EMERENG’ANIO 18
18
1Omonto bweanchete omonyene, nigo akweganeria ayaye oka; nigo akwanga otindia nonya nase onsi ayare amaya.
2Omoriri tari kogokigwa nay’obong’aini, korende nigo anchete gokwana ayare ase enkoro yaye omonyene.
3Ekero omokori amabe agocha, ogochaywa nigo kogocha boigo, na ogochaywa okwo nigo gokorenta obosooku.
4Amang’ana akorua ase omonwa bw’omonto nigo anga buna amache e chindiba, ensoko y’obong’aini nigo enga buna amache ’orooche akominyoka.
5Tari buya gwanchereria omokori amabe na gosaria ekina ki’omonyene oboronge.
6Chinkwana chi’omoriri nigo chikorenta eriomana, na omonwa oye nigo okorangeria ogoakwa.
7Omonwa bw’omoriri nigo okomorentera ogosirigwa, ne chinkwana chiaye nigo chikoba omoeto asare.
8Amang’ana ’omogenki nigo are buna endagera enyansu; naro nigo agotirimboka gochia ase enkoro ime.
9Omonto ogokora emeremo yaye nobworo nigo are oyomwabo omosaria.
10Erieta ri’Omonene nigo rire orwaki orokong’u; omonyene oboronge nigo akorotamera oba orendire buya.
11Omonto omonda nigo akorengereria ng’a obotenenku bwaye nigo bonga buna omochie omokong’u, naende buna orwaki orotambe gochia igoro rokomorenda.
12Oboenenu bw’enkoro y’omonto nigo bogotang’anera ogosirigwa, na oboitongo nigo bogotang’anera ogosikwa.
13Omonto okoiraneria ring’ana atarariigwa buya, obwo noboriri asare, na nigo akonyora obosooku.
14Omoika bw’oboremu nigo okogera omonto oremereria ogochandeka, korende omoika ore nomoichano ning’o orayoremererie.
15Enkoro y’omonto omong’aini nigo ekonyora chisemi, na ogoto kwaye nigo kogochirigia.
16Ebiegwa bi’omonto nigo bikomoigorera enchera na komobeka amo nabanto abanene.
17Omonto gekwaneire ritang’ani nigo akororekana ng’a nekeene agokwana, korende omonto omoao gachire, nigo akoorokia amang’ana ayio buna are.
18Obomera nabwo bogokoora okoamererania na gwatanana abanene abwo bakoamererania.
19Nigo ere aakong’u koirania ase obosani omonto omocheirwe, kobua koirania omochie omokong’u, na eriomana nigo ringa buna emekorogoto y’ebiita bi’orwaki orokong’u.
20Omonto nigo agoisanekia enda yaye nogokwana kw’omonwa oye, akoigotigwa nokwama kw’omonwa oye.
21Amakweri na obogima nigo bire ase chinguru chi’oromeme, na abwo banchete korokorera emeremo mbanyore okwama kwaye.
22Omonto onyorire omokungu omuya, oyio onyorire ekeegwa ekiya na ay’ogwancherwa korwa ase Omonene.
23Ekero omonto omotaka agokwana nigo agosorora, korende omonda nigo akoiraneria ase obotindi.
24Omonto obwate abasani abange nigo akwerentera emechando, korende nare omosani bw’ekeene baigwanaine kobua oyomwabo.
Currently Selected:
EMERENG’ANIO 18: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
