AYUBU 36
36
Elihu ogendererete gokwana
1Elihu akagenderera gokwana, akabora,
2“Indemereria ake igo, inche nkworokie amang’ana;
nimbwate ring’ana ngokwana korwa ase Nyasae.
3Inche nindusie chisemi chiane korwa aare,
ing’orokie ng’a Omotongi one nere omonyene oboronge.
4Ekeene, amang’ana aane tari ay’oborimo;
inche oyo nteneine aiga amo naye nomoikeranu inde ase okomanya.”
5“Rora, Nyasae nigo are Omonguru, ere tachayeti onde;
nigo are nokobua ase chinguru na obong’aini.
6Ere tagotiga omokori amabe agenderere koba moyo,
korende nigo akoa abachandire oboronge bwabo.
7Tari gotiga korigereria abanyene oboronge,
korende nigo akobabeka amo nabaruoti ase ebirogo bi’obonene.
Ee, nigo akobakinia bagenderera kobeera aroro,
8na onye bagosibwa chingataare na baba bare ase emechando,
gose kobwatwa ase emeeto y’emechando,
9Nyasae nigo akobaorokeria aya bakorire, na ogosaria kwabo,
naende ng’a nigo bare abaenenu.
10Nigo agotinora amato abo baigwa ogokurerwa,
na obachika baonchoke, batige gokora amabe.
11Kobaraigwere na komokorera,
rirorio mbabe bagoseseneka ase amatuko abo onsi,
naende babe bakwegokia ase obogima bwabo.
12Korende onye tibakoigwera, nigo baraitwe nemioro,
erio bakwe batamanyeti kende.”
13“Abatamoirogete Nyasae nigo bagachete endamwamu ime ase chinkoro chiabo;
barabwo tibari korera barigie bakonywe, ekero Nyasae akobaa egesusuro.
14Barabwo nigo bagokwa ekero bare abake,
obogima bwabo nigo bogosirigwa buna obw’abanyaka.
15Nyasae nigo agotooria abataka goetera ase emechando yabo,
otinora amato abo goetera ase ogokorerwa bobe kwabo.
16Ee, nigo akoebereretie, agakorusia korwa ase chimbanderana,
agakorenta aase aagare, ase komigwa gotaiyo;
boigo chindagera kwabekeretwe emesa nigo chiarenge chinoru.
17Korende bono aye nigo okonacherwa ekina buna eki’abakori amabe,
ekina na ayare ay’ekeene mbikonyore.
18Bono erende, endamwamu tebaisa gokoebereria na kogokora obe omochecheria,
tobaisa gwancha obonge bw’embooria bogosirie.
19Inee! Obotenenku bwao mbonyare kogotanga korwa ase emechando?
Gose okobua kwao ne chinguru chiao mbinyare?
20Tobaisa kogania ng’a obotuko boria boche,
obwo abanto baraitwe basirigwe.
21Bwerende, tobaisa koirana gokora amabe,
ekiagera nigo gwanchire gokora ayio kobua konyora emechando.”
22“Rora, Nyasae nigo agokora amanene ase okobua kwaye.
Inee! Ning’o okworokereria buna ere?
23Ning’o ochikeire Nyasae enchera yaye?
Gose ning’o oranyare komotebia: Aye gwakorire bobe?
24Inyora gotogia emeremo yaye,
eyio abanto babeire bagotera na koyetogia.
25Abanto bonsi bayerorire,
ee, mwanyabanto mbayerigereretie korwa aare.
26Rora, Nyasae nigo are omonene mono, na intwe titomomanyeti;
omobaro bw’emiaka yaye tomanyekaneti.”
27“Ere nigo akong’usa chintonyi chi’amache gochia igoro,
na chirochio chiatwa buna embura chiaba riime.
28Embura eyio nigo egotwa gocha ase ense,
yatwera mwanyabanto ase obonge.
29Inee! Monto onde nanyare komanya buna amare agwesiarera,
gose buna okogukura gw’enkoba gokorua ase obomenyo bwa Nyasae?
30Rora, nigo agosiarera okomesa kwamoetanana,
naende otuba enkori y’enyancha.
31Ase enchera eyio nigo akonachera abanto ekina;
naende nigo akobaa chindagera ase obonge.
32Ere nigo amumegete amaboko aye ase okomesa,
erio ochika goake ase ekerenga kere.
33Ekerundo gi’okomesa nigo gekoraria igoro ya Nyasae,
nonya ne ching’iti nigo chikomanya ng’a ekerundo ngocha kere.”
Currently Selected:
AYUBU 36: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
