AYUBU 39
39
Omonene ogendererete gokwana
1“Inee! Nomanyete chingaki ekero chimbori chi’orosana chikobiara?
Gose ekero chinsune chikobiara?
2Nonyare komanya omobaro bw’emetienyi chigokoora,
naende nomanyete chingaki chikobiara?
3Nigo chigwekumba chiabiara chimanwa chiabo,
na ekero chiabiarire, obororo bw’okobina bwasira.
4Chimanwa chiabo nigo chikoba ne chinguru chiakinera ase orosana.
Nigo chikogenda kegima, tichiri koirana.
5“Ning’o otigire etigere y’orosana esiboire?
Gose ning’o bwororobirie ebisibo bi’etigere ere enyango?
6Inche nayeeire ekerubo ekiomo kebe enka yaye,
na ense ere nomonyo, emenyeo.
7Ero nigo egochaya eriogi rire ase omochie,
teri koigwa okwoga kw’omotemi onde bwensi.
8Nigo ekona‐kogenda aaria na aaria ase ebitunwa ekorisia,
yaba ekorigia kera ekemeri ekebese.
9“Inee! Eng’era nayanche egokorere emeremo?
Nenyare korara ase obweri bwao botuko?
10Inee! Nonyare koyesiba ne chingori eete ase emeng’ororia ye chintinde?
Gose ebutorane chintinde ase rikura riao?
11Inee! Noyesemerie ekiagera ere ne chinguru chinyinge?
Nonyare gotiga emeremo yao, ng’a ero ekoyekorere?
12Inee! Nigo oyiegenete ng’a neirane
na ekorentere endagera ase ekeooreri kiao?
13“Esagero nigo egosamunsa chimbaba chiaye chioga;
korende, Inee, chimbaba echio nchibwate obwanchani?
14Esagero eaberi nigo egotiga amagena aye ase amaroba ime
anyora riberera korwao.
15Ero nigo ekoyeba, tekomanya ng’a naatwe namagoro,
naende ng’a gose eng’iti y’orosana neyatache.
16Nigo ere entindi mono ase ebichuchu biaye,
yabikorera biaba buna mbitari ebiaye;
teri gwechandera oroiboro rwaye,
17ekiagera Nyasae nigo ayerinete obong’aini,
gose tayeete okomanya.
18Ekero ekoimokerera igoro, egwesamunsa eminyoke,
nigo egosekerera ebarasi na oyo oyeriinete.
19“Inee! Naye okoa ebarasi chinguru?
Naye oboetie ebigoti biaye namanya?
20Naye oyeete chinguru egocharokera buna engige?
Eriogi egochuria nigo rire ri’okoirokia.
21Nigo egokura‐kura riroba ase ense omweya, yagokera chinguru chiaye.
Erio yaminyoka koumerana nabare nebirwanero bi’esegi.
22Ero nigo egosekerera obwoba, teri koondokigwa na kende;
gose teri koonchoka etame korwa ase emioro.
23Chinsara nigo chikorutwa chiaba chikwoga goeta igoro yaye,
na amatimo akomesa, ne chisimisi boigo.
24Nigo egotitiria riroba ere nobotindi na ekeririanda,
gose teri gotegerera ekire, ekero egetureri gekobugigwa.
25Ekero egetureri gekobugigwa, nigo ekwana eriogi riaye ri’okoega‐ega.
Nigo ekoigwa omonyonko bw’esegi korwa aare,
na buna abachiki b’esegi bagochika, na okwoga gw’esegi.
26“Inee! Nobong’aini bwao bokogera ekebaki kiairuruka igoro,
naende kiarambora chimbaba chiaye koiruruka gochia irianyi?
27Inee! Naye ogochika ekeongo kiairuruka gochia igoro,
kiaagacha egeswa kiaye aase a igoro mono?
28Ekeongo nigo gekomenya ase egetare;
ase omwenya bw’egetare, aase gekonyora oborendi obuya.
29Korwa aaria igoro nigo kegotengera ebi kegotwara,
amaiso aye nigo akobirora korwa aare.
30Amage aye nigo akonywa amanyinga,
na aase emebere ekwete ere, nao ekeongo kere.”
Currently Selected:
AYUBU 39: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
