AYUBU 37
37
Elihu ogendererete gokwana
1“Ayio nigo akogera enkoro yane yaiguswa,
yatuma gocha ase omoyo.
2Tegerera oigwe okogukura kw’eriogi riaye,
na okoruma gokorwa ase omonwa oye.
3Nigo agotoma okoruma okwo korwa igoro gocha ase ense yonsi;
okomesa kwaye gwe chinkoba nigo kogochera chinsinyo chi’ense.
4Erio eriogi riaye rikoruma,
ere nigo akogukura neriogi ri’obonene,
gose tari gotanga okomesa ekero eriogi riaye ri’okogukura riaigurwe.
5Nyasae nigo akogukura neriogi riaye ase enchera y’ogokumia mono,
nigo agokora amang’ana amanene, ayio totanyare komanya.
6Ere nigo agotebia amagena ’embura: Kagwe igoro ase ense;
na otoma omonyirira na embura enene ere ne chinguru.
7Nyasae nigo agotanga emeremo y’amaboko a kera omonto,
erinde abanto bonsi banyare komanya emeremo yaye.
8Erio ching’iti chi’orosana chiagenda kwebisa,
chiagenderera kobeera ase amakuruma abo.
9Ekembugu‐mbugu nigo kegosoka korwa ase chiero chiaye agwo irianyi,
na omwaga ore nobokendu orua sugusu oseria amare.
10Nyasae nigo akorua omoika bw’obokeng’entu obwatania amache,
na amache oyarenta abwatana oma pa.
11Nigo agoichoria amare amarito namache,
amare nigo agosiarera chinkoba chiaye.
12Amare nigo agoetanana gochia aaria na aaria, akoraawga nere,
goikerania aya onsi ere achikire akore ase ense.
13Nyasae nigo agokora ayio aba bo,
ase okorua ebisusuro bi’okorongeyia,
gose ase engencho y’obwanchani bwaye.
14Aye Ayubu, igwa aya;
karategerera, orengererie igoro y’emeremo y’ogokumia ya Nyasae.
15Inee! Nomanyete buna Nyasae agokora ochika ayio,
naende buna agokora okomesa kwamoreka goetera ase amare,
16Inee! Nomanyete buna areng’anetie amare,
eyio ere emeremo y’ogokumia y’oria ore nobong’aini oboikeranu?
17Inee! Nomanyete egekogera chianga chiao chigosamba ne riberera,
ekero ense egotoererigwa nomwaga okogusa korwa irianyi?
18Inee! Nonyare korambora igoro buna ere ayeramborete,
igoro eria ere enkong’u buna ekerore gi’ekioma?
19Tworokererie aya togochia gokwana asare;
titokonyara konyora amang’ana togochia gokwana,
ekiagera tore ase omosunte.
20Inee! Nyasae nigo agochia gotebigwa ng’a inche ninganetie gokwana?
Onde nare oganetie ere amosirie?
21“Abanto tibakonyara korigereria amasase ’erioba,
kabarire igoro ekero amare abusirwe nomwaga.
22Oborabu bokomeka‐meka nigo bokorwa sugusu;
ee, Nyasae nigo eboetie nobonene bw’ogosikwa gw’okoondokia.
23Oyio Omonguru, intwe titokonyara komorora buna are;
nigo abwate okobua okonene, naende nigo are omonyene ekeene,
ere nigo are omonyene oboronge mono, takorega onde.
24Ase ayio mwanyabanto nigo bamoirogete;
ere tari gosika oyokwerengereria ng’a nomong’aini are.”
Currently Selected:
AYUBU 37: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
