EMERENG’ANIO 13
13
1Omwana omong’aini nigo akoigwera amorokererio a ise, korende oyore omochayi tari gwancha ogokurerwa.
2Okwama kw’amang’ana omonto agokwana nigo gokomorentera amaya, korende okogania kw’abatari abegenwa nigo kore okw’obotindi.
3Omonto orendete omonwa oye, oyio nigo arendete obogima bwaye, korende oyogokwana amang’ana ateriteti, goika asirigwe.
4Omonto omworo nigo are omosaneri, korende takonyora kende, korende oyore nomokia nigo agoisanekigwa.
5Omonyene oboronge nigo agechete oborimo, korende omokori amabe nigo agokora ay’okogechia na ay’obosooku.
6Oboronge nigo bokorenda oyore norogendo ororonge, korende ebibe nigo bikomosiria omokori amabe.
7Omonto nare ogwekora ng’a nomonda are, korende nigo are omotaka, na oyonde bwekora ng’a nomotaka are, korende nigo are omonda mono.
8Embooria y’obogima bw’omonto omonda nechinibo chiaye, korende omonto omotaka tari kogoswa nonde.
9Oborabu bw’abanyene oboronge nigo bokomoreka nomogoko, korende etaya y’abakori amabe nerime.
10Oboenenu nigo bokorenta okoamererania, korende baria bakoigwera ogosemigwa nigo bakoba nobong’aini.
11Enibo enyorire ase obwango ase enchera y’obobe nigo egosira, korende ey’ekonyorekana ase okoyekorera emeremo nementekane.
12Egesemeirie kogiatebanire nigo gekogera enkoro yarwara, korende ogosemeria kogwaikeranigwe nigo kore omote bw’obogima.
13Omonto ogochaya Ring’ana nigo arasirigwe narirorio, korende oyokoiroka ogochika nanyore eng’eria y’obuya.
14Amorokererio ’omonto omong’aini nigo are ensoko y’obogima, ekiagera nigo agokonya omonto tabwatwa noboreba bw’amakweri.
15Okomanya okuya nigo gokorenta ogwancherwa, korende enchera y’abatari abegenwa nigo ekoraa gochia ase obosiru.
16Omonto omong’aini nigo agokora emeremo yaye ne chisemi, korende omonto omoriri nigo akoraria oboriri bwaye.
17Omotomwa otari omwegenwa nigo akogwa ase emechando, korende oyore omwegenwa nigo akogwenia.
18Omonto okwanga koigwera amorokererio akomorongeyia, obotaka na obosooku nigo biramonyore, korende oyokoigwera ogokurerwa nanyore amasikani.
19Okogania gwaikeranigwe nigo kore ogwansu ase omoyo, korende okoonchoka gotiga amabe, okwo nigo kore okogechigwa ase abariri.
20Omonto ogotaara nabanto abang’aini nigo arabe omong’aini, korende oyo ogosanga nabariri nanyorwe namabe.
21Amang’ana amabe nigo agotunyana abanyene ebibe, korende abanyene oboronge nabaegwe amaya.
22Omonto omuya nigo agotiga omwando ase abana baye, na ase abachokoro baye, korende obotenenku bw’abanyene ebibe nigo bogacheire abanyene oboronge.
23Oboremo oboyia bw’omonto omotaka nigo bokwama endagera enyinge, korende enyinge nigo egosiara‐siarerwa yasira ase engencho y’obobe.
24Omonto okorina omwana oye ekeranya nigo amogechete, korende oyo omwanchete tari gotebana okomorongeyia.
25Omonyene oboronge nigo abwate endagera ekomoisanekia, korende enda y’omokori amabe nigo ekogenderera kogania.
Currently Selected:
EMERENG’ANIO 13: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
