AYUBU 21
21
Ayubu okoiraneria ogokwana gwa Sofari
1Bono Ayubu akairaneria, akabora:
2“Tegerera mono moigwe amang’ana aane,
ayio naro arabe okoremia kwaino asende.
3Remereria, erinde nkwane;
na ngokoora gokwana, mogenderere gonchecheria.
4“Inee! Inche mwanyabanto nkwemurunganeria?
Nase ki rende ndaremererie tinyemurungania?
5Indigererie na moichanigwe;
erio motube emenwa yaino namaboko, mokire.
6Ekero nkoinyora amang’ana aya, obwoba nigo bogonsoa,
na omobere one oiguswa.
7“Nase ki abakori amabe bakogenderera koba moyo
na kwegotera bare ne chinguru na okobua?
8Abana babo nigo bakoba nokogenderera okuya amo nabarabwo,
na ororeria rwabo boigo.
9Chinka chiabo nigo chire buya, bwoba tiboiyo,
gose Nyasae tari kobaa egesusuro.
10Chiombe chiabo nigo chikonyora amarieme buya,
naende chiabiara chitari korekera.
11Abana babo nigo bagotomwa isiko banga buna amaicho,
nigo bakoba bagotenga na gocharacharara.
12Nigo bagotera bakobugia chinchigiri na amakano,
naende bagokera amariogi ’ebiroria.
13Nigo bakogenderera kwegokia nobotenenku bwabo;
bakwa bagenda aase abakure bare nomorembe.
14“Abwo nigo bagotebia Nyasae: Karue aa asetore!
Titoganeti komanya chinchera chiao.
15Oria Omonguru ninki are goika tomokorere?
Mbitoki ki toranyore ase okomosaba?
16Rora, ogosesenigwa kwabo tikori ase amaboko abo;
ogosemia kw’abakori amabe nigo kore aare nainche.
17“Inee! Ng’ara karenga chitaya chi’abakori amabe chikorimigwa?
Ng’ara karenga emechando ekobachera?
Inee! Nyasae nkobaa are emechando ase engencho y’endamwamu yaye?
18Gose barabwo nkoirurukigwa bare buna chimboba,
na buna omoiriro okoirurukigwa nomwaga?
19“Inwe nigo mogoteba ng’a Nyasae nigo akogachera abana ebibe bi’abaise.
Tiga Omonene aakane abanto abanyene ebibe biabo,
erio nario baranyare kobimanya.
20Tiga barore ogosirigwa kwabo namaiso abo,
naende banyoosigwe endamwamu y’Omonguru.
21Ekero emetienyi yabo yaerire na bakure,
Inee, mbabe bagwechandera chinka chiabo?
22Onde nare oranyare kworokereria Nyasae obong’aini,
ere oria okogambia abwo bare igoro mono?
23“Omonto oyomo nigo agokwa ore nobotenenku obonge,
ore nobotoereru bwonsi na orendire buya,
24ebirandi biaye biichire namabeere,
na amauga ’omobere oye aichire nemeseto.
25Omonto onde igo agokwa ore nobororo bw’omoyo oye,
atana konyora amaya nonya ng’ake.
26Abwo bonsi nigo bakobekwa ase riroba bareng’anetie,
bagunda, na amakonde abatuba.
27“Rora, nimanyete ebirengererio biaino,
na emeroberio yaino y’ogonkora bobe.
28Inwe nigo mokoboria: Ng’ai enyomba y’omochandi oria ere?
Naende: Ng’ai obomenyo bw’abakori amabe bore?
29“Inee! Inwe timori koboria abaeti chinchera,
naende mwanchera oborori bwabo,
30ng’a omokori amabe nigo akorendwa ekero emechando yachire,
naende atoorigwe ase rituko ri’endamwamu?
31Ning’o oranyare koorokeria omokori amabe chinchera chiaye?
Ning’o oramoakane amabe ayio akorire?
32Ekero arabekwe ase oboina,
oboina boria nigo borarendwe.
33Amaroba e rigoko nabe amansu asare;
abanto bonsi mbamotunyane korwa nyuma,
na omobaro bw’abamotang’anerete tori kobareka.
34“Nase ki rende mokondemia namang’ana a bosa?
Ayatigaire ase amairanerio aino nigo are oborimo bwoka.”
Currently Selected:
AYUBU 21: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
