EMERENG’ANIO 16
16
1Mwanyabanto nigo agokora emeroberio ase enkoro yaye, korende aya oromeme rokoiraneria nigo akorwa ase Omonene.
2Chinchera chionsi chi’omonto nigo chikororekana asare omonyene ng’a neching’ikeranu, korende Omonene nigo akorenga omoika o mwanyabanto.
3Motweke Omonene emeremo yao, na emeroberio yao nesesenigwe.
4Omonene okorire kera egento ase engencho gete, nonya nabakori amabe ase engencho ye rituko ri’emechando.
5Kera omonto ore omoenenu nigo are okogechia ase Omonene; omonto oyio goika aegwe egesusuro.
6Ase amabera, na obwegenwa, embooria yaakanirwe ase engencho y’ebibe, na ase okomoiroka Omonene omonto nigo akweatanana korwa ase amabe.
7Ekero chinchera chi’omonto chiagokirie Omonene, Omonene nigo agokora nonya nababisa b’omonto oyio babwatana nere.
8Mbuya koba nebinto ebike amo noboronge kobua koba ne chinibo chinyinge chikonyorwa ase oborianania.
9Ase enkoro yaye ime omonto nigo akoroberia chinchera chiaye, korende Omonene nere okoraa amatambokero aye.
10Chinkwana chinchenu nchigwenerete koba ase ebikoba bi’omoruoti, na omonwa oye tomocha ekero akonacha ebina.
11Ekerengero ki’oborito gi’ekeene nigo gekorwa ase Omonene, na ebirengero bionsi bire ase chisaro nigo bire ogokora kwaye.
12Ekero abaruoti bagokora amabe nigo bakorenta ay’okogechia, ekiagera goetera ase oboronge ekerogo ki’obogambi nigo kegokong’igwa.
13Amang’ana amaronge agokwanwa nigo akogokia omoruoti, nere nigo abanchete abwo bagokwana ay’oboronge.
14Endamwamu y’omoruoti nigo enga buna abatomwa bakorenta amakweri, korende omonto omong’aini nigo akoyekanya.
15Omosasoko ore ase obosio bw’omoruoti nigo ore obogima, na ogwancherwa kwaye nigo konga buna amare agotwa embura y’okwamia endagera.
16Konyora obong’aini, ayio namaya kobua konyora etahabu, na okoba nobomanyi nigo kogwenerete kobua koba nefeta.
17Ogweatanana korwa ase amabe, eyio nero enchera enene y’abanyene oboronge; na omonto orendete enchera yaye, nigo arendete obogima bwaye.
18Oboenenu nigo bogotang’anera ogosirigwa, na omoika bw’obomwenu nigo ogotang’anera okogwa.
19Nigo ere buya koba nomoyo bw’oboitongo na komenya amo nabataka kobua gwatanana ebisakorwa amo nabaenenu.
20Omonto okoigwera Ring’ana nanyore amaya, na oyo okomosemeria Omonene nasesenirie.
21Omonto ore omong’aini ase enkoro yaye narokwe omomanyi, ne chinkwana chingiya nigo chikomenta chisemi.
22Obong’aini nigo bore ensoko y’obogima ase omong’aini, korende oboriri nigo bore egesusuro ase oboriri.
23Enkoro y’omonto omong’aini nigo ekworokereria omonwa oye ong’aiinie, naende yamenta chisemi ase ebikoba biaye.
24Amang’ana akogokia nigo anga obooke bokorwa ase richoe, nigo are amansu ase omoyo naende nigo akogwenia omobere.
25Enchera nere ekororekana ase omonto ng’a nendonge, korende omoerio bw’enchera eyio namakweri.
26Okogania kw’omonto nigo gokomobetereria gokora emeremo, ekiagera nigo aganetie gweisanekia ere omonyene.
27Omonto otagwenereti kende nigo akona‐koremora amabe, ne chinkwana chiaye nigo chinga omorero ogosamba.
28Omonto omonyaborimo nigo akona‐gotaara‐taaria amang’ana akorenta eriomana, na omogenki nigo akorenta obobisa ase abanto banchaine.
29Omonto omotindi nigo akoebereria omonto onde omoraa gochia ase enchera embe.
30Omonto ogosimera ebioge bi’amaiso aye nigo akoroberia amabe, na oyo ogotakuna omonwa oye nigo agoikerania amabe.
31Chimbuche chire ase omotwe negutwa y’obonene, eyio nigo ekonyorekana ase enchera y’oboronge.
32Omonto otari omwango ase okogechigwa nigo abuete omorwani etuoni, na oyomanyete kogambera enkoro yaye nigo abuete oyo okobua omochie na koyoira.
33Obomera nigo bokorutwa ase esaro ime, korende Omonene nere ogochora oyo bokogwera.
Currently Selected:
EMERENG’ANIO 16: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
