OMOBARO 19
19
Ribu ri’eng’ombe embariri
1Omonene agakwana na Musa na Haroni, akabatebia, 2“Oyo noro omoroberio inche Omonene nachikire: Tebia Abaisraeli ng’a barente eng’ombe eaberi embariri etari na kemocho ase omobere oye, naende etana kobekerwa rikorogoto ase ogokorigwa emeremo. 3Orente eng’ombe eria, oyee Eleazari omokuani; na eng’ombe eria eirwe isiko y’egetwori, erio enyenyerweo ase obosio bwaye. 4Eleazari atobeke ekiara kiaye ase amanyinga ’eng’ombe eria, ayanyororokerie ara gatano na kabere bosio bw’Eema y’Omosangererekano. 5Erio chinyama chi’eng’ombe eria, chisamberwe ase obosio bwaye amo ne riiyo na amanyinga, na esike. 6Erio omokuani abogorie oroko rw’emecharake na orosagia rwa hisopo, na eusi embariri, erio abirute aseomorero oria ogosamba eng’ombe eria. 7Erio omokuani asibie chianga chiaye, esibie nomobere namache. Ekero akoorire gokora bo achiche ase egetwori, ere nabe oyotachenegeti goika omogoroba oyio. 8Na omonto oria ogosamba eng’ombe eria goika asibie chianga chiaye, esibie nomobere namache, ere nabe oyotachenegeti goika omogoroba oyio. 9Omonto ochenegete abuuche ribu ri’eng’ombe eria, erio ariumore isiko y’egetwori, aase achenire. Ribu erio rigachwe agwo ase engencho y’omoganda bw’Abaisraeli ase ogokorerwa emeremo y’ogochena amache akonyororokigwa ase okorusia ebibe. 10Omonto oria orabuuche ribu riria, asibie chianga chiaye, nere nabe oyotachenegeti goika omogoroba oyio. Oko nakwo ogochika koragenderere botambe ase Abaisraeli na ase omomenyi omenyete ase egati yabo.
Ogokuna omobere bw’omonto okwete
11“Monto onde bwensi orakune omobere bw’omonto okwete, nabe oyotachenegeti ase amatuko atano na abere. 12Ase rituko ria gatato, naende ase rituko ria gatano na kabere, omonto oria goika esibie namache, nabe ochenekire; korende onye tagwesibia ase amatuko aya abere takoba oyochenekire. 13Monto onde bwensi orakune omobere bw’omonto okwete, korende tesibia, igo agokora Obomenyo bw’Omonene bobe obotachenegeti. Omonto oyio aatananwe korwa ase Abaisraeli, ekiagera amache aria ay’okomochena taumoiri asare; ere agenderere koba oyotachenegeti.
14“Oko nakwo ogochika: Omonto onde bwensi orasoe eema eria omonto akwereire ime yaye, na omonto onde bwensi ore imeo, nabe oyotachenegeti ase engaki y’amatuko atano na abere. 15Egekorero kende gionsi kere ase eema eria ime, getabwati egekuneko, korende kere giasie, kiabeire egetachenegeti. 16Omonto onde bwensi oranyore omonto oitirwe nomoro orosana ime, gose okwete ogokwa konde gwonsi, na amokune, gose akune riuga ri’omonto okwete, gose oboina, omonto oyio nabe oyotachenegeti ase engaki y’amatuko atano na abere.
17“Ekiagera babeire abatachenegeti, nabaimokie ribu ike ri’ekeng’wanso ki’ebibe, keria giasambirwe, na kobeka amache amaya a rooche igoro ye ribu riria. 18Erio omonto ochenegete aimokie orosagia rwa hisopo, arotobeke ase amache ayio ime, erio anyororokerie eema na ebinto bionsi bireo, amo nabanto barenge imeo. Naende anyororokerie omonto oria okunete riuga, gose okunete omonto oitetwe, gose oyokwete bweka, gose oboina. 19Ase rituko ria gatato, na ase rituko ria gatano na kabere, omonto ochenegete anyororokie amache ase oria otachenegeti. Ase igo ase rituko ria gatano na kabere namochene; ere oria ogochia gochenwa nasibie chianga chiaye, esibie nomobere namache, na ase engaki ya mogoroba nabe ochenekire.
20“Omonto obeire oyotachenegeti, nere tancheti gwesibia, arusigwe ase omosangererekano bw’abanto. Ere okorire Aase Aachenu y’Omonene babeire atachenegeti, ekiagera amache aria ay’okomochena tanyororokeretigwe asare; ere nigo are oyotachenegeti. 21Oko nakwo ogochika kwa botambe asebare. Omonto oria okonyororokeria amache aria ay’ogochena asibie chianga chiaye, na omonto onde omoao karakune amache aria, nere nabe oyotachenegeti goika omogoroba oyio. 22Egento kende gionsi omonto oria otachenegeti arakune nakerokio nakebe egetachenegeti. Omonto onde bwensi orakune egento keria nabe oyotachenegeti goika omogoroba oyio.”
Currently Selected:
OMOBARO 19: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
