana amansu ase ebikoba biaye, korende ore nobobe ase enkoro yaye, nigo anga buna egekorero ki’amaroba giatekire keoomire nefeta.
24Omonto omogechi nigo akobisa ase ebikoba biaye, obong’ainereria bore ase enkoro yaye. 25Ekero agokwana amang’ana are amansu, tobaisa komwegena, ekiagera nabwate ay’okogechia atano na abere, ase enkoro yaye ime. 26Naisa gotuba okogecha kwaye nobong’ainereria, obokayayu bwaye goika bomanyekane nomosangererekano bwonsi.
27Omonto okorema eirima, nere omonyene oragwe imeo; na omonto ogoturunkania rigena, nere omonyene rirairanere rimogwere.
28Omonto ore noromeme rogokwana oborimo, nigo akogecha abanto abwo amang’ana aye achandire bobe, na omonwa ogokwana amang’ana ay’okweansia nigo okorenta ogosirigwa.
Currently Selected:
EMERENG’ANIO 26: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
