OMOBARO 35
35
Emechie yaatananetwe ase Abalawi
1Ase ebirubo ebiomo bia Moabu, ang’e na Yorodan, kororia Yeriko, Omonene agkwana na Musa, akamotebia, 2“Chika Abaisraeli ng’a korwa ase emiando eyio baranyore baatananere Abalawi emechie baramenye, amo noborisia boetanaineo. 3Emechie eyio ebe eyabo baramenye, na ebitii bi’oborisia bakorisia chiombe chiabo ne ching’iti chiabo chinde chionsi. 4Ebitii bi’oborisia morae Abalawi bichakere korwa ase chindwaki chi’omochie, bigareigwe gochia ase oboare bw’amaboko elifu eyemo korwa ase kera ensemo y’omochie. 5Naende mobare isiko y’omochie, ensemo ya moocha ekerengo ki’amaboko chilifu ibere, na ensemo ya irianyi, na eya sugusu, na eya bosongo boigo, amaboko chilifu ibere; omochie obe gati‐gati. Ebitii ebi bi’oborisia Abalawi baegwe amo nemechie yabo. 6Moe Abalawi emechie etano nomo ey’obotamero, erinde ekero omonto aitire omonto onde mosiabano, anyare gotamerao, naende mobae emechie ende emeao emerongo ene na ebere. 7Emechie yonsi morabae nigo erabe emerongo ene, na etano na etato, amo nebitii bi’oborisia bietanaine emechie eyio. 8Emechie eyio morae Abalawi nigo morayerusie korwa ase eria Abaisraeli babwate. Morusie emechie emenge korwa ase egesaku keria kere ekenene kebwate emechie emenge, na korwa ase egesaku kere egeke kebwate emechie emeke morusie emekeo, koreng’ana nomobaro obo.”
Emechie y’obotamero
(Okoir 19:1–3; Yosh 20:1–9)
9Omonene agatebia Musa, 10“Kwana n’Abaisraeli, obatebie: Ekero moramboke gochia ng’umbu ya Yorodan na goika ense ya Kanani, 11mochore emechie erabe obotamero asemore, erinde omonto onde bwensi, onye oitire omonto onde mosiabano, natamere oyomo bw’emechie eyio. 12Emechie eyio nebe obotamero bwaino, erinde omonto oria okorigia korusia egesiomba ki’oyomwabo oria oitwa, omoiti oria aratamere gochiao, abeereo goika rituko arache korentwa kogambigwa ase obosio bw’omosangererekano bwonsi. 13Emechie eyio morachore ebe ey’obotamero nigo erabe etano nomo. 14Etato ebe moocha ya Yorodan, na etato ebe ase ense ya Kanani. Eyio ebe emechie y’obotamero. 15Emechie eyio etano nomo ebe ey’obotamero ase Abaisraeli, na ase abageni bagoeta, na ase abanto bare abamenyi ase egati yabo, erinde monto onde bwensi oraite omonto mosiabano atancheti atamere oyomo bw’emechie eyio.
16“Korende onye omonto oakire omonto onde negento buna ekioma, na omonto oria okure, omoiti oyio nere goika aitwe akwe. 17Boigo onye omonto obwate rigena ase okoboko kwaye oakire omonto onde, na omonto oria okure, omoiti oyio nere goika aitwe akwe, ekiagera ere nomoiti omoenenu. 18Gose onye omonto oakire omonto onde nomote abwate ase okoboko kwaye, erinde omonto oria akwe, omoiti oyio nigo aita oria moeneno, nere goika aitwe akwe. 19Omonto oria okorigia korusia egesiomba ki’oyomwabo oitetwe, nere oraite omoiti oria aande onsi ase araumerane nere.
20“Onye omonto ogechete oyonde na komoita ase okomotwoma, gose komoruta egento moeneno, na komoita, 21gose ase engencho y’obobisa bwarengeo agaaka oyonde nokoboko kwaye na komoita, rirorio omonto oria oaka oyonde na komoita, nere goika aitwe akwe. Ere nomoiti. Omonto oria okogania korusia egesiomba ki’oyomwabo, nere oramoite aande onsi ase araumerane nere.
22“Eise koba ng’a omonto igo atwomete oyonde atamogechete agwo ritang’ani, gose igo amorutete egento mosiabano, 23gose omonto oria nigo arutete rigena, tamoroche, korende akamoaka akamoita atamogechete, gose taganetie komokorera bobe. 24Onye ekoba bo, omosangererekano bw’abanto noro oragambe ekina ase egati y’omonto oria oita omonto onde mosiabano na oria oganetie korusia egesiomba ki’oyomwabo oitetwe, na onache ekina koreng’ana nemeroberio echikire. 25Omosangererekano bw’abanto notoorie omoiti oria korwa ase oria oganetie korusia egesiomba. Bamotige airane abeere ase omochie oria bw’obotamero atamerete, amenye aroro goika omokuani omonene bw’engaki eyio, oyoakire amagutwa, akwe. 26Korende onye omoiti oria o mosiabano ase engaki ende yonsi ogosoka korwa ase omochie bw’obotamero, agwo ase atamerete, 27na omonto oria okorusia egesiomba ki’oyomwabo amonyore ore isiko y’omochie oria karamoite, rirorio takobarerwa okomocha ase okomoita. 28Omonto oria oitete oyonde moeneno goika agenderere kobeera ase omochie oria bw’obotamero goika omokuani bw’engaki eyio akwe. Korende omokuani oria omonene gakure, omonto oria nairane gochia ase ense yaye, na ase omwando oye. 29Okwo nogochika kwa boronge korabe asemore ebiaare ase ebiaare, aase aande onsi ase morabe momenyete.
30“Omonto onde bwensi karaite omonto onde moeneno, omonto oyio nere goika aitwe akwe ase oborori bw’abanto babere gose goetania, korende omonto tagoitwa ase oborori bw’omonto oyomo bweka. 31Omonto oitire omonto onde moeneno takoegerwa aruerwe embooria. Omoiti oria onyorekanire nokomocha kw’ogoita, nere goika aitwe akwe. 32Boigo omonto oria omoiti o mosiabano otamire gochia ase oyomo bw’emechie y’obotamero takoboorigwa ng’a erio airane ase ense yaye ekero omokuani bw’engaki eyio atarakwa. 33Moise gokora ayio, nigo morasarie ense eye ase momenyete na koyekora ebe eyetachenegeti, ekiagera amanyinga agoiterwa nigo arakore ense ebe etachenegeti, na okobwatanigwa konde tikori korakorwe ase ense eria ase engencho y’amanyinga aiteirwe, otatiga ogoiterwa kw’amanyinga ay’oria omoiti oka. 34Timokora ense eyio ase momenyete ebe etachenegeti, ekiagera inche nigo imenyete ase egati yaino. Inche ninche Omonene imenyete ase egati y’abanto baane Abaisraeli.”
Currently Selected:
OMOBARO 35: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
