EMERENG’ANIO 10
10
Emereng’anio ya Sulemani
1Eye nemereng’anio ya Sulemani.
Omwana omomura omong’aini nigo akogokia ise, korende oyore omoriri nigo akorentera ng’ina omoichano.
2Chinibo chi’ogokora okobe tichiri gokonya kende, korende oboronge nigo bogotooria korwa ase amakweri.
3Omonene tari gotiga omonyene oboronge abe nenchara; korende nigo akwanga okogania kw’abakori amabe.
4Omonto ogokora emeremo namaboko amoro nigo akoba omotaka, korende amaboko are nomokia nigo akorenta obotenenku.
5Omwana omomura ogosangereria chindagera engaki ye rigesa nigo are omong’aini, korende oyo okorara engaki eyio nigo akorenta obosooku.
6Ogosesenigwa nigo gokobeera ase omotwe bw’omonyene oboronge, korende obochege nigo boichire ase emenwa y’abakori amabe.
7Okoinyorwa kw’omonyene oboronge nigo gokorenta ogosesenigwa, korende erieta ri’omokori amabe nigo riragunde.
8Omonto ore omong’aini ase enkoro yaye nigo anchete amachiko, korende oyogokwana amang’ana atagwenereti nigo arasirigwe,
9Omonto okobwatia chinchera chi’oboronge nigo ararendwe buya, korende oyo okobwatia chinchera chimbe nigo aramanyekane.
10Omonto ogosimera amaiso ase okogenka nigo akorenta emechando, na oyogokwana amang’ana atagwenereti nigo arasirigwe.
11Omonwa bw’omonyene oboronge nigo onga buna ensoko y’obogima, korende obochege nigo boichire ase emenwa y’abakori amabe.
12Obogechi nigo bokorenta eriomana, korende obwanchani nigo bogotuba ebibe bionsi.
13Obong’aini nigo bokonyorekana ase omonwa bw’omonto omomanyi, korende oyo otari nokomanya nigo agwenerete aakwe enyimbo ase omogongo oye.
14Abanto abang’aini nigo bakogacha chisemi, korende omonwa bw’omonto omoriri nigo okorenta ogosirigwa ang’e.
15Obotenenku bw’omonto omonda nigo bore asare buna omochie ogiteire chindwaki, korende obotaka nabwo ogosirigwa kw’abataka.
16Ogokora kw’omonyene oboronge nigo gokomoraa gochia ase obogima, korende okonyora kw’omokori amabe nigo gokomoraa gochia ase ebibe.
17Omonto okoigwera ogokurerwa nigo abwatetie enchera egochia ase obogima, korende oyo okwanga koigwera ogokurerwa nigo agosira.
18Omonto obisete okogecha ime yaye nigo agokwana oborimo korwa ase omonwa oye, na oyo ogotaaria obogenki nigo are omoriri.
19Omonto ogokwana amang’ana amange tari komocha korenta ogosaria, korende oyo orendete omonwa oye nigo are omong’aini.
20Oromeme rw’omonyene oboronge nigo ronga buna efeta echorire korende ebirengererio bi’omokori amabe tibigwenereti kende.
21Ebikoba bi’omonyene oboronge nigo bikorenta amaya ase abanto abange, korende abariri nigo bagokwa, ekiagera baborirwe okomanya.
22Ogosesenigwa kw’Omonene nigo gokorenta obotenenku, na ere tari komenta obororo ase ogosesenigwa okwo.
23Omonto omoriri nigo agokora ebibe buna egosori, korende omonto ore nokomanya nigo agokora ayare ay’obong’aini.
24Aya omokori amabe airogete namochere, korende aya omonyene oboronge aganetie naikeranigwe.
25Ekero omwaga ekembugu‐mbugu egoeta, omokori amabe nigo agosira, korende omonyene oboronge nigo are oboroso boteneine bokong’u kare na kare.
26Buna obokang’iti bokoba ase amaino na erioki rikoba ase amaiso, naboigo omonto omworo akoba ase abwo bakomotoma abakorere emeremo.
27Okomoiroka Omonene nigo gokomenta amatuko amange ase obogima, korende emiaka y’omokori amabe nigo erakeeigwe.
28Ogosemeria kw’abanyene oboronge nigo koraikeranigwe ase omogoko, korende okw’abakori amabe nigo korasire.
29Enchera y’Omonene nigo ere egekengero egekong’u ase abanyene oboronge, korende nigo erasirie abagokora ebibe.
30Omonyene oboronge takonyegerigwa, korende omokori amabe takogenderera komenya ase ense.
31Omonwa bw’omonyene oboronge nigo ogokwana ay’obong’aini, korende oromeme rokong’ainereria ndosirigwe.
32Ebikoba bi’omonyene oboronge nigo bimanyete gokwana amang’ana agwanchwa, korende omonwa bw’omokori amabe nigo ogokwana ayatagwenereti.
Currently Selected:
EMERENG’ANIO 10: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
