EMERENG’ANIO 17
17
1Nigo ere buya konyora ritonge eriomo ri’obokima na koba nobotoereru kobua kobeera ase enyomba eichire endagera y’omoyega ere neriomana.
2Omosomba omong’aini nagambere omwana bw’omonene oye, oyio ogokora amang’ana ’obosooku, naende naatananerwe omwando amo nabana b’omonene oye.
3Efeta nigo egoteemerwa ase enyongo ekoyenyititora, na etahabu yateemerwa ase omorero ekebemberi, korende Omonene nere okorenga chinkoro.
4Omokori amabe nigo agotegerera oigwera amang’ana ’obokorekanu, na omonyaborimo nigo akoigwera chinkwana chi’ogosiria.
5Omonto ogochecheria omotaka nigo agochaya Omotongi bw’omotaka oyio, na oyokogokera emechando yanyorire abande, takomocha konyora egesusuro.
6Abachokoro nigo bare egutwa ye chisokoro chiabo, na obonene bw’abana nigo bore abaibori babo.
7Amang’ana amaya tagwenereti omoriri, ne chinkwana chi’oborimo tichigwenereti omogambi nonya ng’ake.
8Riaaki nigo ringa buna rigena rikomeka‐meka ase amaiso ’omonto oria okoriegwa, ekiagera nigo akorengereria ng’a kende gionsi ararikorere nigo riramorentere ebisio.
9Omonto okwabera aya akomocherwa nigo akorigia obwanchani, korende oria okona‐koinyora nigo agosarania abasani.
10Omonto ore nobomanyi nigo akweorokereria korwa ase ogotogonyerwa okomo, kobua omonto omoriri otari kweorokereria korwa ase ogoakwa ebiranya rigana erimo.
11Omonto omosaria nigo akonakorigia gokora amabe oka, natomerwe omonto omotindi amoe egesusuro.
12Mbuya omonto aumerane neng’iti entindi ekorokwa edubu yaurirwe chimanwa chiaye, kobua koumerana nomonto omoriri ase oboriri bwaye.
13Omonto ogoakana amabe ase amaya, obobe tibokorua ase enyomba yaye.
14Ogochaka eriomana nigo konga buna amache aigoreirwe, ase ayio tiga amang’ana ’eriomana atarabucha.
15Omonto ogwanchera omokori amabe ng’a nomonyakeene, na oria okonachera omonyakeene ekina, abwo bonsi nigo bare okogechia ase Omonene.
16Inee! Chibesa omonto omoriri abwate ase okoboko kwaye agochia kogora obong’aini nechia ki, na ere tari nokomanya?
17Omosani nigo akoba nobwanchani ase chingaki chionsi, na oyomino nigo aiboire akonye ase engaki y’emechando.
18Omonto oremeire chisemi nigo akobwatana amaboko na kwerua koba intenenera ase omonto onde.
19Omonto bwanchete eriomana nigo anchete ogosaria, na oyokoimokereria egesieri kiaye igoro nigo akwerigeria ogosirigwa.
20Omonto ore omokorekanu ase enkoro yaye tari goseseneka, na oyobwate oromeme rw’ogosiria nigo akonyorwa nemechando.
21Oyo oiboire omwana omoriri nigo akoba nomoichano, na ise omwana oyio tari koba nomogoko.
22Enkoro ere nomogoko nigo ekogwenia buna eriogo, korende omoichano ore ase enkoro nigo okwomia emeseto y’amauga.
23Omokori amabe nigo akoegwa riaaki bobisi, erinde asarie chinchera chi’ekina.
24Omonto ore nokomanya nigo akorigereria gochia ase obong’aini, korende omonto omoriri nigo akorigereria gochia ase chinsinyo chi’ense.
25Omwana omomura omoriri nigo agoichania ise, naende nigo akorenta obororo ase ngina omoiborete.
26Tari buya korua egesusuro ase omonto omoronge, boigo tari buya goaka abanto abasike ase engencho y’oboronge bwabo.
27Omonto omong’aini nigo akwerita ase amang’ana agokwana, na omonto ore nokomanya nigo abwate omoika bw’oboremereria. 28Nonya nomonto omoriri, ekero agokira, nigo akobarwa ng’a nomong’aini are; gakomumeka omonwa oye nigo akorokwa omong’aini.
Currently Selected:
EMERENG’ANIO 17: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
