AYUBU 29
29
Ayubu ogendererete gokwana
1Erio Ayubu akagenderera gokwana emerabaaro yaye, akabora:
2“Onye ndiria obogima bwane bware koba buna bwarenge ase amatuko a kare,
amatuko aria Nyasae andendete!
3Engaki eria etaya yaye yarenge komorekera omotwe one,
na ase oborabu bwaye nkaba ngotaara ase omosunte.
4Ase amatuko aria nakinete inde ne chinguru,
na obosani bwa Nyasae bwagendererete kobeera ase obomenyo bwane.
5Engaki eria Omonguru nigo arenge amo nainche,
na abana baane nigo bang’etanaine;
6nigo narenge gwesibia amagoro aane namabeere,
emezeituni ekamera ase egetare,
nkanyora chindooche chi’amaguta ’amazeituni.
7Ekero narenge kogenda ase egeita ki’omochie,
goikaransa ase ekerogo kiane agwo ase ekeraario,
8abasae abaare kondora nigo barenge kogobera,
na abanto abagotu batenena konyorokia amasikani.
9Abagambi b’abanto nigo baare gokira tibagokwana,
batuba emenwa yabo namaboko.
10Amariogi ’abagambi nigo arenge gokea,
chimeme chiabo chiabwatana namang’ang’ura abo.
11“Ekero abanto barenge konyigwa, nigo barenge kondoka oyosesenirie,
ekero baare kondora, baba birori asende,
12ekiagera nigo nabete ngotooria abataka abwo barenge korera,
ne chintakana chitabwate onde ogochikonya.
13Ogosesenigwa kw’omonto konya obeire ang’e gosira nigo gwanchicherete,
nkagera ababoraka bagatera nechinkoro chire nomogoko.
14Nigo neboyetie oboronge, naborobwo bogantuba;
ekeene kiane nigo kiarenge buna omwambaro na ekegogwa.
15Ninche narenge eriso ase emeuko,
na okogoro ase ebirema.
16Ninche narenge ise bw’abataka:
na omonto ochandegete ntamanyete, nigo namwechanderete.
17Nigo nabunete chinsea chi’abatari abanyaboronge,
ngatooria korwa ase emenwa yabo abwo konya babwatirwe.
18“Erio nkaba nkorengereria ng’a amatuko aane nigo arabe amange buna omokenye,
erio ngokwa imbe ase egeswa kiane.
19Nigo narenge buna omote emeri yaye ekoranda yaika ase chindooche;
chinsagia chiane chikagenderera gotoora riime ase obotuko bwonsi;
20obonene bwane nigo bwarenge kona‐koba oboyia asende,
na obota bwane bokona‐konyora chinguru chinyia ase amaboko aane.
21Ekero narenge korua ogosemia,
abanto nigo barenge gontegerera, bakira‐kiri.
22Ekero nakoorire gokwana, monto onde tarenge komenta ing’ana rinde,
ekiagera amang’ana aane nigo arenge kobagwera buna amatoima ’embura.
23Nigo barenge koba banganyete buna embura ekoganywa;
bakaba bagwasamia emenwa yabo buna embura y’okwamia endagera egwasamerwa.
24Ekero konya berusirie moyo nigo narenge kobasekera;
obwasioku bw’obosio bwane tibabosieereretie.
25Inche nigo nachorete enchera bagwenerete kobwatia,
naende nkabeera egati yabo buna omogambi;
nigo namenyete asebare buna omoruoti akomenya nabarwani baye b’esegi,
naende buna omonto okoremia baria bakorera.”
Currently Selected:
AYUBU 29: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
