AYUBU 9
9
Ayubu okoiraneria ogokwana kwa Bilidadi
1Erio Ayubu akairaneria, akabora:
2“Ekeene, namanyire ng’a ayio nabo are,
korende naki omonto aranyare koba omonyaboronge ase obosio bwa Nyasae?
3Omonene karaamereranie nomonto amang’ana elifu eyemo,
omonto takonyara komoiraneria nonya nerimo.
4Omonene nigo are nobong’aini ase enkoro yaye, na omonyene chinguru,
monto ki oratoorigwe onye takomoigwera?
5Ekero Omonene akoba nendamwamu nigo akoonchorana ebitunwa,
obitigeria korwa aase abo, na abanto tibari komanya ayio.
6Nigo agotengechia ense yarwa aase aye,
erio chintenenero chiaye chianyegerigwa.
7Nigo agochika erioba tirigosoka;
ne ching’enang’eni ochibeka ekemanyererio.
8Nere bweka oramborete igoro chionsi, agachiaara,
nere ogotaara igoro ase emerindo y’enyancha.
9Nyasae nere otongete egetuse gie ching’enang’eni gekorokwa Edubu.
Na ekende gekorokwa Orioni,
na ekende gekorokwa Abaiseke batano na babere bamwabo,
na ebinde Amakundia a irianyi.
10Nigo agokora amang’ana amanene aetanetie obomanyi bwonsi,
na amakumia amange atari kobareka.
11“Rora! Ere nigo akong’ika ang’e oeta, tinkomorora;
nigo akong’etania, tinkomomanyereria.
12Ere nigo akoira eki aganetie.
Ning’o oranyare komotanga?
Ning’o oranyare komoboria ng’a ninki ekio agokora?
13Nyasae tari gotigeria endamwamu yaye,
abanto abagokonya Rahabu,#9:13 Rahabu: eng’iti enene y’enyancha etenenerete chinguru chi’obotantanu na obobe
nigo bagotung’ama inse asare baumama.
14Naki rende ndakore imanye gochora amang’ana agwenerete,
erinde inyare koiraneria Omonene.
15Nonya inche nare koba tindi nokomocha, tinarenge komoiraneria;
nigo narenge gosaba amabera korwa ase omonsoeri.
16Onye narenge komorangeria, na ere ang’itabere,
rirorio tinarenge kwegena ng’a nategererete eriogi riane.
17Ere ong’akire nomwaga ore nomoubera,
na omentire amaote aane ngencho ende etaiyo.
18Tang’eti ribaga nkoeyanera,
korende omenteire obororo obonge mono.
19Onye namang’ana e chinguru, rora ere nigo are ne chinguru.
Onye igoro y’oboronge, monto ki oranyare koamererania nere?
20Nonya nare koba omonyaboronge,
amang’ana ngokwana nigo are kongambia;
nonya nare koba ng’a tindi na komocha,
aya nigo are kombera kirori ng’a nomokori amabe inde.
21Inche tindi na komocha.
Tingochandekera obogima bwane;
tinkobara obogima bwane ng’a negento.
22Mang’ana taiyo. Ase ayio nigo ngoteba:
Ere nigo agosiria omonyaboronge na omokori amabe amo.
23Ekero ebiku bikorenta amakweri a mobosokano,
na abanto batari na komocha banyorwe namaakwa,
ere nigo akobachecheria.
24Ense nigo ebekire inse y’amaboko ’abakori amabe,
Nyasae otubire amasio ’abagambi ebina.
Onye tari ere, ning’o rende okorire ayio?
25“Amatuko aane nigo agoeta bwango kobua omominyoki okominyoka;
nigo akoera bwango, tari korora maya ande.
26Ee, nigo agoeta bwango buna obwato obonyerere bw’ebirigisa,
buna ensoti egotaboria ebiekoria biaye.
27Inse goteba ng’a nyebe ogwechanda kwane,
na ntige omoichano one inyeremie,
28nigo ndabe nobwoba igoro y’emechando yane yonsi,
ekiagera nimanyete ng’a aye goika ombare ng’a nomomochi inde.
29Inche goika mbarwe ng’a nomokori amabe inde.
Nase ki rende ngwechanda nemeremo ere bosa?
30Ninsa gwesibia namache arabete buna amagena ’embura,
na goisaba nesabuni,
31nigo orantugute ime ase engoro,
ne chianga chiane chigechigwe ase engencho yane.
32Nyasae tari omonto buna inche, erinde imoiranerie,
na ngende nere ase ekegambero.
33Monto onde tari orabe omogayani oito,
oyio oratogambie inche nere.
34Tiga ere arusie enyimbo yaye korwa asende;
okogosa kwaye tikobaisa kong’ondokia.
35Erio inyare gokwana ntari nobwoba ase engencho yaye,
nimanyete ng’a tindi nokomocha.”
Currently Selected:
AYUBU 9: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
