AYUBU 20
20
Ogokwana gwa Sofari
1Erio Sofari Omonaama akairaneria, akabora:
2“Bono ebirengererio bire ime yane bianchandire,
ase ayio biagerire imbe omwango koiraneria.
3Naigure ogokurerwa gw’okonyomania ng’a inche nomomochi,
korende omoika bw’okomanya ore ime yane ogerire ing’iranerie.
4Inee! Aye tikwana komanya ng’a korwa kare, ekero mwanyabanto babegetwe ase ense,
5omochengo bw’abakori amabe noyo bw’engaki enke,
na omogoko bw’abatamoirogeti Nyasae nomweng’e?
6Ere naisa koba nobonene boigete igoro,
na omotwe oye oike ase amare,
7goika asire kare na kare,
buna obonyira bwaye bogosira.
Abwo bamoroche mbaborie; Omonto oria, ng’ai are?
8Nigo arasire buna chindoto, takonyorekana,
ee, nigo aragikerigwe buna chindoto.
9Eriso riarenge komorora, tirikomorora naende,
gose aase aye tiaakomorigereria naende.
10Abana baye mbabe bagosaberera korwa ase abataka,
na amaboko aye nairanie obotenenku bwaye bwonsi.
11Amauga aye nigo aichire ne chinguru chi’oboke bwaye,
korende chinguru echio nigo chirarare nere ase riroba.
12“Nonya obobe bore obwansu ase
omonwa oye ime,
na abobise inse y’oromeme rwaye,
13nonya obwatererete obobe obwo
bokong’u, takobotiga,
korende nabogache ase omonwa oye ime,
14endagera eyio nigo erarore se ase enda yaye,
ebe buna obosongo bw’eng’iti engenda inse ime yaye.
15Ere nigo akomera chinibo, naende ochiroka;
Nyasae nigo agochiseria korwao.
16Omonto oyio nigo aranyunyunte obosongo bw’eng’iti nomonwa,
na obosongo bokorwa ase oromeme rw’eng’iti eria mbomoite.
17Ere takwegokia ase okorora chindooche,
chindooche chiichire namooke na amaguta ’amabeere.
18Ebinto akoreire emeremo emekong’u nabiiranie, takobimera,
gose takonyara kwegokeria ebitoki biria anyorire.
19Ekiagera obeire ogokorera abataka bobe na kobatiga bare bosa,
naende obeire okoira ne chinguru enyomba ende yonsi ere ataagachete.
20Ekeene, ribero ri’omonto oyio riagerire taba nobotoereru,
takonyara kogacha gento kende gekomogokia.
21Ekero arageire tari gotigaria kende,
ase ayio obotenenku bwaye tibokogenderera.
22Nebe ekero agendererete gotenenka mono nachandwe,
na obokong’u obonge mbomochere.
23Nebe ng’a ekero aisire koigota,
Nyasae namotomere ekeririanda gi’okogechigwa kwaye;
egesusuro ekio nigo keramochere ekero agendererete koragera.
24Nabe ogotama korwa ase ekerwanero gi’ekioma,
abetwe nensara y’etaai.
25Ensara eyio eng’uswe korwa ase omobere oye,
ee, ensonga ekomesa nesokere ase endorwe yaye,
erio ekeondogo ki’amakweri nakemosoe.
26Omosunte ekerima nigo ogacheire chinibo chiaye;
omorero otautiri nonde nomosirie,
na ebitigarete ase obomenyo bwaye mbisambwe biere.
27Igoro neorokie ebibe biaye maiso marore,
na ense nemoimokere komorwania.
28Ebinto asangereretie ase enyomba yaye mbiirwe;
bionsi nigo birairwe ase rituko ri’endamwamu ya Nyasae.
29“Eke nakio egetari ki’omokori amabe gekorwa ase Nyasae,
naende oyio noro omwando oye Nyasae amochikerete.”
Currently Selected:
AYUBU 20: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
