OMOBARO 24
24
1Ekero Baalamu aroche ng’a Omonene nigo amoganetie asesenie Abaisraeli tagendete naende ase okorigia oboringoria buna chingaki chiria chie ritang’ani, korende akaonchora obosio bwaye gochia ase erooro. 2Agachia koimokia amaiso, aye, akarora Abaisraeli batoorete egesaku ase egesaku. Erio omoika o Nyasae ogacha igoro asare. 3Agwo Baalamu agakwana obobani obo:
“Amang’ana aya naro inche Baalamu, mosinto o Beori, ngokwana
amang’ana aya nayane, inche omonto oramokigwe amaiso.
4Aya namang’ana ’omonto okoigwa buya aya Nyasae agoteba,
oyo okorora amaroro akorwa ase ase oria Omonguru,
oyogotung’ama inse na koramokigwa amaiso aye.
5Inwe abanto ba Yakobo, chiema chiaino
naki chire chingiya!
Inwe Abaisraeli aase momenyete, naki are aagiya mono!
6Igo mogwekaine omweya orambogete gochia aare,
gose emegondo ere mbarabare y’orooche,
nigo more buna emegaka Omonene asimegete.
Gose emecharake ere ase amache mbarabare.
7Amache amange naiteke korwa ase chinyongo chiabo
na oroiboro rwabo nigo rorabe oronge mono.
Omoruoti obo nabe omonene goetania Agagi,
na oboruoti bwaye inabotogigwe mono.
8Nyasae nere obarentire korwa Misiri,
chinguru chiabo nigo chire buna echi’eng’era.
Barabwo mbasirie abanto abare mamincha yabo,
babune amauga ’emebere y’ababisa babo,
na babarase ne chinsara chiabo.
9Abaisraeli nigo batung’aime inse buna endo, buna endo eaberi,
ning’o orabe noboremu abature?
Asesenigwe omonto oria okobasesenia inwe,
na aragererigwe omonto oria okobaragereria inwe.”
10Ase amang’ana ayio Balaki akaba nendamwamu enene ase Baalamu, agaaka chinkobi, akamotebia, “Nigo nakorangeretie ng’a oragererie ababisa baane, na rora, bono aye kwabasesenirie chintunda echi isato. 11Bono irana gochia bwoo. Inche igo narengereretie gokoa ogosika okonene, korende Omonene okorinire, tonyora ogosikwa okwo.”
12Baalamu agatebia Balaki, “Inee! Tinatebetie abanto baria gwatomete asende ng’a 13Balaki naisa kong’a enyomba yaye eichire ne chifeta, ne chitahabu, tinkonyara kwanga koigwera amang’ana Omonene anchikire, na tingokora gento kende ase ogwancha kwane, abe amabe, gose amaya. Aya Omonene agoteba, ayio naro ngwenerete nkore.
Obobani bw’omoerio bwa Baalamu
14“Bono nkoirana inde gochia ase abanto baane. Inchuo nkomanyie egento Abaisraeli barakore ase abanto bao ase amatuko agochi gocha.” 15Erio Baalamu agakwana obobani obo:
“Amang’ana aya inche Baalamu,
mosinto o Beori, ngokwana,
amang’ana aya nayane, inche omonto oramokigwe amaiso.
16Aya namang’ana ’omonto okoigwa buya aya Nyasae agoteba,
naende onyorire okomanya korwa ase oria ore Igoro Mono.
Na okorora amaroro akorwa ase oria Omonguru,
oyogotung’ama inse na koramokigwa amaiso.
17Namororire, korende tari bono;
namorigereirie, korende tari ang’e.
Eng’enang’eni neoroke korwa ase egati y’abanto ba Yakobo,
na enyimbo y’obogambi neoroke korwa ase Abaisraeli.
Nesenyente chintakunero chi’emetwe y’Abamoabu,
neiyerie abanto abebura‐buria b’esegi.
18Ense y’Edomu nebugwe eirwe,
Seiri nebugwe ebe eyabo,
eyio nense y’ababisa babo.
Abaisraeli mbagenderere koba nokobua.
19Omogambi naoroke korwa ase egati y’abanto ba Yakobo
asirie abanto batameire emechie banyore oborendi.”
20Erio Baalamu akarigereria Abaameleki, agakwana obobani obo:
“Abaameleki nabwo barange abe ritang’ani ase ebisaku,
korende ase omoerio nabasirigwe kegima.”
21Naende akarigereria Abakeni, agakwana obobani obo:
“Obomenyo bwabo nabogenderere kobao,
buna egeswa keagachire ase engako y’egetare.
22Korende nonya naboigo, Abakeni nabasirigwe,
ekero Abaasuri barabaire babe abasibwa.”
23Baalamu akagenderera gokwana obobani bwaye:
“Obee! Ning’o oranyare koba moyo ekero Nyasae arakore aya?
24Abanto mbachiche ne chimeeri korwa ase engegu ya Kitimu,
nabarabwo mbachande Abaasuri na Abaeberi,
korende barabwo abanyene mbasirigwe boigo.”
25Erio Baalamu akaimoka, akairana bwoye, na Balaki nere akabwatia enchera, akagenda bwoye.
Currently Selected:
OMOBARO 24: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
