EMERENG’ANIO 12
12
1Onde bwensi bwanchete amorokererio akomorongeyia, oyio nigo anchete chisemi, korende oyo ogechete ogokurerwa tabwati ebirengererio.
2Omonto omuya nigo akonyora ogwancherwa korwa ase Omonene, korende oyogokora emeroberio y’obobe nigo akonacherwa ekina n’Omonene.
3Ogotamoiroka Nyasae tigokoagacha omonto na komokong’ia, korende omori bw’omonyaboronge tokonyegerigwa.
4Omokungu omuya nigo are egutwa y’omosacha oye, korende omokungu okorenta obosooku nigo are buna obogundo ase amauga ’omosacha oye.
5Ebirengererio bi’omonyene oboronge nigo bire ebi’ekeene, korende ogosemia kw’abakori amabe nigo kore okw’obong’ainereria.
6Amang’ana abakori amabe nigo akoboera na goitera amanyinga, korende aya abanyene oboronge bagokwana nigo agotooria abanto.
7Abakori amabe nigo bagosirigwa, tibakobao naende, korende enyomba y’omonyene oboronge netenene bokong’u.
8Omonto nigo agotogigwa buna obong’aini bwaye bore, korende oyore nebirengererio ebikorekanu nigo agochaywa.
9Omonto omoitongo ogwekorera emeremo yaye omonyene nigo are omuya kobua omonto ogwekora koba omonene, korende tabwati endagera.
10Omonyene oboronge nigo agochandekera obogima bwe chitugo chiaye, korende enkoro y’omokori amabe nigo ere entindi.
11Omonto ogokora emeremo ase omogondo oye nanyore endagera enyinge, korende oyo okobwatia amang’ana atagwenereti, oyio tamanyeti kende.
12Omokori amabe nigo akogania ebionga bi’abanto ababe, korende omori bw’omonyene oboronge nigo ogoseboka bwama.
13Omonto omobe nigo agotegwa nogosaria gokorwa ase ebikoba biaye, korende omonyene oboronge natooreke korwa ase emechando.
14Okwama kw’amang’ana omonto agokwana nigo gokomorentera amaya akomoisanekia, na emeremo y’amaboko ’omonto nigo ekomoiranera.
15Enchera y’omonto omoriri nigo ekororekana ase amaiso aye ng’a nendonge, korende omonto omong’aini nigo akoigwera ogosemigwa.
16Okobeea kw’omonto omoriri nigo gokomanyekana rimo rioka, korende omonto omong’aini nigo akoombia otuba obobe.
17Omonto bwanchete gokwana ekeene nigo akoorokia oboronge, korende kirori bw’oborimo nigo agokwana ay’obong’ainereria.
18Omonto nare otari korengereria aya agokwana, na amang’ana aye nigo anga buna omoro ogokeba, korende oromeme rw’omonto omong’aini nigo rokorenta amang’ana akogwenia.
19Ebikoba bigokwana ekeene mbigenderere kobao botambe, korende oromeme rogokwana oborimo nigo rokobao ase engaki enke yoka.
20Obong’ainereria nigo bore ase chinkoro chi’abwo bakoroberia amabe, korende abwo bakoroberia ay’omorembe nigo bakogera omogoko oba.
21Amabe takobanyora abanyene oboronge, korende abakori amabe mbanyorwe namabe amange.
22Ebikoba bigokwana oborimo nigo bire okogechia ase Omonene, korende abare abegenwa ase ogokora kwabo nigo bakomogokia.
23Omonto omong’aini nigo akobisa aya amanyete, korende abariri nigo bakoraria oboriri korwa ase chinkoro chiabo.
24Okoboko kw’omonto omonyamokia nkogambe, korende oyore omworo nabetererigwe akore emeremo emekong’u.
25Ogoichana kore ase enkoro y’omonto nigo gokomoiyeria, korende ring’ana rigiya nigo rikomorentera omogoko.
26Omonyene oboronge nigo are omoraai omuya bw’omogisangio oye, korende chinchera chi’abakori amabe nigo chikobatang’ana chiabasiria.
27Omonto omworo tari koiyeka nonya neki arusirie ase orotwari, korende omokia nigo ore enibo ere nengencho enene ase omonto.
28Ase enchera y’oboronge obogima mboreo, na amakweri tari ase enchera eyio.
Currently Selected:
EMERENG’ANIO 12: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
