EMERENG’ANIO 15
15
1Okoiraneria kw’obwororo nigo kogokendia endamwamu, korende amang’ana ’obotindi nigo agoseegeta endamwamu.
2Oromeme rw’omonto omong’aini nigo rogokwana aye chisemi chingiya, korende emenwa y’abariri nigo ekoumora ay’oboriri.
3Amaiso ’Omonene nigo aroche ande onsi, nigo arigereretie ababe amo nabaya.
4Oromeme rw’obokanyeku nigo rore omote bw’obogima, korende orw’obokorekanu nigo rogotandora enkoro.
5Omoriri nigo agochaya amorokererio a ise akomorongeyia, korende oyokoigwera ogokurerwa nigo akong’ainia.
6Enyomba y’omonyene oboronge nigo ere enene, korende ebitoki bi’abakori amabe nigo biichire nemechando.
7Ebikoba bi’abang’aini nigo bikoraria chisemi, korende chinkoro chi’abariri tichiri gokora bo.
8Ekeng’wanso ki’abakori amabe nigo kere okogechia ase Omonene, korende ogosaba kw’abare ne chinkoro chindonge nigo gokomogokia.
9Enchera y’omokori amabe nigo ere okogechia ase Omonene, korende nigo anchete oyo okobwatia oboronge.
10Egesusuro ekenene nkemonyore oyotigire enchera y’oboronge, na oyo ogechete ogokurerwa goika akwe.
11Aase abakure ne chioora chi’obosiru nigo bire maiso marore ase Omonene. Inee! Tari mono kobua chinkoro chia mwanyabanto?
12Omonyacheche tancheti omonto okomokurera, tagwancha kogenda ase abang’aini.
13Enkoro ere nomosasoko nigo ekorenta omogoko ase obosio, korende onye enkoro ere nomoichano, omoyo nigo okoba nobororo.
14Enkoro y’omonto ore nokomanya nigo ekorigia chisemi, korende emenwa y’abariri nigo ekwerageria oboriri.
15Amatuko onsi ay’omonto ochandegete nigo are amabe, korende oyore nenkoro y’omosasoko nigo akogenderera koba nomoyega o botambe.
16Mbuya koba nebinto ebike amo nokomoiroka Omonene, kobua koba ne chinibo chinyinge amo nemechando.
17Mbuya koria chinyeni more nobwanchani, kobua koria chinyama chie chiombe chinoru na mogechaine.
18Omonto ore nenkoro ekoberoroka bwango nigo agoseegeta eriomana, korende oyore omwororo nigo agokanya eriomana.
19Enchera y’omonto omworo nigo enga buna orobago rw’amagwa, korende ey’abanyene oboronge nigo ere enene erongeete.
20Omwana omong’aini nigo akogokia ise, korende oyore omoriri nigo agochaya ng’ina.
21Oboriri nigo bore omogoko ase omonto otabwati okomanya, korende omonto omong’aini nigo akobwatia chinchera chi’oboronge.
22Ase ogosemania gotari, emeroberio nigo egosareka, korende ase abaesmia abange abaya bare nigo egokinigwa.
23Omonto nigo akogokera okoiraneria okuya gokorua ase omonwa oye, ne ring’ana rigokwanwa ase engaki egwenerete, nigo rire rigiya mono.
24Enchera y’omonto omong’aini nigo egotiira gochia ase obogima, erinde omonto oyio tabaisa kogenda inse agwo aase abakure.
25Omonene nigo agotagora enyomba y’omonto omoenenu, korende arenda chimbebe chi’omoboraka.
26Ebirengererio ebibe nigo bire okogechia ase Omonene, korende amang’ana amaya nigo akomogokia.
27Omonto ore ne ribero ase okorigia ebitoki ase enchera etari endonge nigo akorenta emechando ase enyomba yaye, korende oyo ogechete riaaki nabe moyo.
28Enkoro y’omonyene oboronge nigo ekorengereria aya ekoiraneria, korende emenwa y’abakori amabe nigo ekoumora ayare amabe.
29Omonene nigo are aare korwa ase abakori amabe, korende nigo akoigwa ogosaba kw’abanyene oboronge.
30Amaiso are nomosasoko nigo akogokia enkoro, na amang’ana amaya akorentwa nigo akogokia amauga.
31Omonto ogotegerera na koigwera ogokurerwa gokorenta obogima namenye amo nabanto abang’aini.
32Omonto okwanga ogokurera, oyio nigo agochaya obogima bwaye omonyene, korende oyokoigwera ogokurerwa nigo akoba nokomanya.
33Okomoiroka Omonene, nakwo amorokererio akorenta obong’aini, na oboitongo nigo bogotang’anera ogosikwa.
Currently Selected:
EMERENG’ANIO 15: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
