ABAFILIPI 3

Oboronge bw’ekeene

1Omoerio baminto, goka ase Omonene! Kobarikera inwe amang’ana aria aria tandoseti inche, korende asemore nigo arabe obokonyi.

2Mwerende korwa ase chisese, mwerende na korwa ase abwo bagokora amabe, mwerende nabwo bakwenachanacha! 3Naki intwe naba twarogete, abatogosasima Nyasae ase Omoika oye, na gwetogia ase Kristo Yeso, na titosemereti ebia omobere. 4Nonya ninche ase ensemo yane ninyare gosemeria ebia omobere. Onye omonto onde okorora ng’a nare nengencho y’ogosemeria ebia omobere, inche nkobua, 5ekiagera narogete ase rituko ria gatano na gatato, naende noyomo bw’Abaisraeli inde, oyo bw’ororeria rwa Benjamin, Omoibirania oiboretwe n’Abaibirania, na ase ogotunyana amachiko n’Omofarisai inde. 6Nkaba nomokia bw’ogochanda ekanisa, na ase amang’ana ’oboronge bokonyorekana ase amachiko tinarenge na komocha. 7Korende amang’ana aria arenge okonyora asende nayabarire koba bosa ase engencho ya Kristo. 8Ee, nabarire onsi, ng’a abeire bosa ase engencho y’obuya botari nekerengo, engencho yaye okomomanya Kristo Yeso Omonene one. Ase engencho yaye natigire ebinto bionsi, na kobibara buna eubi, erinde imonyore Kristo, 9naende ndorekane ime asare. Tinkoba noboronge bwane boria bokonyorekana ase amachiko korende boria bokonyorekana ase okomwegena Kristo, oboronge boria bokorwa ase Nyasae, bokonyorekana ase okomwegena. 10Nindigetie komomanya Kristo ne chinguru chi’okobokigwa kwaye, inyare kobwatana nogochandwa kwaye, ngwekanigwe nere ase ogokwa kwaye; 11erinde inyore ase enchera ende yonsi goikera okobokigwa korwa ase abakure.

Ogokong’ia orogendo gochia aase rogokoorerwa

12Tari ng’a naikire konyora aya, gose naikire koba omoikeranu, korende nakong’irie orogendo inyabwate, ekiagera nabwatirwe na Kristo Yeso. 13Abaminto, tinyekageti inche omonyene ng’a naikire koyabwata; korende ninkore egento ekemo gioka: kweba ayare nyuma, ndambaarie ayare bosio. 14Nakong’irie orogendo gochia aase ngokoorera, ng’ikere eng’eria y’okorangerigwa kwa igoro kwa Nyasae goetera ase Kristo Yeso. 15Gaki intwe abatore abaikeranu torengererie ayio. Komorabe mokorengereria ayande, ase ing’ana rinde rionsi, Nyasae nabamaanorere ayio naro. 16Korende togenderere ase ayio ayio twaigete konyora.

17Abaminto, mobe abegi baane, morigererie abwo bakogenda ase ogotunyana omogwekano oria oria twabaete. 18Naki abange nigo bakogenderera bare ababisa b’omosalaba o Kristo. Nabatebirie amang’ana abo ara aange, nonya mbono nigo nkobatebia aya ase amariga. 19Omoerio obo nogosareka, enyasae yabo nenda, obonene bwabo nigo bore ase obosooku bwabo, bakorengereria amang’ana ’ense. 20Naki obobiare bwaito igoro, bore. Korwa agwo naende ntoganyete, Omotooria, Omonene Yeso Kristo, 21oyoranyare koonchora emebere yaito y’obosareku enyare kogwekana nomobere oye bw’obonene, koreng’ana nokobua kwaye ase okwo aranyare kobeka ebinto bionsi inse asare.

Currently Selected:

ABAFILIPI 3: EKEGUSIIBBLE

Highlight

Copy