ABAFILIPI 1

Ogokwania

1Inche Paulo na Timotheo, abasomba ba Kristo Yeso, nkobarikera tore inwe abachenu bonsi abamore ase Kristo Yeso, abamomenyete Filipi, amo nabatang’ani na abakonyi ase ekanisa.

2Obuya bobe asemore na omorembe bikorwa ase Nyasae Tata oito, na ase Omonene Yeso Kristo.

Paulo ogosabera Abafilipi

3Igo nkomoakera Nyasae one ng’a mbuya mono ekero nkobainyora, 4ekiagera botambe ase ogosaba kwane nigo nkobasabera inwe mwensi nomogoko, 5ase engencho y’okobwaterana kwaino ase enchili korwa rituko rie ritang’ani goika rero iga. 6Ninde nobomaene, ng’a ere oyochagete emeremo emiya ase emioyo yaino ime nayeikeranie goika rituko riria ria Kristo Yeso. 7Igo bore boronge asende korengereria aya igoro asemore mwensi, ekiagera nababogoirie inwe ase enkoro yane ime. Naki ase ogosibwa kwane na ase emeremo y’okorwanerera enchili na koyeorokia ng’a ero nechinguru, na inwe mwensi mwabwatanire nainche ase obuya obo naeirwe. 8Naki Nyasae nere kirori one, buna inde namaiga ase inwe mwensi nobwanchani bokorwa ase Kristo Yeso. 9Oko nakwo ogosaba kwane, ng’a obwanchani bwaino bomenteke, bobe obonge mono ase okomanya kw’ogwatanana gwonsi, 10erinde monyare komanya ayare amaya, naende mobe nemioyo emerabu, motari na komocha ase rituko riria ria Kristo. 11Mwaichoirwe nokwama kw’oboronge ase enchera ya Yeso Kristo, ase obonene na ogotogigwa kwa Nyasae.

Asende inche okoba moyo n’Kristo

12Korende baminto, nimbamanyie ng’a amang’ana aria onsi anyorete, abeire ase okogendereria gw’enchili. 13Ase igo amanyekanire ase abarendi bonsi b’omoruoti, na ase abande bonsi ng’a nasibirwe ase engencho ya Kristo. 14Na abange ase abaminto abare ase Omonene babeire nokoremigwa ase engencho y’ogosibwa kwane, bamentekanire noboremu gokwana ring’ana ria Nyasae batari nobwoba.

15Abande nigo bakorandia Kristo bare nemoko na eriomana, korende abande ase omoyo omuya, 16abwo ase obwanchani, bamanyete ng’a nabekirwe ase okorwanerera enchili. 17Aba bakoraria Kristo ase esugu gose tari ase omoyo omorabu, bakorengereria komenta obororo bwane ase ogosibwa kwane. 18Inki rende? Nonya nabo, ase kera enchera Kristo nigo arararigwe, ase obong’ainereria gose ase ekeene, na ase ayio nagokire.

19Ee, ningoke, ekiagera namanyire ng’a aya nang’onchokere koba ase ogotooreka kwane, goetera ase ogosaba kwaino na ase ogokonya kw’Omoika o Yeso Kristo. 20Ninde nokoganya mono na ogosemeria ng’a tingosookigwa ase enchera ende yonsi, korende ase oboremu bwane bwonsi, bono buna botambe, Kristo naegwe ogosika ase omobere one, kerabe ase obogima gose ase ogokwa. 21Naki asende inche, okoba moyo n’Kristo, na ogokwa nokonyora amange. 22Korende onye nkoba moyo ase omobere, aya nigo akondetera okwama kw’emeremo yane; gaki eri ndigetie gochora, tindimanyeti. 23Nimigire mono ase egati y’amang’ana aya abere. Okogania kwane nigo kore ng’a ngende komenya amo na Kristo; ekiagera aya namaya kobua. 24Korende gotigara ase omobere nkogwenerete kobua ase engencho yaino. 25Ekiagera inde nobomaene ase aya, namanyire ng’a nintigare na kogenderera amo nainwe mwensi, na inwe momenteke na kogoka ase okwegena, 26erinde ogwetogia kwaino ase engencho yane konyare komenteka ase Kristo Yeso, ase engencho y’okoba kwane amo nainwe naende.

27Korende orogendo rwaino robe buna egwenerete enchili ya Kristo, erinde onye ngocha kobarora inwe, gose tinkobao, nyigwe amang’ana aino ng’a moteneine bokong’u ase omoika oyomo, na ase omoyo oyomo mokorwanerera okwegena more nakwo ase enchili amo. 28Timoiroka abwo bakobaengereria ase ing’ana rinde rionsi. Eke nekemanyererio ase ogosira kwabo, korende asemore inwe nekemanyererio ki’ogotooreka. Eke igo gekorwa ase Nyasae. 29Ekiagera ase engencho ya Kristo mwaeirwe, tari okomwegena gwoka korende nogochandwa boigo ase engencho yaye. 30Na inwe nabo more nokorwanerera koria koria mwaroche asende, na koigwa ng’a ninde nakwo goika bono.

Currently Selected:

ABAFILIPI 1: EKEGUSIIBBLE

Highlight

Copy