EMERENG’ANIO 14
14
1Omokungu omong’aini nigo akoagacha mwaye, korende oyore omoriri nigo agotagora mwaye na maboko aye.
2Omonto omoirogete Omonene nigo akobwatia enchera y’oboronge, korende oyo omochayete nigo are omokorekanu ase chinchera chiaye.
3Aya omoriri agokwana nigo are enyimbo y’oboenenu, korende aya abang’aini bagokwana nigo akobarenda.
4Ase chiombe chi’okorema chitari, ebiage nigo bikoba bosa, korende ase chinguru chie chiombe chire, endagera enyinge nigo ekonyorekana.
5Kirori ore omwegenwa tari gokwana oborimo, korende oyotari omwegenwa nigo agokwana oborimo bwoka.
6Omonto ore omochecheria narigia obong’aini, takobonyora, korende chisemi nigo chikonyorekana ase omonto ore omwango ase okomanya.
7Karue ase omonto omoriri, ekiagera tokonyora obong’aini korwa ase aya agokwana.
8Obong’aini bw’omonto ore nokomanya nigo bokomokonya omanya buna chinchera chiaye chire, korende oboriri bw’abanto abariri nigo bokobang’aina.
9Abanto abariri nigo bagokora echeche nebibe, korende abanyene oboronge nigo bagwancherana barabwo ase barabwo.
10Enkoro enyene nigo emanyete obororo bwaye, na omonto omoao takonyara gwatanerwa omogoko bw’enkoro eyio.
11Enyomba y’omokori amabe nesirigwe, korende ekegutu ki’omonyene oboronge nkegenderere gosesenigwa.
12Enchera nere ekororekana ase omonto ng’a nendonge, korende omoerio bw’enchera eyio namakweri.
13Nonya omonto ogoseka, enkoro yaye nabo eranyare koba nomoichano, na omoerio bw’omogoko oyio nobororo.
14Omonto ogure korwa ase okwegena kwaye, nabo araisaneke nokwama gwe chinchera chiaye, na omonto omuya nigo agoisaneka ase omoyo oye.
15Oyotamanyeti amange nigo akwegena kera ring’ana, korende oyomanyete nigo akorigereria aase agochia.
16Omonto omong’aini nigo akwoboa na kwerenda korwa ase amabe, korende omoriri nigo akoba omoremu ase ogokora amabe.
17Omonto okogechigwa bwango nigo agokora ay’oboriri, na omonto okoroberia ay’obobe nigo akogechwa.
18Abatamanyeti amange, oboriri nigo bokoba omwando obo, korende abare nokomanya nigo bakoegwa chisemi chiaba egutwa yabo.
19Abanto ababe goika bekumbe ase amasio ’abanto abaya, na abakori amabe bekumbe ase ebiita bi’abanyene oboronge.
20Omonto omotaka nigo agechire nonya nase abanto bamwabo, korende omonda nigo abwate abasani abange.
21Omonto ogochaya omonto onde nigo agokora ebibe, korende oyokororera abachandegete amabera nasesenigwe.
22Inee! Abwo bakoroberia ayare amabe tibari gosira? Na abwo bakoroberia amaya, Inee, tibari konyora amabera na ekeene?
23Ebitoki nigo bikonyorekana korwa ase emeremo ende yonsi, korende ogokwana amang’ana amasa, okwo nigo gokorenta okoremerwa.
24Obonda nigo bore egutwa y’abanto abang’aini, korende oboriri bw’abanto abariri nigo bore oboriri bwoka.
25Kirori ogokwana ekeene nigo agotooria obogima, korende oyogokwana oborimo nigo are omosigaani.
26Oyo okomoiroka Omonene nigo are nogosemeria gw’okorendwa bokong’u, na abana baye mbanyore aase bagotamera.
27Okomoiroka Omonene nakwo ensoko y’obogima eragere omonto eatanane korwa ase amareba ’amakweri.
28Obonge bw’abanto nabwo bore obonene bw’omoruoti, korende ase abanto bare abake omogambi obo nigo agosirigwa.
29Omonto otari kogechigwa bwango nigo abwate okomanya okonene, korende oyo okoberoroka bwango nigo agokinia oboriri bwaye.
30Enkoro y’omogoko nigo ere obogima bw’omobere, korende ribero nigo rire obogundo bw’amauga.
31Omonto ogokorera omotaka bore nigo agochaya Omotongi bw’omotaka oyio, korende oyore omwororo ase oria oremeire nigo asigete Omotongi.
32Omokori amabe nigo agotugutwa riarua ase engencho y’ogokora kwaye okobe, korende omonyene oboronge nigo agokwa ore nogosemeria.
33Obong’aini nigo bomenyete ase enkoro y’omonto ore nokomanya, korende ase enkoro y’omoriri nigo bwemanyekanetie obonyene.
34Oboronge nigo bogokinia egesaku, korende ebibe nigo bire obosooku ase abanto bande bonsi.
35Omosomba ogokora emeremo nobong’aini nigo agwancherwa nomoruoti, korende endamwamu y’omoruoti nigo ekoba igoro ase oria okomorentera obosooku.
Currently Selected:
EMERENG’ANIO 14: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
