EMERENG’ANIO 21
21
1Enkoro y’omoruoti nigo enga buna orooche rore ase okoboko kw’Omonene; na Omonene nigo akomoraa gochia aande onsi buna aganetie.
2Kera enchera y’omonto nigo ekororekana ng’a neya boronge asare, korende Omonene nigo akorenga chinkoro.
3Ogokora oboronge na ekeene, ayio naro Omonene agwancha kobua ebing’wanso.
4Amaiso are noboenenu, na enkoro y’obomwenu, ebio nigo bire etaya y’abakori amabe, bikobaraa bakora ebibe.
5Emeroberio y’omonto omong’aini nigo ekomorentera ebitoki ebinge, korende omonto okoayerera nigo akogenderera koremerwa.
6Chinibo chikonyorwa ase oromeme rw’obong’ainereria, nigo chire buna omooki okoera bwango, na buna amareba akorenta amakweri.
7Obourereria bw’abakori amabe mbobasirie barueo, ekiagera bangire gokora ayare ay’oboronge.
8Enchera y’omomochi nigo ere enkorekanu, korende ogokora kw’oyore nenkoro endonge nigo kore okoronge.
9Mbuya komenya ase ekenunchi kia irongo, kobua komenya ase enyomba amo nomokungu omonyariomana.
10Omoyo bw’omokori amabe nigo okogania gokora ebibe, na omonto oyio tari kororera omonto onde amabera.
11Ekero omonto omonyacheche akonyora egesusuro, oria otamanyeti amange nigo akoba omong’aini; na ekero omonto omong’aini akworokererigwa nigo akonyora chisemi.
12Omonyene oboronge nigo akorigereria enyomba y’omokori amabe; ere nigo akoiyeria abakori amabe inse basire.
13Omonto oria ogosieka amato aye ng’a taigwa ekerero ki’omotaka, nere ekero ararere takoigugwa.
14Ekeegwa gekoruegwa bobisi nigo kegokendia endamwamu, ne riaaki ribisire ase eanga ime nigo rigokendia ekeririanda.
15Ekero ekeene giakorirwe, ayio nigo akoba omogoko bw’abanyene oboronge, korende ase abakori amabe nomoichano.
16Omonto ogotiga enchera y’obomanyi, oyio nabeere ase omosangererekano bw’abanto bakwete.
17Omonto bwanchete emegoko goika abe omotaka; na oyobwanchete kwegokia nedivai na amaguta takoba omonda.
18Omokori amabe nigo agosoa ase emechando y’omonyene oboronge, oba embooria yaye, na oyo otari omwegenwa oba embooria y’oyore nenkoro endonge.
19Mbuya komenya ase ense y’erooro, kobua komenya nomokungu omonyariomana, naende omonyandamwamu.
20Omonto omong’aini nigo akorenda chinibo chi’engencho enene amo namaguta ase enka yaye, korende omoriri nigo agochiria bobe chiaera.
21Omonto okorigia oboronge na obwororo, oyio nanyore obogima, na amasikani, na oboronge.
22Omonto omong’aini nigo akoumokera omochie ore nabarwani esegi chituoni oyobua, erio otagora chindwaki chiria abanto abwo basemeretie.
23Omonto orendete omonwa oye, na oromeme rwaye, oyio nigo etangerete emechando.
24Omonto ore omoenenu na omwerori, na ogokora kwaye kore okw’obomwenu, nigo akorokwa “Omonyacheche”.
25Okogania kw’omonto omworo nigo gokomoita okwa, ekiagera nigo akwanga gokora emeremo namaboko aye.
26Omonto omong’iti nigo akweganeria kera egento botambe, korende omonyene oboronge nigo akorua na tari kong’itia.
27Ekeng’wanso ki’omokori amabe nigo kere okogechia, Inee, tari bobe mono goetania ekero agokerua nebirengererio ebibe?
28Kirori bw’oborimo nasire, korende omonto ogotegerera nagenderere gokwana.
29Omokori amabe nigo agokong’ia obosio bwaye, korende oyore nenkoro endonge nigo akorenda orogendo rwaye.
30Obong’aini tibori, gose okomanya, gose ogosemia, biranyare koamererania n’Omonene.
31Chibarasi nigo chikobekwa ang’e kogenda korwana esegi, korende obobui nigo bokorua ase Omonene.
Currently Selected:
EMERENG’ANIO 21: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
