EMERENG’ANIO 11
11
1Ekerengero ki’oborito ki’obong’ainereria nigo kere okogechia ase Omonene, korende egi’ekeene nigo gekomogokia.
2Ekero oboenenu bwachire, nobosooku nario bogocha, korende obong’aini nigo bokonyorekana ase abanto abaitongo.
3Obwegenwa bw’abanyene oboronge nigo bokobaraa, korende obokorekanu bw’abatari abegenwa nigo bokobasiria.
4Chinibo tichiri gokonya kende ase rituko ri’endamwamu, korende oboronge nigo boratoorie korwa ase amakweri.
5Oboronge bw’omonto omoikeranu nigo borarongeyie chinchera chiaye, korende omokori amabe, obobe bwaye mbomoiyerie.
6Oboronge bw’abanto bare ne chinkoro chindonge mbobatoorie, korende abasaria nigo barabwatwe nokogania kwabo okobe.
7Ekero omokori amabe agokwa, ogosemeria kwaye nigo kogokwa amo nere, ee, aya abwo batamoirogeti Nyasae basemeretie nigo agosira.
8Omonyene oboronge nigo akorusigwa ase emechando, erio omokori amabe osoa ase emechando ribaga riaye.
9Oyo otamoirogeti Nyasae nigo agosiria abanto bande namang’ana agokwana korwa ase omonwa oye, korende goetera ase obong’aini abanyene oboronge mbatoorigwe.
10Ekero abanyene oboronge bagendererete koba buya, abanto b’omochie nigo bakogoka, na ekero abakori amabe bagosira nigo bagoaka amariogi ’omochengo.
11Goetera ase ogosesenia kw’abanyene oboronge omochie nigo okoimokererigwa igoro, korende goetera ase chinkwana chi’abakori amabe nigo okoiyerigwa.
12Omonto ogochaya omonto onde, oyio nigo aborire obong’aini, korende omonto omong’aini nigo agokira‐kiri.
13Omonto okona‐goeta‐etia obogenki nigo akoorokia obobisi, korende oyobwate omoika bw’obwegenwa tari koorokia obobisi.
14Ase ogosemia okuya gotari, egesaku nigo gekogwa, korende ase abasemia abange abaya bare, oborendi obuya mboreo.
15Omonto okwerua koba intenenera ase omonto omoao nigo agwesoyia ase emechando, korende oyo okwanga koba intenenera nigo erendete buya.
16Omokungu omwesiki nigo akogenderera gosikwa botambe, korende abanto abaurereria abatindi nigo bakonyora chinibo ase chinguru.
17Omonto ore namabera nigo akwerentera amaya, korende omonto omotindi nigo agwechanda ere omonyene.
18Omokori amabe nigo akwenyorera eng’eria y’obong’ainereria, korende oyo ogosimeka oboronge nigo akwenyorera eng’eria y’ekeene.
19Omonto ore omwegenwa ase oboronge bwaye nabe moyo, korende oyo okorigia obobe na kobobwatia nakwe.
20Abanto abakorekanu ase chinkoro chiabo nigo bare okogechia ase Omonene, korende abare norogendo ororonge nigo bakomogokia.
21Ekeene, Omonto omobe goika anyore egesusuro, korende oroiboro rw’abanyene oboronge ndotoorigwe.
22Omokungu omonyakieni tari na semi nigo anga buna ebonyi y’etahabu ere ase chimioro chi’embeche.
23Okogania kw’abanyene oboronge nigo gokorenta amaya, korende okw’abakori amabe nigo gokobarentera egesusuro.
24Nare omonto okorua ebinto ebinge, ere nigo akomenteranigwa ebinge goetania, na nare oyonde ore omogoko otari korua, ere nigo akogenderera kona‐koremerwa.
25Omonto okorua nomoyo bw’ogwancha natenenkigwe; nere oyokorua amache agokendia erang’o, nere naegwe amache agokendia erang’o yaye.
26Omonto oria okwegachera endagera ase obong’iti, nigo akoragererigwa nabanto, korende ogosesenigwa nigo kore igoro ase omotwe bw’oria okoyeoonia.
27Omonto ogokora omokia korigia ayare amaya, oyio nigo akonyora ayare amaya, korende oyokorigia ay’obobe, obobe nigo bokomonyora.
28Omonto osemeretie chinibo chiaye nigo aragwe, korende abanyene oboronge mbareerete buna amato ’emete.
29Omonto okorenta emechando ase enyomba yaye nigo aranyore ayare buna embeo bosa; oyore omoriri nigo arabe omosomba bw’omonto ore nenkoro y’obong’aini.
30Okwama kw’omonyaboronge nigo kore omote bw’obogima, na omonto omong’aini nigo akong’usa emioyo y’abanto obakonya.
31Onye omonyene oboronge okonyora eng’eria yaye aiga ase ense, Inee, omokori amabe na omonyabibe, abwo tibakoegwa eng’eria yabo goetania?
Currently Selected:
EMERENG’ANIO 11: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
