OMOBARO 27
27
Abaiseke ba Selofehadi
1Ase engaki eyio abaiseke ba Selofehadi, mosinto o Heferi o Gileadi, o Makiri, o Manase bagacha. Aba nigo barwete ase chiamate chia Manase, mosinto o Yusufu, na amarieta abo naro aya: Mala, na Noa, na Hogila, na Milka, na Tirisa. 2Barabwo bagacha ase obosio bwa Musa, na obwa Eleazari omokuani, na ase amasio ’abatang’ani, na ase omoganda bwonsi, bagatenena agwo ase egesoero ki’Eema y’Omosangererekano, bagateba, 3“Tata nigo akwerete agwo ase erooro. Ere tarenge ase egati y’ekeombe keria giasangererekanete amo gekaba mamincha y’Omonene, ase abwo barenge ase ensemo ya Kora, korende ere nigo akwete ase engencho y’ebibe biaye omonyene. Ekero akwete tatigete abana abamura 4Nase ki erieta ria tata rigosirigwa korwa ase eamate yaye ekiagera tabwate abana abamura? Toe naintwe omwando ase egati y’abamura bamwabo tata.”
5Musa akaira amang’ana abo ase obosio bw’Omonene, 6na Omonene akamotebia, 7“Abaiseke ba Selofehadi nekeene bakoboria. Bae omwando obo ase egati ya bamura bamwabo ise. Tiga omwando o ise obe oyobo. 8Naende otebie Abaisraeli ng’a omonto karakwe, onye ere tabwati omwana omomura, omwando bw’omonto oyio omwana oye omoiseke ayoire. 9Onye omonto oyio tabwati nonya nomwana omoiseke, omwando oye abamura bamwabo bayoire. 10Onye omonto oyio tabwati abamura bamwabo, omwando oye oirwe nabamura bamwabo ise. 11Na onye omonto oyio tabwati abamura bamwabo ise, omwando oye oirwe nomoamate oye ore ang’e. Okwo nigo korabe ogochika kw’oboronge ase Abaisraeli, buna inche Omonene nagochikire.”
Yoshua ogochorwa okoba ribaga ria Musa
(Okoir 31:1–8)
12Omonene agakwana na Musa, akamotebia, “Tiira gochia igoro ase egetunwa eke ki’Abarimu, na origererie ense naeire Abaisraeli. 13Ekero kwayerorire, aye nigo orasangererekane amo nabanto bao buna Haroni omino asangererekanete amo nabanto baye, 14ekiagera timwaigwerete ring’ana riane agwo ase erooro ya Sini, rituko riria omoganda bwonsi bwemurunganetie, gose timwaorogetie ng’a inche nomochenu inde, ekero mware kobochorera abanto amache.” (Aya namache a Meriba ya Kadeshi ase erooro ya Sini).
15Musa agakwana n’Omonene akabora, 16“Aye Omonene Nyasae, aye oyokorua obogima ase abanto bonsi, chora omonto oraraae omoganda oyo, 17omonto oranyare gotang’ana abanto kobagosoka na kobakoirana, erinde omoganda bw’abanto b’Omonene tobaisa koba buna ching’ondi chitari nomorisia.”
18Omonene agatebia Musa, “Ira Yoshua, mosinto o Nuni, omonto oyio omoika one ore ime yaye, erio omobekere amaboko. 19Omorente atenene ase obosio bw’Eleazari omokuani, na ase amasio ’omoganda bwonsi bw’abanto, erio ase amasio abo omorarie ng’a nere oirire ribaga riao. 20Omoe okobua buna okwao, erio nario omoganda bwonsi bw’Abaisraeli oramoigwere. 21Yoshua abe ogotenena ase obosio bw’Eleazari omokuani, na Eleazari abe okomoboreria goetera ase Urimu, agwo ase obosio bwane amanye ogwancha kwane. Yoshua amo nomoganda bwonsi bw’Abaisraeli nigo barakore emeremo yabo yonsi buna Eleazari arabachike.” 22Musa akaira Yoshua buna Omonene konya amochikire, akamorenta ase obosio bw’Eleazari na obw’omoganda bwonsi. 23Naende akabeka amaboko aye igoro ase omotwe o Yoshua, akamwatanana, akamobeka ase ribaga riaye, buna Omonene konya amochikire goetera ase Musa.
Currently Selected:
OMOBARO 27: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
