AYUBU 8
8
Bilidadi ogokwana
1Erio Bilidadi Omosua akairaneria, akabora:
2“Ngoika ririri orabe kogokwana amang’ana aya,
na amang’ana ’omonwa oo abe buna omwaga omonene?
3Inee! Nyasae nanyare koonchorana ekeene?
Gose Omonguru naonchorane ayare ay’oboronge?
4Onye abana bao bakorete ebibe asare,
ere obaeire egesusuro ase engencho y’okomocha kwabo.
5Korende aye korarigie Nyasae
na gosaba ase oboitongo ere oyore Omonguru,
6korabe oyochenegete na ore nenkoro endonge,
ekeene, rirorio ere nagochandekere,
nakoroiserie obomenyo, na oboronge bogenderere kobao.
7Eki kwabwate ritang’ani kerorekane kere egeke,
koreng’anigwa neki oramenterwe nyuma.
8“Korende boria omanye ay’ebigori bia kare,
bweigwere aya chisokoro chiao chianyorete.
9Intwe nigo tonga buna abaiborwa igoro totamanyeti kende,
naki amatuko aito tomenyete ase ense nigo anga buna omorengari ogosira.
10Inee! Amang’ana ’obong’aini chisokoro chiria chiakwanete,
takonyara gokworokereria, erinde bwegere?
11“Inee! Amauncho nanyare komera ase entente etari?
Gose ebitonto nabimere ase amache atari?
12Ekero bigendererete gosicha, engaki y’okobitema etaraika,
nigo birasusane bitige ebimeri binde.
13Naboigo nabanto bonsi abebire Nyasae bakoba,
ogosemeria kw’omonto otamoirogeti Nyasae nagosire.
14Aya asemeretie nasirigwe kegima,
na aya egenete nigo are buna enyomba y’oronyambobe.
15Ere nigo agwesiirera ase enyomba yaye,
korende tekogenderera gotenena,
nigo ayesemeretie, korende tekogenderera kobao.
16“Nabo akoreereta buna ekemeri kere ase omobaso,
ekio gekoranda ase omogondo bwonsi;
17emeri yaye nigo egwesiserania ase etui y’amagena;
buna eyekwemigereria ase egati y’amagena ’egetare.
18Geise gosirigwa korwa aase aye,
aase aria nigo aragekanie ng’a tana gokerora.
19Ee, oyio noro omogoko ere abwate ase obogima bwaye,
naende abande mbache babe ase ribaga riaye.
20“Rora, Nyasae takonyara kwanga na gotiga omonto omoikeranu;
gose tagokonya abakori amabe.
21Ekeene, nagoichorie namaseko,
na omonwa oo otere nomochengo.
22Abanto abakogechete mbarenterwe obosooku,
na obomenyo bw’abakori amabe tibokogenderera kobao.”
Currently Selected:
AYUBU 8: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
