OMOBARO 34
34
Chimbebe chie chingogo
1Omonene agakwana na Musa, akamotebia, 2“Kwana n’Abaisraeli, obachike: Ekero moraike ase ense ya Kanani, eyio nero ense erabe omwando oino, chimbebe chiaye nigo chirabe iga: 3Ensemo ya irianyi, ense yaino eike ase erooro ya Sini, egenderere gochia ase orobebe rwa Edomu. Orobebe rwaino rwa irianyi rochakere ensemo ya moocha ase ensinyo y’Enyancha y’Omonyo, 4naende roonchoke gochia irianyi y’Egetunwa ki’Ebiuge roetere Sini, irianyi ya Kadeshi‐Barinea. Korwa agwo rogenderere roike Hasari‐Adari, naende roete roike Asimoni, 5na korwa agwo Asimoni rogenderere kobwatia orooche rw’orobebe rwa Misiri, roike Enyancha Enene.
6“Enyancha Enene nero erabe orobebe rwaino rwa bosongo.
7“Orobebe rwaino rwa sugusu ndochakere korwa ase Enyancha Enene, rogenderere gochia ase egetunwa kia Hori. 8Korwa aroro rogenderere roike enchera ekogenda Hamati, erio naende rogenderere goikera Sedadi, 9naende rogenderere gochia Sifuroni, na korwa aroro roike Hasari‐Enani. Oro narwo orobebe rwaino rwa sugusu.
10“Orobebe rwaino rwa moocha rochakere korwa Hasari‐Enani, roikere Sefamu, 11naende rotirimboke gochia Ribula, moocha y’Aini, rotirimboke gochia moocha y’engegu y’enyancha ya Kinereti.#34:11 Kinereti nero Galili 12Erio rotirimboke robwatie orooche rwa Yorodan rotwomere Enyancha y’Omonyo. Eye nero erabe ense yaino, ne chimbebe chiaye chietanaineo.”
13Musa agachika Abaisraeli, akabatebia, “Eyio nero ense morarie ebe omwando oino ase ogoaka obomera, ense eria Omonene achikire ng’a ebe ey’ebisaku kianda na ekeng’ese. 14Abanto b’egesaku kia Reuben na ab’egesaku kia Gadi amo nekeng’ese ki’egesaku kia Manase, barabwo konya banyorire omwando obo. 15Abanto b’ebisaku ebio bibere na ekeng’ese, barabwo konya banyorire omwando obo moocha ya Yorodan, kororia Yeriko.”
Abaraai abagochia gwatanana ense
16Omonene agakwana na Musa, akamotebia, 17“Abanto aba nabwo bagochia kogokonya gwatanana ense: Ritang’ani Eleazari omokuani, na Yoshua, mosinto o Nuni. 18Naende ochore omoraai oyomo korwa ase kera egesaku agokonye gwatanana ense eria.” 19Aba nabwo abanto bachoretwe:
Korwa ase egesaku kia Yuda, Kalebu, mosinto o Yefune;
20korwa ase egesaku gia Simeoni, Semueli, mosinto bw’Amihudi;
21korwa ase egesaku kia Benjamin, Elidadi, mosinto o Kisiloni;
22korwa ase egesaku kia Dani, Buki, mosinto o Yogili;
23korwa ase basinto ba Yusufu; ase egesaku kia Manase, Hanieli, mosinto o Efodi;
24korwa ase egesaku gi’Efraimu, Kemueli, mosinto o Sifutani;
25korwa ase egesaku gia Sabuloni, Elisafani, mosinto o Parinaki;
26korwa ase egesaku gia Isakaru, Palitieli, mosinto bw’Asani;
27korwa ase egesaku gi’Aseri, Ahihudi, mosinto o Selomi;
28korwa ase egesaku kia Nafutali, Pedaheli, mosinto bw’Amihudi.
29Abanto aba nabwo Omonene achigete baatanane ense ya Kanani ebe emiando y’Abaisraeli.
Currently Selected:
OMOBARO 34: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
