OMOBARO 26
26
Omobaro o kabere bw’Abaisraeli
1Ekaba nyuma amaakwa aria gaetire, Omonene agakwana na Musa na Eleazari, omomura o Haroni omokuani, akabatebia, 2“Mobare omoganda bwonsi bw’Abaisraeli, eamate ase eamate. Morike, abanto bakoorire emiaka emerongo ebere na goetania, abwo baranyare korwana esegi.” 3Erio Musa na Eleazari omokuani bagakwana nabanto baria ase ebirubo ebiomo bia Moabu, ase orooche rwa Yorodan, kororia Yeriko, akabatebia, 4“Rika abanto bonsi abakoorire emiaka emerongo ebere na goetania, buna Omonene achigete Musa.”
Abaisraeli abwo barwete ense ya Misiri nabwo aba:
5Reuben nere orenge omomura omotangi o Israeli. Ase egesaku kiaye nigo chiarenge chiamate echi: Abahanoki, abarwete ase Hanoki, na Abapalu, abarwete ase Palu, 6na Abahezironi, abarwete ase Hezironi, na Abakarimi, abarwete ase Karimi. 7Echi nachio chiamate chi’egesaku kia Reuben. Ababaretwe nigo barenge chilifu emerongo ene na isato, na amagana atano na abere, na emerongo etato (43,730). 8-9Ororeria rwa Palu n’Eliabu amo nabana baye: Nemweli, na Datani, na Abiiramu. (Aba nabwo Datani na Abiiramu bachoretwe korwa ase omoganda. Barabwo bakaamererania na Musa na Haroni, bakaba ase ekeombe gia Kora, ekero baamereranetie n’Omonene. 10Riroba rikabwereka rikabamera amo na Kora, ekero omorero osambete na gosiria abanto amagana abere, na emerongo etano. Ayio akaba ekiorokererio ki’ogokurera. 11Korende abana ba Kora barabwo tibaitetwe.)
12Ase egesaku gia Simeoni nigo chiarenge chiamate echi: Abanemweli, abarwete ase Nemweli, na Abayamini, abarwete ase Yamini, na Abayakini, abarwete ase Yakini, 13na Abazera, abarwete ase Zera, na Abasauli, abarwete ase Sauli. 14Echi nachio chiamate chi’egesaku gia Simeoni. Ababaretwe nigo barenge chilifu emerongo ebere na ibere, na amagana abere (22,200).
15Ase egesaku kia Gadi nigo chiarenge chiamate echi: Abazefoni, abarwete ase Zefoni, na Abahagi, abarwete ase Hagi, na 16Abasuni, abarwete ase Suni, na Abaosini, abarwete ase Osini, na Abaeri, abarwete ase Eri, 17na Abaarodi, abarwete ase Arodi, na Abaareli, abarwete ase Areli. 18Echi nachio chiamate chi’egesaku kia Gadi. Ababaretwe nigo barenge chilifi emerongo ene, na amagana atano (40,500).
19Basinto ba Yuda, Eri na Onani, bagakwera agwo ase ense ya Kanani. 20Ase egesaku kia Yuda nigo chiarenge chiamate echi: Abasela, abarwete ase Sela, na Abaperesi, abarwete ase Peresi, na Abazera, abarwete ase Zera. 21Chiamate chia Peresi nigo chiarenge: Abahezironi, abarwete ase Hezironi, na Abahamuli, abarwete ase Hamuli. 22Echi nachio chiamate chi’egesaku kia Yuda. Ababaretwe nigo barenge chilifu emerongo etano na ebere na isano nemo, na amagana atano (76,500).
23Ase egesaku gia Isakaru nigo chiarenge chiamate echi: Abatola, abarwete ase Tola, na Abapua, abarwete ase Pua, 24na Abayasubu, abarwete ase Yasubu, na Abashimuroni, abarwete ase Shimuroni. 25Echi nachio chiamate chi’egesaku gia Isakaru. Ababaretwe nigo barenge chilifu emerongo etano nomo na inye, na amagana atato (64,300).
26Ase egesaku gia Sabuloni nigo chiarenge chiamate echi: Abaseredi, abarwete ase Seredi, na Abaeloni, abarwete ase Eloni, na Abayaleeli, abarwete ase Yaleeli. 27Echi nachio chiamate chi’egesaku gia Sabuloni. Ababaretwe nigo barenge chilifu emerongo etano nomo, na amagana atano (60,500).
28Ebisaku bia Yusufu nebi’abamura baye babere, Manase na Efraimu:
29Ase egesaku kia Manase nao eamate ya Makiri yarwete. Makiri nere orenge ise Gileadi, na korwa asare nao Abagileadi barwete. 30Ase ororeria rwa Gileadi nigo chiarenge chiamate echi: Abaieseri, abarwete ase Ieseri, na Abaheleki, abarwete ase Heleki, 31Abaasirieli, abarwete ase Asirieli, na Abasekemu, abarwete ase Sekemu, 32na Abasemida, abarwete ase Semida, na Abaheferi, abarwete ase Heferi. 33Selofehadi, mosinto o Heferi, tabwate abana abamura, korende nabana abaiseke boka abwate, na amarieta ’abaiseke abwo naro aya: Mala, na Noa, na Hogila, na Milka, na Tirisa. 34Echi nachio chiarenge chiamate chi’egesaku kia Manase. Ababaretwe nigo barenge chilifu emerongo etano na ibere, na amagana atano na abere (52,700).
35Ase egesaku gi’Efraimu nigo chiarenge chiamate echi: Abasutela, abarwete ase Sutela, na Ababekeri, abarwete ase Bekeri, na Abatahani, abarwete ase Tahani. 36Sutela nigo arenge ise Erani, na korwa asare nao Abaerani barwete. 37Echi nachio chiamate chi’egesaku gia Efraimu. Ababaretwe nigo barenge chilifu emerongo etato na ibere, na amagana atano (32,500).
Aba nabwo barenge abana ba Yusufu ne chiamate chiabo.
38Ase egesaku kia Benjamin nigo chiarenge chiamate echi: Ababela, abarwete ase Bela, na Abaasibeli, abarwete ase Asibeli, na Abaahiramu, abarwete ase Ahiramu, 39na Abasefufamu, abarwete ase Sefufamu, na Abahufamu, abarwete ase Hufamu. 40Abamura ba Bela nabwo Aridi na Naamani. Korwa ase Aridi nao Abaaridi barwete, na korwa ase Naamani nao Abanaamani barwete. 41Echi nachio chiarenge chiamate chi’egesaku kia Benjamin. Ababaretwe nigo barenge chilifu emerongo ene na isano, na amagana atano na rimo (45,600).
42Ase egesaku kia Dani nigo chiarenge chiamate chi’Abasuhamu, abarwete ase Suhamu. Aba nabwo abanto b’egesaku kia Dani ase chiamate chiabo. 43Ababwarete ase chiamate chi’Abasuhamu nigo barenge chilifu emerongo etano nomo na inye, na amagana ane (64,400).
44Ase egesaku gi’Aseri nigo chiarenge chiamate echi: Abaimuna, abarwete ase Imuna, na Abaisibi, abarwete ase Isibi, na Ababeria, abarwete ase Beria. 45Abamura ba Beria nabwo Heberi ase eamate y’Abaheberi yarwete, na Malikieli, ase eamate y’Abamalikieli yarwete. 46Omwana omoiseke o Aseri nigo arenge korokwa Sera. 47Echi nachio chiamate chi’egesaku gi’Aseri. Ababaretwe nigo barenge chilifu emerongo etano na isato, na amagana ane (53,400).
48Ase egesaku kia Nafutali nigo chiarenge chiamate echi: Abayaseli, abarwete ase Yaseli, na Abaguni, abarwete ase Guni, 49na Abayeseri, abarwete ase Yeseri, na Abasilemu, abarwete ase Silemu. 50Echi nachio chiamate chi’egesaku kia Nafutali. Ababaretwe nigo barenge chilifu emerongo ene na isano, na amagana ane (45,400).
51Abanto bonsi b’Abaisraeli abarigetwe nigo barenge chilifu amagana atano na rimo na eyemo, na amagana atano na abere, na emerongo etato (601,730).
52Omonene agatebia Musa, 53“Aatananere abanto aba chingongo chibe emiando yabo. Ochiatanane kobwatekana nomobaro bw’abanto. 54Egesaku kere ekenene keegwe orogongo oronene robe omwando obo, na egesaku kere egeke keegwe orogongo oroke robe omwando obo. Kera egesaku nakeegwe omwando oye koreng’ana nomobaro obo. 55Ense yaatananwe ase ogoakerwa obomera. Abanto mbanyore omwando koreng’ana nomobaro bw’amarieta ’ebisaku bie chisokoro chiabo. 56Koreng’ana buna obomera boragwere abanto ba kera egesaku, ekenene gose egeke, nabo baranyore omwando obo.”
57Ase egesaku kia Lawi nigo chiarenge chiamate echi: Abagerisoni, abarwete ase Gerisoni, na Abakohati, abarwete ase Kohati, na Abamerari, abarwete ase Merari. 58Echi nachio chiamate chi’egesaku kia Lawi: Eamate y’Abalibini, na ey’Abaheburoni, na ey’Abamali na ey’Abamusi, na ey’Abakora. Kohati nere orenge ise Amuramu. 59Moka Amuramu nigo arenge korokwa Yokebedi, mosubati o Lawi, oria oiboreretwe Lawi agwo ase ense ya Misiri. Omokungu oria akamoiborera Amuramu abana aba: Haroni, na Musa, na Miriamu, omoiseke omwabo. 60Basinto ba Haroni nabwo aba: Nadabu, na Abihu, na Eleazari, na Itamari. 61Korende Nadabu na Abihu bagakwa ekero baruete omorero bw’engencho eng’ao otachikiri ase obosio bw’Omonene. 62Kera omonto omosacha ase egati yabo oyo konya okoorire omotienyi oyomo na goetania nigo abaretwe. Barabwo nigo barenge chilifu emerongo ebere na isato (23,000). Abanto aba tibabaretwe amo n’Abaisraeli bande, ekiagera tibaetwe omwando ase egati y’Abaisraeli.
63Abanto aba nabwo Musa na Eleazari omokuani barigete ekero babarete Abaisraeli agwo ase ebirubo ebiomo bia Moabu, ase Yorodan kororia Yeriko. 64Korende ase egati y’abanto aba onde tarengeo, nonya noyomo, ase baria Musa na Haroni omokuani babarete agwo ase erooro ya Sinai. 65Omonene nakwanete igoro y’abwo, “Barabwo nigo barakwere ase erooro.” Omonto onde tagotigara ore moyo nonya noyomo, otatiga Kalebu, mosinto o Yefune, na Yoshua, mosinto o Nuni.
Currently Selected:
OMOBARO 26: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
