OMOBARO 28
28
Ebing’wanso na okoruegwa kw’endagera gwa kera rituko
(Okong’ 29:38–46)
1Omonene agakwana na Musa, akamotebia, 2“Kwana n’Abaisraeli obachike ng’a ase ekero keria kerageire goika banduere ebing’wanso na okoruegwa kw’endagera kogosambwa nomorero kore ne rimisu rigiya rikongwenera.
3“Obatebie: Eke nakio ekeng’wanso kegosambwa nomorero moramoruere Omonene: Kera rituko botambe morue chimanwa chimingichi ibere, echiakoorire omwaka oyomo, chitari na kemocho ase emebere yabo. 4Eyemo y’echio oyerue mambia, na eyende mogoroba. 5Kera eyemo oyerue amo nokoruegwa kw’endagera, ebimunu bibere bi’obosie obonuke bwochoganirie namaguta amitire korwa ase amazeituni egetuba ekemo. 6Ekio nekeng’wanso ki’ogosambwa gia kera rituko, ekio Musa aruete ritang’ani agwo ase egetunwa gia Sinai gekaba rimisu rigiya, ekeng’wanso kegosambwa nomorero ase Omonene. 7Orue okoruegwa gw’ekenyugwa egetuba ekemo, amo nemingichi eria entang’ani. Ekenyugwa eke egetindi keraumorwe agwo Aase Aachenu, ase obosio bw’Omonene. 8Emingichi eria ya kabere oyerue mogoroba amo nokoruegwa kw’endagera, na ogw’ekenyugwa, buna kwaruete eria ya mambia. Eke nekeng’wanso kegosambwa nomorero, kere ne rimisu rigiya rikogwenera Omonene.”
Ekeng’wanso gi’Esabato
9Ase rituko ri’Esabato morue chimanwa chimingichi ibere, echiakoorire omwaka oyomo, chitari na kemocho ase emebere yabo. Amo nachirochio morue obosie obonuke ebimunu bine bwochoganirie amaguta ’amazeituni, bibe okoruegwa kw’endagera. Morue boigo okoruegwa gw’ekenyugwa gochikire. 10Eke nekeng’wanso ki’ogosambwa gia kera Esabato gekoruegwa amo nekeng’wanso ki’ogosambwa gia kera rituko, na okoruegwa gw’ekenyugwa gochikire amo.
Ekeng’wanso kie rituko rie ritang’ani ri’omotienyi
11Ase rituko rie ritang’ani ria kera omotienyi mobe mokorua ekeng’wanso ki’ogosambwa ase Omonene. Morue chieri chinsae ibere, na emingichi eyemo, ne chimanwa chimingichi isano na ibere, echiakoorire omwaka oyomo, chionsi echitari na kemocho ase emebere yabo. 12Morue okoruegwa kw’endagera, obosie obonuke bwochoganirie namaguta ’amazeituni. Amo na kera eeri morue obosie ebimunu bitano na ekemo, na amo nemingichi eria obosie ebimunu bine, 13na amo na kera emanwa emingichi, obosie ebimunu bibere. Ebing’wanso ebio bi’ogosambwa nigo bire okoruegwa kw’endagera kore ne rimisu rigiya kogosambwa nomorero ase Omonene. 14Ekenyugwa gekoruegwa amo na kera eeri nigo kerabe edivai ebituba bibere, na amo nemingichi eria edivai egetuba ekemo na ekeng’ese, na amo na kera emanwa emingichi edivai egetuba ekemo. Eke nkebe ekeng’wanso ki’ogosambwa gekoruegwa kera omotienyi ase emetienyi yonsi y’omwaka. 15Amo nekeng’wanso ki’ogosambwa gia kera rituko na okoruegwa gw’ekenyugwa, morue egoree eyemo ase Omonene, ebe ekeng’wanso ki’ebibe.
Ebing’wanso bi’Amatuko Amanene ay’Emegati etabekiri memera
(Abal 23:5–14)
16Rituko ria ikomi na kane ri’omotienyi bwe ritang’ani nerituko ri’Epasaka y’Omonene. 17Ase rituko ria ikomi na gatano ri’omotienyi oyio nario Rituko Rinene. Ase amatuko atano na abere morie emegati etabekiri memera. 18Ase rituko rie ritang’ani mobe nomosangererekano bwatananire ase ogosasima. Timokora emeremo ya kera rituko ase rituko erio. 19Morue ekeng’wanso ki’ogosambwa kegosambwa nomorero ase Omonene, chieri chinsae ibere, na emingichi eyemo, ne chimanwa chimingichi isano na ibere echiakoorire omwaka oyomo, chionsi chibe chitari na kemocho ase emebere yabo. 20Naende morue okoruegwa kw’endagera obosie obonuke bwochoganirie namaguta: Amo na kera eeri ensae morue obosie ebimunu bitano na ekemo, na amo nemingichi eria obosie ebimunu bine, 21na amo na kera eyemo ye chimanwa chimingichi chiria isano na ibere obosie ebimunu bibere. 22Naende morue egoree eyemo ebe ekeng’wanso ki’ebibe ase ogokora okobwatanigwa asemore. 23Igo morarue ebinto ebi amo nekeng’wanso ki’ogosambwa gia kera rituko botambe. 24Ase enchera eyio kera rituko, ase amatuko atano na abere, mobe mokoruera Omonene okoruegwa kw’endagera kogosambwa nomorero, kere ne rimisu rigiya rikomogwenera. Morue okoruegwa okwo amo nekeng’wanso ki’ogosambwa gwa kera rituko, na okoruegwa gw’ekenyugwa gochikire. 25Ase rituko ria gatano na kabere mobe nomosangererekano bwatananire ase ogosasima. Timokora emeremo ya kera rituko ase rituko erio.
Ebing’wanso bie rituko rie Rigesa
(Abal 23:15–22)
26Ase rituko rie ritang’ani rie rigesa, ekero morabe mokorenta okoruegwa kw’endagera enyia ase Omonene, ase Rituko Rinene rie Chichuma, namobe nomosangererekano bwatananire ase ogosasima. Timokora emeremo ya kera rituko ase rituko erio. 27Morue chieri chinsae ibere, na emingichi eyemo, amo ne chimanwa chimingichi isano na ibere, echiakoorire omwaka oyomo. Echi nchibe ekeng’wanso ki’ogosambwa kere ne rimisu rigiya rikogwenera Omonene. 28Amo nekeng’wanso ekio morue okoruegwa kw’endagera, obosie obonuke bwochoganirie namaguta ’amazeituni. Amo na kera eeri morue obosie ebimunu bitano na ekemo, na amo nemingichi eria obosie ebimunu bine, 29na amo na kera eyemo ye chimanwa chimingichi chiria isano na ibere obosie ebimunu bibere. 30Naende morue egoree eyemo ase ogokora okobwatanigwa asemore. 31Morue ekeng’wanso ekio amo nekeng’wanso ki’ogosambwa gwa kera rituko, na okoruegwa kw’endagera. Ching’iti echio chionsi chi’ebing’wanso chibe chitari na kemocho ase emebere yabo, chiruegwe amo nokoruegwa gw’ekenyugwa gochikire amo.
Currently Selected:
OMOBARO 28: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
