AYUBU 22
22
Chinkwana chia gatato ase egati y’Ayubu na abasani baye
(22:1—27:23)
Elifasi ogokwana
1Erio Elifasi Omotemani akairaneria, akabora:
2“Inee! Nenyarekane ng’a omonto abe nengencho ase Nyasae?
Ekeene, omonto oria ore nobong’aini nigo akwegwenera ere bweka omonyene.
3Inee! Omogoko onde nore ase Omonguru ng’a nomonyaboronge ore?
Gose inki aranyore onye aye kogokora chinchera chiao chibe ching’ikeranu?
4Inee! Nigo okagete ng’a nekiagera omoirogete,
nakio gekogera agokoa egesusuro na gokorenta ase ekina?
5Inee! Amabe gwakorire tari amanene?
Ekeene, ebibe biao tibiri nomoerio.
6Aye kwairire bosa ebinto abamino baruete bibe ntenenera,
naende kwabachaboire chianga, kwabatigire gesobono.
7Oyo konya orosire tomoeti amache anywe,
na oyo orenge nenchara okamorina endagera.
8Omonto obwate okobua nigo akoira ense yaba eyaye,
na oyio oeirwe ogosikwa nere okoyemenya.
9Aye kwabeire kogoseria ababoraka bare namaboko amasa
na kobuna amaboko e chintakana.
10Ase ayio emeeto yagoetananire,
na obwoba bwa mobosokano nkogochanda bore.
11Oborabu bwao bwabekirwe omosunte, goika tori korora,
na amache amange agotubire.
12“Inee! Nyasae tari aaria igoro mono?
Rigereria ching’enang’eni chia igoro buna chire aare mono!
13Ase engencho eyio aye nigo ogoteba: Inki Nyasae amanyete?
Nanyare konacha ekina goetera ase omosunte ekerima?
14Amare amarito nigo amotubete, takonyara korora,
naende nigo agotaara ase obokumbe bwa igoro.
15“Inee! Nenchera enkoro ogochia kobwatia,
eria abakori amabe babwatetie?
16Abwo nigo bataboretigwe engaki yabo konya etaraika;
na oboroso bwabo bokairwa buna omogoko okoira.
17Barabwo nigo batebetie Nyasae:
Karue asetore!
Naende bakabora: Inee! Ngento ki Omonguru oyio aratokorere?
18Nonya naboigo Nyasae konya oichoirie chinyomba chiabo nebinto ebiya.
Ogosemia kw’abakori amabe tiga kobe aare nainche.
19Ekero abanyaboronge bakorora ayio, nigo bakogoka;
ee, abwo batari na komocha nigo bagosekerera abakori amabe na kobachecheria,
20bateba: Amaene, ababisa baito basirigwe kegima,
na ebinto biabo biatigarete biasambirwe nomorero.
21“Obwatane na Nyasae, nario orabe nomorembe;
korakore igo, nonyore amaya.
22Ancha amorokererio akorwa ase omonwa oye;
gacha amang’ana aye ime ase enkoro yao.
23Korairanere Omonguru, noiranerigwe amaya ao;
korende oserie obobe korwa ase obomenyo bwao.
24Otugute chitahabu chiao ime ase amaroba,
ne chitahabu chikorwa Ofiri ochibeke ase egati y’amagena ’ebirooche,
25erinde Omonguru bweka abe etahabu yao,
na efeta yao ere nengencho enene.
26Rirorio nobe gokwegokia ase Omonguru oria,
onyare korigereria Nyasae.
27Na ekero orabe gokomosaba, nakoigwe;
naye nonyare goakana chiira chiao chi’ogotiana.
28Erio ekero orabe gokoroberia gokora gento kende gionsi, ekio nkebe bo,
na oborabu mbomoreke chinchera chiao.
29Nyasae nigo agokeyia abaenenu,
korende abare abaitongo obatooria.
30Ere nigo agotooria omonto ore nokomocha,
omonto buna oyio nigo aratoorigwe goetera ase amaboko ao achenegete.”
Currently Selected:
AYUBU 22: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
