AYUBU 28
28
Obong’aini bwa Nyasae tibori komanyekana
1“Ekeene, ribwago ase chifeta chigokunywa korwa ndire,
na aase abanto bagosiberia chitahabu nare.
2Ebioma nigo bigokunywa korwa riroba inse,
ne chitaai nigo chikonyorwa ase amagena ’ebitare anyititorwa.
3Abanto nigo bagotongia chitaya ime aaria, basiria omosunte;
erio baba bakoriga‐rigia amagena ase ebinunchi bire ase omosunte ekerima.
4Abanto nigo bagokunya chingoro chintambe gochia inse.
Abwo nigo bakoba bebirwe nabanto bagotaara igoro ye riroba,
nigo bagotirimbokigwa basung’unaine bairwa aare korwa ase abanto.
5Ase riroba igoro nao endagera ekwama
ime y’ense inse aroro aonchoranwa aba buna omorero ogosamba oonchorana.
6Aroro agwo nao are amagena e rigori rinene akorokwa safiro,
amo namagena e chitahabu.
7Enchera ekogenda aase agwo enyoni ende yonsi egotwara orotwari teyemanyeti,
gose ekebaki tikiana koyerora.
8Eng’iti y’orosana eng’enenu tiyana koyetacha,
gose endo tiyana goetera aroro.
9“Mwanyabanto nigo agokunya egetare ekiomo pa,
erio osensema ebitunwa korwa inse obionchorana.
10Nigo akorema emetaro ime ase ebitare,
na amaiso aye arora aroro kera egento kie rigori rinene.
11Nigo akogita chindooche, oochania amache tagoeta,
erio egento kebisekanete ime, okerenta aase aarabu.
12Korende ng’ai obong’aini boranyorekane?
Na ng’ai okomanya komenyete?
13“Mwanyabanto tamanyeti rigori ri’obong’aini;
borobwo tibori konyorekana ase ense emenyire nabare moyo.
14Chindiba nigo chigokana chiateba: Tibori asende aa,
na enyancha nigo egoteba: Tibori aiga asende.
15Tibokogorwa chitahabu,
gose chifeta tichikorengwa koba rigori riaye.
16Tibokoreng’anigwa ne chitahabu chikorwa Ofiri,
gose namagena e rigori rinene akorokwa oiniki na safiro.
17Chitahabu na ebirore ebiya tibikoreng’anigwa naborobwo,
gose tibokoonchorerigwa nebinto bi’ogwechabera,
biroisirie korwa ase chitahabu chichenire.
18Amakorongote na ebirore bichenire tibigwatorwa.
Rigori ri’obong’aini nigo rire rinene kobua eri’amagena e rigori rinene rikomeka‐meka.
19Topasio, rigena rie rigori rinene rikorwa Etiopia, tirikoboreng’anigwa,
gose tibokoreng’anigwa netahabu echenire.
20“Bono rende, obong’aini ng’ai bokorwa?
Na ng’ai okomanya komenyete?
21Nigo bobisire korwa ase amaiso ’ebitongwa bionsi bire moyo;
ee, nigo botubire chinyoni tichiborora.
22Aase ay’obosareku na amakweri nigo bigoteba:
Intwe twaigure chinkuma chiaye.
23“Nyasae bweka namanyete enchera y’obong’aini,
namanyete aase aye.
24Ere nigo arigereretie goika chinsinyo chionsi chi’ense,
aroche kera egento kere inse y’erioba.
25Ekero Nyasae arengete chinguru chi’omwaga,
na akarenga obonge bw’amache,
26ekero abegete ogochika ase embura,
na akaroisia enchera y’okomesa gw’enkoba,
27nario aroche obong’aini naende akaboraria;
akaboikerania na koboenekia ase abanto.
28“Erio Nyasae agatebia mwanyabanto:
Naama! Okomoiroka Omonene, okwo nakwo obong’aini;
na ogweatanana korwa ase ebibe, okwo nakwo okomanya.”
Currently Selected:
AYUBU 28: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
