EMERENG’ANIO 20
20
1Edivai nigo ekorenta echeche, ekenyugwa egetindi nigo gekorenta eriomana; na onde bwensi otari gokianga nigo akoborwa obong’aini.
2Okogosa kw’omoruoti nigo konga buna okoruma kw’endo, na oyo okomogechia oba nendamwamu, oyio nigo akogera obogima bwaye bosirigwe.
3Nigo are amasikani ase omonto ogwetanga korwa ase eriomana, korende kera omonto ore omoriri nigo akona‐kwomana.
4Omonto omworo tari korema ase engaki egwenerete, na ekero rigesa riaikire, nigo akogenda gosuma, takonyora gento.
5Emeroberio ere ase enkoro y’omonto nigo enga buna amache are ase endiba, korende omonto ore nokomanya nigo akoyabucha korwa aroro.
6Abanto abange nigo bakweraria ng’a nabaya bare, korende ning’o oranyare konyora omonto omwegenwa bori?
7Omonto omonyene oboronge obwatetie chinchera chindonge, abana baye mbasesenigwe korwa nyuma yaye.
8Omoruoti ogoikaransa ase ekerogo kiaye gi’ekegambero nigo agoserebania amabe onsi namaiso aye.
9Ning’o oranyare goteba, “Nasibekire ase enkoro yane; nachenekire korwa ase ebibe biane”?
10Ebirengero bi’oborito, na ebi’obonge, bire ara kabere, nigo bire okogechia ase Omonene.
11Nonya nomwana nigo amanyekanete ase ogokora kwaye, gose orogendo rwaye nigo rorabe ororonge na orw’ekeene.
12Ogoto gokoigwa, na eriso rikorora, bionsi bibere n’Omonene obikorete.
13Tobaisa gwancha chitoro, obaise koba omotaka; ramokia amaiso ao, naye nonyore endagera enyinge.
14Omogori egento nigo agoteba: “Eke tigeisaini gento”, na ekero akeirire bwetogia.
15Etahabu nere, na amagena amange e rigori rinene, korende ebikoba bigokwana ay’obong’aini nigo binga buna amagena e rigori rinene akomeka‐meka.
16Ira eanga y’omonto oyo bwerure koba intenenera ase omonto omoao, ira ebi abwate, ekiagera bwerure ase engencho y’omonto otamanyekaneti.
17Endagera ekonyorwa ase enchera y’obong’ainereria, nigo ekoba enyansu ase omonto, korende nyuma yaye omonwa bw’omonto oyio nigo ogoichorwa nomokenye.
18Emeroberio nigo egoikeranigwa goetera ase ogosemia okuya na gokorwana esegi, oyerwanie nogosemania okuya.
19Omonto okona‐goeta‐etia obogenki nigo akoorokia obobisi, ase ayio tobaisa kobwatana nomonto otari kwerita ase amang’ana aye.
20Omonto oraragererie ise, gose ng’ina, oyio etaya yaye nerimigwe ekero ki’omosunte ekerima.
21Oise koba ne ribero ase okonyora omwando bwango korwa omochakano, omoerio oye tori gosesenigwa.
22Tobaisa goteba, “Goika ng’akane amabe nakoreirwe.” Oganye Omonene, nere oragokonye.
23Ebirengo bi’oborito bire ara kabere nigo bire okogechia ase Omonene, na ekerengero gi’okoreng’anania ki’oborimo nigo kere ekebe.
24Omonene nere okoraa chinchera chi’omonto, ase ayio naki omonto aranyare komanya chinchera chiaye?
25Nigo ekoba omoeto ase omonto karabe omwango ase ogwatanana egento kebe egechenu, na nyuma yaye oba okorengereria aya arierete eira.
26Omoruoti ore omong’aini nigo akomanya abakori amabe obaatanana, erio obatiringera inse namagoro e chigari.
27Omoika ore ase omonto, noro etaya y’Omonene; nigo ekomoreka na komanya amang’ana onsi are ime y’enkoro y’omonto.
28Obuya na obwegenwa, nabio bikorenda omoruoti, na ekerogo kiaye ki’obogambi nigo kegokong’igwa namabera.
29Chinguru nachio chire obonene bw’abamura, korende chimbuche nigo chire obwari bw’abanto abagotu.
30Obororo bw’ogoakwa nenyimbo nigo bogosibia ebibe, boigo ogoakwa kw’ebiranya nigo kogosoa ase enkoro ime kwayesibia.
Currently Selected:
EMERENG’ANIO 20: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
