AYUBU 38
38
Omonene okoiraneria Ayubu
1Omonene akairaneria Ayubu korwa ase ekembugu‐mbugu ime, akamotebia:
2“Aye naye ng’o okorenta omosunte ase ogosemia
ase ogokwana amang’ana atari ay’obong’aini?
3Tenena okong’e buna omosacha,
inche ninkoborie, naye ong’iranerie.
4Ng’ai kwarenge ekero nabegete oboroso bw’ense?
Ntebie onye aye kore omong’aini.
5Ning’o obegete ebirengo biaye? Ntebie onye komanyete.
Gose ning’o oramborete engori y’okoyerenga?
6Ng’ai amaroso aye aterekereretwe?
Gose ning’o obegete rigena riaye ri’ekoona,
7ekero ching’enang’eni chia mambia chiaterete amo,
na abana bonsi ba Nyasae baagete eriogi ri’omogoko?
8“Ning’o osiegete ebisieri bi’enyancha, ekero yarindoretie buna
ndiria yarenge ime ase enda y’ense?
9Ekero keria naroisetie amare abe chianga chiaye,
na nkayeboyia omosunte ekerima,
10naende nkabekera enyancha chimbebe chiaye,
boigo nkayebekera emekorogoto na ebisieri,
11ngateba: Aa nao oraikere, korende togoetania,
naiga nao emerindo yao eimokererete igoro eratangerwe.
12Inee! Ase obogima bwao bwonsi kwana gochika emambia ebeo?
Kwana kworokia amasase a mambia aase akomoreka,
13erinde ense yonsi ekiamoke, ebwatwe ase chinsinyo chiaye,
na abakori amabe banyegerigwe barueo?
14Ense nigo ekoonchorwa yarorekana buna amaroba abeire inse y’ebonyi ere nekemanyererio,
na ebinto bionsi nigo bikororekana buna chianga chire nebieni ao ao.
15Oborabu nigo bogotangwa korwa ase abakori amabe,
ne chinguru chiabo chi’okweenenia nigo chikobunwa chiasirigwa.
16“Inee! Kwana gosoa ime ase chinsoko chi’enyancha,
gose kwana gotaara ase enkoro ye chindiba?
17Kwana kworokigwa ebiita bi’amakweri,
gose korora ebisieri bi’ekiriri ki’amakweri?
18Kwana korengereria igoro y’obogare bw’ense?
Onye komanyete ayio onsi, yararie!
19“Enchera ekogenda ase oborabu bore, ng’ai ere?
Nomanyete ase omosunte omenyete,
20erinde ogende oyoire ase ribebe riaye?
Naende nomanyete ebinchera bigochia ase enyomba yaye?
21Ee, aye nomanyete, ekiagera nigo kwaiboretwe kare,
na emiaka yao nemenge.
22“Inee! Kwana gosoa ime ase ebigachero bi’obokeng’entu,
gose ebigachero bi’amagena ’embura?
23Amagena ayio ngachete goika ase engaki y’emechando,
amatuko aria arabe ay’esegi na okorwana konde.
24Inchera ki ekogenda aase oborabu bokoruerwa,
gose ekogenda aase omwaga okorwa moocha bwesiarera ense yonsi?
25“Ning’o oremete omotaro ase chiooro chi’embura chigoeta,
gose enchera ase chinkoba chikogukura goeta,
26echio chikogera embura yatwa aase monto atamenyeti,
ase erooro monto ataiyo?
27Embura eyio nigo ekoigotia ense ere bosa etamenyiri,
yagera yamera obonyansi.
28Inee! Embura nebwate ise?
Gose ning’o okoibora amatoima e riime?
29Nkorwa ase enda ya ng’o obokeng’entu bokorwa?
Ning’o okoibora obokendu bokorwa igoro?
30Amache nigo akobwatana oma pa buna rigena,
ne chinyancha chioma pa chiaba buna egetare.
31“Inee! Nonyare gosiberania egetuse gie ching’enang’eni gekorokwa Abaiseke batano na babere bamwabo?
Gose bwororobie egetuse keria gekorokwa Orioni?
32Nonyare koraa ching’enang’eni chioroke ase chingaki chiabo?
Gose nonyare koraa egetuse gie ching’enang’eni gekorokwa Edubu ne chimanwa chiaye?
33Nomanyete emeroberio ya igoro echikire?
Nonyare koroberia okogamba kwabo igoro ase ense?
34“Nonyare goaka eriogi riao riike ase amare
ogere embura enyinge egotwere?
35Nonyare gotoma chinkoba chigende aase gete,
erio chigotebie: Ee, nao tore aa?
36Ning’o okobeka obong’aini ase enkoro ime,
gose okomanya ase omoyo ime?
37Ning’o oranyare koba nobong’aini abare amare?
Gose ning’o oranyare koberereka chinyongo chi’amache chia igoro,
38ekero riroba riabwatanire riomire pa,
na amagakara abwatanire amo.
39“Inee! Nonyare gotwarera endo ebi ekoria,
gose koigotia chindo chinsae chiganetie endagera,
40ekero chire ase amakuruma abo chieringanetie ase okoboera,
gose gochiramaime agwo ase chiebisete?
41Ning’o okoa ekegonkoru endagera yaye,
ekero amage aye akorera ase Nyasae
na goetanana onsi korigia endagera?”
Currently Selected:
AYUBU 38: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
