ABAFILIPI 2

Oboitongo bw’Abakristo na ogwekeyia gwa Kristo

1Gaki gakorabe okoremia konde gwonsi ase Kristo, gose ogochanchima kw’obwanchani gose okobwatana kw’Omoika, karabe amabera ande onsi na amabeebe, 2ikerania omogoko one ase okoba nokorengereria okwo okwo na obwanchani obomo; mobe nomoyo oyomo, na okorengereria okomo. 3Timokora ing’ana rinde rionsi ase okwegwenera na ase okweenenia, korende ase oboitongo kera omonto abare abande ng’a nabaya kobua ere omonyene. 4Kera omonto tarigereria ebinto biaye omonyene, korende arigererie ebinto bi’abande. 5Naki mobe nebirengererio ebio ebio ime yaino buna ebio biarenge ime ya Kristo Yeso. 6Ere omochakano nigo arenge oyomo na Nyasae, na tabarete ng’a okoba koreng’ana buna Nyasae negento gi’okobwaterera, 7korende agekora buna tarenge nobonene, akaimokia ekieni ki’omosomba, akaba omogwekano o mwanyabanto. 8Naende agachia kororekana ore buna mwanyabanto omonyene, agekeyia, akaba omoigweri goika ogokwa, na korokwo nogokwa igoro ase omosalaba. 9Ase ayio Nyasae akamoimokereria igoro mono, akamoa erieta riria ribuete amarieta onsi, 10erinde ase erieta ria Yeso kera riru riringwe, ri’abwo bare igoro, na ase ense, na inse y’ense, 11na kera oromeme narobe kirori ng’a Yeso Kristo n’Omonene, ase obonene bwa Nyasae Tata.

Okobara buna emebaso ase ense

12Ase ayio, abanchwa baane, buna moigwerete botambe, tari ekero indeo rioka, korende kobua mono ekero ntaiyo, korera ogotooreka kwaino abanyene ase okwoboa na okoiguswa, 13ekiagera Nyasae nere ogokora emeremo ime yaino ase okorigia, naende ase ogokora ogwancha kwaye okuya.

14Mokore amang’ana onsi motari nokwemurungania na okoborania, 15erinde monyare koba abatari na komocha, abachenu, abana ba Nyasae, motari na bobe egati y’ekegori eke ekebe kere bogeka. Ase egati y’abwo mobare buna emebaso ase ense. 16Bwata ring’ana ri’obogima, erinde inyore engencho y’ogwetogia ase rituko riria ria Kristo, ng’a tinaminyogete bosa, gose tinakorete emeremo bosa. 17Ee, kondaumorwe igoro y’ekeng’wanso na ogokora gw’okwegena kwaino, nagokire; ee, nagokire amo nainwe mwensi. 18Nainwe boigo, goka, ee, goka amo nainche.

Timotheo na Epafrodito

19Korende nasemeirie ase Omonene Yeso gotoma Timotheo achiche bwango asemore, erinde inche ndemigwe, kondamanye buna more. 20Naki tindi na monto onde ore nomoyo oyomo nainche, oyoranyare gochandekera chingencho chiaino, 21ekiagera bonsi nigo bakorigia ebinto biabo abanyene, gose tari ebia Kristo Yeso. 22Korende momanyete Timotheo na ogokora kwaye, buna akorerete enchili amo nainche. Igo are koreng’ana buna omwana okomokorera ise. 23Ase ayio ninganetie komotoma ase obwango ekero ndamanye buna amang’ana arabe asende. 24Na inche nasemeirie ase Omonene ng’a inche omonyene boigo ninchiche bwango.

25Korende nkarora ng’a ningwenerete gotoma Epafrodito oyominto, omokori emeremo amo nainche, omorwani amo nainche, oyo mwatomire gonkorera ase okoremerwa kwane. 26Ere nigo arenge namaiga asemore mwensi, naende agaichana mono, ekiagera mwaigwete ng’a nigo arenge omorwaire. 27Ere nomorwaire arenge ekeene, ang’e nogokwa, korende Nyasae akamororera amabera, gose tari ere bweka, korende nonya ninche boigo, timba nomoichano igoro ase omoichano. 28Ase ayio nakorire omokia mono komotoma, erinde ekero moramorore naende, monyare kogoka, na inche nkeeanerigwe omoichano one. 29Momoroisie gaki ase Omonene ase omogoko bwonsi. Mosike abanto banga buna oyio, 30ekiagera ase engencho y’emeremo ya Kristo akaba ang’e ase ogokwa, tarendete obogima bwaye ase ogoisanera ayaremete ase ogokora kwaino asende.

Currently Selected:

ABAFILIPI 2: EKEGUSIIBBLE

Highlight

Copy