OMOBARO 20
20
Aya akoregete agwo Kadeshi
(Okong’ 17:1–7)
1Ase omotienyi bwe ritang’ani omoganda bwonsi bw’Abaisraeli bagaika ase erooro ya Sini, bagatoora agwo Kadeshi. Miriamu agakwa na agatindekwa aroro.
2Amache tarenge agwo ase batoorete; ase ayio omoganda ogasangererekana amo, okaba mamincha ya Musa na Haroni. 3Abanto baria bakaamerererania na Musa, bagakwana, “Nanga nigo yabete buya kobua onye naintwe ntwakwete ekero abaminto baitetwe agwo ase obosio bw’Omonene. 4Nase ki mwatorentire intwe omoganda bw’Omonene ase erooro eye, erinde tokwere aiga, intwe amo ne chitugo chiaito? 5Nase ki mwatorusetie Misiri na gotorenta aase aiga aabe mono? Aase aa atari kwama endagera, gose amako, gose amasabibu, gose amakomomanga. Nonya namache tokonywa tari aa.” 6Musa na Haroni bakarua agwo ase omoganda oria, bakagenda ase Eema y’Omosangererekano, bagatung’ama inse bakaumama agwo ase egesoero. Erio obonene bw’Omonene bokabaorokera. 7Omonene agakwana na Musa, akamotebia, 8“Imokia enyimbo eria, erio aye na Haroni mosangererie omoganda bwonsi, na agwo ase amasio ’abanto bonsi mokwane negetare keria, na amache nasoke korwa aroro. Ase enchera eyio mosokerie abanto amache banywe, ne chitugo chiabo chinywe.” 9Musa akaimokia enyimbo eria korwa aase yarenge, agwo ase obosio bw’Omonene, buna Omonene konya amochikire.
10Musa na Haroni bagasangereria omoganda bwonsi bosio bw’egetare keria, akabatebia, “Igwa inwe abasaria aba! Inee! Nkobasokeria tore amache korwa ase egetare eke?” 11Musa akarambora okoboko kwaye, agaaka egetare keria nenyimbo yaye ara kabere. Amache agasoka amange mono, na omoganda oria okanywane chitugo chiabo chikanywa boigo.
12Omonene agatebia Musa na Haroni, “Ekiagera inwe motanyegenete na koorokia ase amasio ’Abaisraeli ng’a inche nomochenu inde, timokoraa na goikia omosangererekano oyio ase ense eria ebe eyabo. 13Aya naro amache a Meriba#20:13 Meriba, rora Okong’ 17:7 aase Abaisraeli baamereranetie n’Omonene, na ere akeorokia ng’a nomochenu are ase egati yabo.”
Omoruoti o Edomu okwanga koa Abaisraeli ribaga baete ase ense yaye
14Musa agatoma abanto korwa Kadeshi gochia ase omoruoti o Edomu bamotebie, “Amang’ana aya naro intwe Abaisraeli bamino togoteba: Nomanyete emechando yonsi yatonyorire, 15buna chisokoro chiaito chiagendete ase ense ya Misiri, chikamenyao emiaka emenge. Abamisiri bagachichanda ase obotindi obobe, bagatochanda naintwe. 16Ekero twarerete ase Omonene, ere akaigwa ebirero biaito, agatoma omomalaika agatorusia korwa ase ense ya Misiri. Bono nao tore aiga Kadeshi, omochie ore ase orobebe kegima rw’orogongo rwao. 17Koranche otoe ribaga toete ase egati y’ense yao. Titokogobera gochia ase emegondo y’endagera, gose ey’emesabibu, gose titokonywa amache korwa ase chinsoko chiaino. Intwe nigo toraete ase enchera enene yoka, titokogobera gochia ensemo ya borio, gose eya bomosi, goika tobe twaetanirie ense yao.”
18Korende omoruoti o Edomu akamoiraneria, “Timobaisa goeta ase egati y’ense yane; moise goeta, nigo ndabarwanie esegi imbaite nemioro.”
19Abaisraeli bakamotebia, “Intwe nigo toraete ase enchera enene yoka, na gatoranywe amache ao, intwe gose chitugo chiaito, rirorio natoakane amache ayio. Toe ribaga toete rioka namagoro, titokogania gento kende goetania ekio.”
20Abaedomu bakairaneria naende, “Timori ne ribaga goeta ase ense yaito.” Bagacha nabarwani barenge ne chinguru gocha korwania Abaisraeli. 21Ekiagera Abaedomu barinete Abaisraeli ribaga goeta ase ense yabo, Abaisraeli bakarua asebare, bagaeta ensemo eng’ao.
Ogokwa kwa Haroni
22Omoganda bwonsi bw’Abaisraeli okarua Kadeshi, okagenda ogaika egetunwa kia Hori. 23Agwo ase egetunwa keria kia Hori, ase orobebe rw’ense ya Edomu, Omonene agakwana na Musa na Haroni, akabatebia, 24“Haroni nakwe, asangererekane amo nabanto baye. Ere tagosoa ase ense eria naeire Abaisraeli, ekiagera inwe babere mwasaretie, timwanyigwera buna nabachigete agwo ase amache a Meriba. 25Ira Haroni na Eleazari, momura oye, igoro ase egetunwa kia Hori. 26Orusie Haroni chianga chiaye chi’obokuani, ochibekere Eleazari, momura oye. Haroni ere nakwe, na asangererekane amo nabanto baye, ekero more aaria.” 27Musa agakora buna Omonene amochigete. Barabwo bagatiira gochia igoro as egetunwa keria kia Hori, ekero omoganda bwonsi origereretie. 28Musa akarusia Haroni chianga chiria chi’obokuani, agachibekera Eleazari, momura o Haroni. Haroni agakwera ase egetunwa keria, na Musa na Eleazari bagatirimboka korwao. 29Ekero abanto b’omoganda bw’Abaisraeli baroche ng’a Haroni okure bakamoreera ase engaki y’amatuko emerongo etato.
Currently Selected:
OMOBARO 20: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
