OMOBARO 18
18
Emeremo y’Abakuani na Abalawi
1Omonene agatebia Haroni, “Aye na abamura bao amo nabanto b’eamate yaino nigo morabarerwe okomocha konde gwonsi korabe kogokorerwa ase obokoreri ime y’Aase Aachenu, naende aye na abamura bao inamobarerwe okomocha konde gwonsi korabe kogokorwa ase obokuani bwaino. 2Renta Abalawi bamino, egesaku gia iso, barabwo bakore emeremo aroro amo naye. Abwo bagokorere aye amo nabamura bao, ekero mogokora emeremo agwo bosio bw’Eema eria ere noborori. 3Barabwo nabagokorere, naende bakore emeremo yonsi ase Eema eria, korende tibabaisa goika ang’e ase ebikorero ebichenu bi’Aase Aachenu, gose tibaika ang’e ase egesasimero. Baise gokora igo, aye amo nabarabwo igo morakwe. 4Nigo barabwatane naye na gokora emeremo yabo yonsi y’obokoreri ase Eema y’Omosangererekano. Omonto onde omoao otachikiri tabaisa goika ang’e akore emeremo amo nainwe. 5Aye amo nabamura bao, ninwe mweka morakore emeremo ime y’Aase Aachenu na ase egesasimero, erio nario endamwamu yane etabaise koba igoro y’Abaisraeli naende. 6Ninche nachorire Abalawi bamino korwa ase Abaisraeli, babe ekeegwa asemore. Barabwo baatananirwe asende inche Omonene, bakore emeremo ase Eema y’Omosangererekano. 7Aye amo nabamura bao, ninwe mweka morakore emeremo yonsi y’obokuani, na emeremo yonsi ase egesasimero, na eria ere moino y’etoto enachete Obomenyo Obochenu. Nabaeire obokuani buna ekeegwa kebe ekiaino. Onye omonto onde omoao otachikiri ogocha ang’e ase obokoreri obwo, goika aitwe akwe.”
Ebitari bi’abakuani
8Omonene agatebia Haroni, “Rora, nakoeire okoruegwa konde gwonsi gokoruegwa asende, obe gokorenda. Ebinto bionsi ebichenu Abaisraeli bakorua, ebio nakobieire bibe egetari kiao amo neki’ororeria rwao kogenderera botambe. 9Ase ebinto bire ebichenu mono, ebiratigare, bitari gosambwa nomorero, ebirabe ebiao, nabio ebi: Kera okoruegwa kw’endagera, na kera ekeng’wanso ki’ebibe, na ekeng’wanso gi’okorongeyia okomocha. Ebinto bionsi barabwo barabe bakorua asende, nabibe ebichenu mono asore, na ase abamura bao. 10Noriere ebinto ebio aase gete are aachenu mono. Kera omonto omosacha ore asemore nanyare koria ebinto ebio. Ebio nebinto ebichenu asore.
11“Boigo nakoeire okoruegwa Abaisraeli barabe bakorenta asende buna ebing’wanso bi’ogosungusia. Nakoeire aye amo nabana bao, abamura na abaiseke, nabibe ebiaino kogenderera botambe. Kera omonto ochenegete ore ase enyomba yao nanyare koria ebinto ebio.
12“Nakoeire kera ekere ekiya mono ki’ogotongora oko Abaisraeli bakondetera: Amaguta ’amazeituni, na edivai, na endagera. 13Okwama gwonsi kwe ritang’ani ase ebinto bionsi bigokina ase ense yabo, okwo bakondetera, nakobe okwao. Kera omonto ochenegete ore ase enyomba yao nanyare koria ebinto ebio.
14“Kera egento Abaisraeli baatananire asende nakebe ekiao.
15“Kera omwana omotangi bakorua asende nabe oyoo, na kera eng’iti entangi boigo, korende nonya naboigo bwanche embooria ase omwana omotangi o mwanyabanto, na ase chintangi chie ching’iti chiria chitachenegeti. 16Abana baboorigwe ekero bakoorire omotienyi oyomo, ne ching’iti boigo. Aye nobeke rigori ri’okobooria, ribe chisekeli isano chie chifeta, koreng’ana nesekeli egokorerwa ase Obomenyo Obochenu. (Esekeli eyemo nechigera ibere.) 17Korende ching’iti chintangi chie chiombe, gose ching’ondi, gose chimbori, tichikoboorigwa. Echio nchiatananwe asende. Amanyinga abo oyanyororokereria igoro ase egesasimero, na ebitinya biabo obisambe bibe ekeng’wanso kegosambwa nomorero kere ne rimisu rikongwenera. 18Korende chinyama chiabo amo ne ritaana rigosungusigwa, na ekenama kia borio, echio nachio echiao.
19“Ebiegwa bionsi ebichenu Abaisraeli barandetere inche Omonene nakobieire aye amo nabana bao, abamura na abaiseke, bibe ebitari biaino kogenderera botambe. Okwo nokobwatana kw’ogotianania kw’omonyo gwa kare na kare ase obosio bwane inche Omonene, okwo nakorire naye na ororeria rwao.”
20Naende Omonene agatebia Haroni, “Aye tokonyora omwando bw’orogongo ase egati y’Abaisraeli bande. Tokoegwa ensemo ende yonsi ase egati yabo. Inche ninche ensemo yao, naende omwando oo, ase egati y’Abaisraeli.
Egetari ki’Abalawi
21“Naeire Abalawi ensemo ya ikomi, eye Abaisraeli bakorua, ebe eyabo, ebe eng’eria ase emeremo eye barabe bagokora agwo ase Eema y’Omosangererekano. 22Korwa bono na kogenderera Abaisraeli bande tibabaisa goika ang’e n’Eema eria. Baise gokora bo, nigo barabe nebibe, erio bakwe. 23Korende Abalawi barabwo nigo barakore emeremo ase Eema y’Oniosangererekano, okomocha kw’ebibe gokorabeo nakobarwe igoro asebare. Okwo nakwo korabe ogochika asebare kogenderera ebiaare ase ebiaare. Barabwo tibakoba nomwando ase egati y’Abaisraeli. 24Ensemo ya ikomi eye Abaisraeli bakondetera buna okoruegwa kwabo nayeire Abalawi ebe eyabo. Ase ayio, nabatebirie ng’a tibakoba nomwando ase egati y’Abaisraeli bande.”
Ensemo ya ikomi y’Abalawi
25Omonene agakwana na Musa, akamotebia, 26“Kwana n’Abalawi, obatebie: Ekero mokonyora ensemo ya ikomi korwa ase Abaisraeli, eria Omonene abaeire ebe eyaino, erio morusie ensemo ya ikomi y’okoruegwa okwo, moyerentere Omonene. 27Okoruegwa okwo inwe morarue, nigo korabarwe asemore buna nokoruegwa kw’endagera korwa ase ebiooreri biaino, na okw’edivai na amaguta korwa ase ekemitero, okwo abande bakorua. 28Ase enchera eye nainwe morentere Omonene okoruegwa kwaino, okwo mokorusia korwa ase ensemo ya ikomi eria mokonyora korwa ase Abaisraeli. Na okoruegwa okwo gw’ensemo ya ikomi okore kw’Omonene, moe Haroni omokuani. 29Korwa ase ebiegwa ebio bionsi moranyore korwa ase Abaisraeli, mwatananere Omonene biria bire ebiya mono. 30Ase ayio otebie Abalawi: Ekero morabe mwarure ebinto ebiya mono korwa ase ensemo ya ikomi eria, erio ebinto ebio nigo birabarwe asemore, inwe Abalawi, buna okoruegwa kwaino kw’endagera, na okomitwa kw’edivai, na okw’amaguta. 31Inwe amo nabanto be chinka chiaino namoriere ebinto ebio aase aande onsi, ekiagera eyio neng’eria yaino moraakanwe ase emeremo mogokora agwo ase Eema y’Omosangererekano. 32Ekero mwarure ensemo engiya kobua korwa ase okoruegwa okwo, timokoba nokomocha ase okoria eria entigari. Timobaisa gokora ebinto ebichenu bi’Abaisraeli bibe ebitachenegeti, erinde timokwa.”
Currently Selected:
OMOBARO 18: EKEGUSIIBBLE
Highlight
Share
Compare
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
